କୋଲକାତା, ୧୬ା୧୦ (ପି.ଟି.)-ଭେଟେରାନ କ୍ରୀଡ଼ା ଜର୍ନାଲିଷ୍ଟ ତଥା କ୍ରିକେଟ ଭାଷ୍ୟକାର କିଶୋର ଭିମାନୀଙ୍କ ପରଲୋକ ହୋଇଯାଇଛି। ତାଙ୍କ ୮୦ବର୍ଷ ହୋଇଥିଲା। ସେ ଅସୁସ୍ଥ ଥିବାରୁ କିଛି ଦିନ ହେଲା ଚିକିତ୍ସାଧୀନ ଥିଲେ। ଭିମାନୀଙ୍କ ପୁଅ ଗୌତମ ଜଣେ ଜଣାଶୁଣା ଟିଭି ବ୍ୟକ୍ତିତ୍ୱ। ୧୯୮୦ ଦଶକରେ ସେ ଜଣେ ଜଣାଶୁଣା ଇଂଲିଶ ଭାଷ୍ୟକାର ଥିଲେ। ତାଙ୍କ ଦେହାନ୍ତରେ କ୍ରୀଡ଼ାମହଲରେ ଶୋକର ଛାୟା ଖେଳିଯାଇଛି। ୧୯୮୭ରେ ଅହମ୍ମଦାବାଦ୍ରେ ପାକିସ୍ତାନ ବିପକ୍ଷ ଡ୍ର ମ୍ୟାଚରେ ସୁନୀଲ ଗାଭାସ୍କର ଟେଷ୍ଟ କ୍ରିକେଟରେ ପ୍ରଥମ ଖେଳାଳି ଭାବେ ୧୦,୦୦୦ ରନ ପୁରଣ କରିଥିଲେ। ସେତେବେଳେ ଭିମାନୀ ମ୍ୟାଚରେ ଧାରାବିବରଣୀ ଦେଇଥିଲେ। ୧୯୮୦ ଦଶକରେ ବ୍ରିଟିଶ ପବ୍ଲିକେଶନରେ ଯେଉଁ କେତେଜଣ ଭାରତୀୟ କ୍ରିକେଟ ଲେଖକଙ୍କର ଚାହିଦା ଥିଲା ସେମାନଙ୍କ ମଧ୍ୟରେ ଭିମାନୀ ଅନ୍ୟତମ ଥିଲେ। ଇମ୍ରାନ ଖାଁ ପାକିସ୍ତାନ କ୍ରିକେଟ ଦଳର ଅଧିନାୟକ ଥିବାବେଳେ ଯେତେବେଳେ କୋଲକାତା ଆସୁଥିଲେ ଭିମାନୀଙ୍କ ବାସଭବନକୁ ଯାଇ ତାଙ୍କୁ ଭେଟୁଥିଲେ। ଭିମାନୀ କୋଲକାତାରୁ ପ୍ରକାଶିତ ଦୈନିକ ‘ଦି ଷ୍ଟେଟ୍ସମ୍ୟାନ’ରେ କାର୍ଯ୍ୟକରୁଥିଲେ। ସେ ଜଣେ ଜଣାଶୁଣା ସ୍ତମ୍ଭକାର ଥିଲେ। ’ଦି ଆକ୍ସିଡେଣ୍ଟାଲ ଗଡ୍ମ୍ୟାନ’ ତାଙ୍କର ଚର୍ଚ୍ଚିତ ଲେଖାଥିଲା। ସେ ୧୯୭୮ରୁ ୧୯୮୦ ପର୍ଯ୍ୟନ୍ତ କଲିକତା ସ୍ପୋଟର୍ସ ଜର୍ନାଲିଷ୍ଟ କ୍ଲବର ସଭାପତି ଥିଲେ।