ଶାରଜା, ୪ା୧୦ (ପି.ଟି.)-କିରନ ପୋଲାର୍ଡ ଓ ହାର୍ଦ୍ଦିକ ପାଣ୍ଡ୍ୟାଙ୍କଠାରୁ ଅନେକ କୌଶଳ ସେ ହାସଲ କରିପାରିଥିବା କହିଛନ୍ତି ମୁମ୍ବାଇ ଇଣ୍ଡିଆନ୍ସର ଯୁବ ବ୍ୟାଟ୍ସମ୍ୟାନ ଇଶାନ କିଶନ। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିପକ୍ଷରେ ବିସ୍ଫୋରକ ୯୯ ରନ ସଂଗ୍ରହ କରି ଦୃଷ୍ଟିଆକର୍ଷଣ କରିଥିବା କିଶନ କହିଛନ୍ତି, କେବଳ ବ୍ୟାଟିଂ ନୁହେଁ ଟି୨୦ ଖେଳର ଅନ୍ୟ କେତୋଟି ଦିଗରୁ ସେ ଏହି ଦୁଇ ସିନିୟର ଖେଳାଳିଙ୍କଠାରୁ ଜ୍ଞାନ ଆହରଣ କରିଛନ୍ତି। ପୋଲାର୍ଡ ଓ ହାର୍ଦ୍ଦିକଙ୍କ ସହ ସେ ୩ବର୍ଷ ହେଲା ଖେଳି ଆସୁଛନ୍ତି। ମ୍ୟାଚ ପୂର୍ବରୁ ଏହି ଖେଳାଳି ଦ୍ୱୟ ଯୋଜନା ପ୍ରସ୍ତୁତ କରିଥାନ୍ତି। କେବଳ ଦ୍ରୁତ ବ୍ୟାଟିଂ ନୁହେଁ ମ୍ୟାଚକୁ କିପରି ଶେଷ ଓଭର ପର୍ଯ୍ୟନ୍ତ ନେଇ ହେବ ଏବଂ ବୋଲରମାନଙ୍କ ଉପରେ କିପରି ଚାପ ସୃଷ୍ଟି କରିହେବ ଏସବୁ ତାଙ୍କ ଯୋଜନାର ପରିସରଭୁକ୍ତ ଥାଏ। ପୁନଶ୍ଚ ଷ୍ଟ୍ରାଇକ୍ ରୋଟେଟ୍ କରିବା ଏବଂ ପରବର୍ତ୍ତୀ ପ୍ଲାନ ସମ୍ପର୍କରେ ଖେଳାଳିମାନଙ୍କୁ ଦ୍ୱନ୍ଦ୍ୱରେ ପକାଇବା ଆଦି ମଧ୍ୟ ଅନ୍ତର୍ଭୁକ୍ତ।