ଶାରଜା, ୭।୧୦: ରାଜସ୍ଥାନ ରୟାଲ୍ସ ଦଳର ବୃହତ୍ ପରାଜୟ ସହ ବନ୍ଦ ହୋଇଯାଇଛି ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସର ପ୍ଲେ-ଅପ୍ରେ ପ୍ରବେଶ କରିବାର ବାଟ। କୋଲକାତା ନାଇଟ୍ ରାଇଡର୍ସ (କେକେଆର) ୮୬ ରନ୍ରେ ରାଜସ୍ଥାନକୁ ହରାଇ ଦେଇଛି। ଏହି ବିଜୟ ସହ ଚତୁର୍ଥ ଦଳ ଭାବେ ପ୍ଲେ-ଅପ୍ରେ ସ୍ଥାନ ପକ୍କା କରିଛି କେକେଆର୍।
କେବଳ ଟସ୍କୁ ଛାଡ଼ି ଦେଲେ ରାଜସ୍ଥାନ ଭାଗରେ କିଛି ପଡ଼ି ନ ଥିଲା। ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା କେକେଆର୍କୁ ୭୯ ରନ୍ର ଆରମ୍ଭ ଦେଇଥିଲେ ଶୁବମାନ ଗିଲ (୫୬ ରନ୍, ୪ ଚୌକା ଓ ୨ ଛକା) ଓ ଭେଙ୍କଟେଶ ଆୟାର (୩୮ ରନ୍, ୩ ଚୌକା ଓ ୨ ଛକା)। ଅନ୍ୟ ବ୍ୟାଟ୍ସମ୍ୟାନଙ୍କ ଯୋଗଦାନ କାରଣରୁ କୋଲକାତା ୨୦ ଓଭରରେ ୪ ଉଇକେଟ ହରାଇ ୧୭୧ ରନ୍ କରିଥିଲା।
ଶାରଜାର ଗ୍ରାଉଣ୍ଡରେ ୧୭୨ ରନ୍ର ପିଛା କରିବାକୁ ଓହ୍ଲାଇଥିବା ରାଜସ୍ଥାନ କଦାପି ପ୍ରାରମ୍ଭିକ ବିପର୍ଯ୍ୟୟରୁ ଉଦ୍ଧାର ପାଇ ନ ଥିଲା। ଅଧିନାୟକ ସଞ୍ଜୁ ସମାସନ ୧ ରନ୍ କରି ଆଉଟ୍ ହୋଇଥିବାବେଳେ ଯଶସ୍ବୀ ଜୈସ୍ବାଲ ଖାତା ଖୋଲି ପାରି ନ ଥିଲେ। କେବଳ ଶିବମ ଦୁବେ (୧୮) ଓ ରାହୁଲ ଟଓ୍ବୋଟିଆ (୪୩)ଙ୍କୁ ଛାଡ଼ି ଦେଲେ କେହି ଦୁଇ ଅଙ୍କ ଛୁଇଁ ପାରି ନ ଥିଲେ। ଫଳରେ ୮୫ ରନ୍ରେ ଅଲଆଉଟ୍ ହୋଇଯାଇଥିଲା ରାଜସ୍ଥାନ। କେକେଆର୍ ପାଇଁ ଶିବମ ମାଭି ୪ ଉଇକେଟ ନେଇଥିବା ବେଳେ ଲୋକି ଫର୍ଗୁସନ ୩ ଉଇକେଟ ହାତେଇଥିଲେ।