ନୂଆଦିଲ୍ଲୀ,୧।୯: ଫ୍ଲିପ୍କାର୍ଟର ସହ ପ୍ରତିଷ୍ଠାତା ସଚିନ ବଂଶଲ ଫ୍ୟୁଚର ଗ୍ରୁପ୍ର ବୀମା କମ୍ପାନୀ ଫ୍ୟୁଚର ଜେନେରାଲି ଇଣ୍ଡିଆ ଲାଇଫ ଇନ୍ସ୍ୟୁରାନ୍ସ ଲିମିଟେଡ୍କୁ କିଣିବାକୁ ଯାଉଛନ୍ତି। ଏହି ଡିଲ୍କୁ ନେଇ ଫ୍ୟୁଚର ଗ୍ରୁପ୍ ଏବଂ ସଚିନ ବଂଶଲଙ୍କ ନେତୃତ୍ୱାଧୀନ କମ୍ପାନୀ ନାବୀ ଟେକ୍ନୋଲୋଜି ପ୍ରାଇଭେଟ ଲିମିଟେଡ୍ ମଧ୍ୟରେ ଆଲୋଚନା ଚୂଡାନ୍ତ ପର୍ଯ୍ୟାୟରେ ପହଞ୍ଚିଥିବା ଏକ ଗଣମାଧ୍ୟମ ରିପୋର୍ଟରେ ପ୍ରକାଶ ପାଇଛି। ଡିଲ୍ ୧୪୦୦ରୁ ୧୫୦୦ କୋଟି ଟଙ୍କାରେ ହୋଇପାରେ ବୋଲି ପ୍ରକ୍ରିୟା ସହ ଜଡିତ ଜଣେ ବରିଷ୍ଠ ଅଧିକାରୀ ଏକ ଇଂରାଜୀ ଗଣମାଧ୍ୟମକୁ ସୂଚନା ଦେଇଛନ୍ତି। ଫ୍ୟୁଚର ଜେନେରାଲି କମ୍ପାନୀରେ ୩ କମ୍ପାନୀର ଅଂଶଧନ ରହିଛି। ଏହା ମଧ୍ୟରେ ଫ୍ୟୁଚର ଗ୍ରୁପ୍ର ୫୭.୬୨%, ଇଣ୍ଡଷ୍ଟ୍ରିଆଲ ଇନ୍ଭେଷ୍ଟମେଣ୍ଟ ଟ୍ରଷ୍ଟ ଲିମିଟେଡ୍ର ୧୬.୮୮% ଏବଂ ଜେନେରାଲିର ୨୫% ଅଂଶଧନ ସାମିଲ ରହିଛି। ଏହି ଡିଲ୍ ଉପରେ ଔପଚାରିକ ଆଲୋଚନା ଜାରି ରହିଥିବା ବେଳେ ଚୂଡାନ୍ତ ଘୋଷଣା ଶୀଘ୍ର ହେବ ବୋଲି କୁହାଯାଉଛି। ଡିଲ୍କୁ ନେଇ ଉଭୟ ପକ୍ଷ ବେଶ୍ ଆଶାବାଦୀ ରହିଛନ୍ତି। ଫ୍ୟୁଚର ଜେନେରାଲିର ଭାଲ୍ୟୁ ପ୍ରାୟ ୮୦୦ କୋଟି ଟଙ୍କା ରହିଥିବା ବେଳେ ଡିଲ୍ ପ୍ରାୟ ଏହାଠାରୁ ଦୁଇଗୁଣା ହେବା ନେଇ ଶୁଣାଯାଉଛି।
