ଢେଙ୍କାନାଳ ଅଫିସ/ଅନୁଗୋଳ ଅଫିସ, ୩୧ା୫ ଢେଙ୍କାନାଳ ସହର ୯ନଂ. ୱାର୍ଡ କଣ୍ଟାନାଳୀ ବାଇପାସ୍ ନିକଟ ହିମାଳୟ ବସ୍ତିରେ ରହୁଥିବା କିନ୍ନରମାନେ ସୋମବାର ସାବିତ୍ରୀ ବ୍ରତକୁ ମହାସମାରୋହରେ ପାଳନ କରିଛନ୍ତି। ନୂଆବସ୍ତ୍ର, ଅଳତା, ଚୁଡ଼ି ପିନ୍ଧି ସେମାନେ ବୃନ୍ଦାବତୀଙ୍କ ନିକଟରେ ଗୁରୁ ଓ ଜଗତର ମଙ୍ଗଳ ମନାସିଥିଲେ। ବସ୍ତିର ୧୫ଜଣ କିନ୍ନର ଏଥିରେ ସାମିଲ ହୋଇଥିଲେ। ଏ ସଂକ୍ରାନ୍ତରେ କିନ୍ନର ସଂଘ ସଭାପତି ଛବି ମା’ କୁହନ୍ତି, ଯେପରି ସାବିତ୍ରୀ ବ୍ରତରେ ସଧବା ନାରୀମାନେ ନିଷ୍ଠାପର ଭାବେ ପୂଜାର୍ଚ୍ଚନା କରି ସ୍ବାମୀଙ୍କ ଦୀର୍ଘାୟୁ କାମନା କରିଥାନ୍ତି। ସେହିପରି କିନ୍ନରମାନେ ମଧ୍ୟ ଗୁରୁ ଏବଂ ଜଗତ କଲ୍ୟାଣ ପାଇଁ ପ୍ରାର୍ଥନା କରିଥାଆନ୍ତି। ସାବିତ୍ରୀ ବ୍ରତ ପାଇଁ ହିମାଳୟ ବସ୍ତି ଉତ୍ସବମୁଖର ହୋଇଉଠିଥିଲା।
ସେହିପରି ଅନୁଗୋଳର କିନ୍ନରମାନେ ସୋମବାର ରାଧାରମଣପଡ଼ାଠାରେ ପରମ୍ପରା ଅନୁଯାୟୀ ସାବିତ୍ରୀ ବ୍ରତ ପାଳନ କରିଛନ୍ତି। ନୂଆବସ୍ତ୍ର, ଅଳତା, ଚୁଡ଼ି ପିନ୍ଧି ସେମାନେ ବୃନ୍ଦାବତୀଙ୍କ ନିକଟରେ ଗୁରୁ ଓ ଜଗତର ମଙ୍ଗଳ ମନାସିଥିଲେ। ସାବିତ୍ରୀ ବ୍ରତ ପାଇଁ ଉକ୍ତ ଅଞ୍ଚଳ ଉତ୍ସବମୁଖର ହୋଇଉଠିଥିଲା। ଗୁରୁ ଏବଂ ଜଗତ କଲ୍ୟାଣ ପାଇଁ ଏହି ବ୍ରତ ପାଳନ କରୁଥିବା କିନ୍ନରମାନେ ପ୍ରକାଶ କରିଛନ୍ତି।
