ବମ୍ବେ, ୨୫।୪: ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍) ୨୦୨୧ରେ ଶନିବାର ମୁମ୍ବାଇର ଓ୍ବାଙ୍ଖଡେ ଷ୍ଟାଡିୟମରେ କୋଲକାତା ନାଇଟ୍ ରାଇଡର୍ସ ଏବଂ ରାଜସ୍ଥାନ ରୟାଲ୍ସ ମଧ୍ୟରେ ମୁକାବିଲା ଅନୁଷ୍ଠିତ ହୋଇଥିଲା। ଏଥିରେ କେକେଆର୍ର ବ୍ୟାଟ୍ସମ୍ୟାନ୍ ନିରାଶଜନକ ପ୍ରଦର୍ଶନ କରିଥିଲେ। ଫଳରେ ଦଳ ୨୦ ଓଭରରେ ୯ ଉଇକେଟ ହରାଇ ୧୩୩ ରନ୍ କରିଥିଲା। ଶୁଭମନ ଗିଲ ୧୯ ବଲ୍ରେ ମାତ୍ର ୧୧ ରନ୍ କରିଥିବା ବେଳେ ଇଆନ ମୋର୍ଗାନ ଖାତା ଖୋଲିବା ପୂର୍ବରୁ କ୍ରିସ୍ ମୋରିସଙ୍କ ଦ୍ୱାରା ଦୁର୍ଭାଗ୍ୟଜନକ ଭାବେ ରନ୍ଆଉଟ୍ ହୋଇଥିଲେ। ଏହାକୁ ନେଇ ମୋର୍ଗାନ ଏକ ଲଜ୍ଜାଜନକ ରେକର୍ଡର ଅଧିକାରୀ ହୋଇଛନ୍ତି। ସେ ଆଇପିଏଲ୍ ଇତିହାସରେ ବିନା ବଲ୍ ଖେଳି ରନ୍ଆଉଟ୍ ହୋଇଥିବା ଦ୍ୱିତୀୟ ଅଧିନାୟକ ପାଲଟିଛନ୍ତି। ପୂର୍ବରୁ ଗୌତମ ଗମ୍ଭୀର ଆଇପିଏଲ୍ ୨୦୧୩ରେ ଜେକାନ୍ ଚାର୍ଜର୍ସ ବିପକ୍ଷରେ ଗୋଟିଏ ବି ବଲ୍ ନ ଖେଳି ରନ୍ଆଉଟ୍ ହୋଇଥିଲେ। ସେତେବେଳେ କେକେଆର୍ର ସେ ମଧ୍ୟ ଅଧିନାୟକ ଥିଲେ।
କେକେଆର୍ ପାଳିର ୧୧ତମ ଓଭରରେ ମୋର୍ଗାନ ରନ୍ଆଉଟ୍ ହୋଇଥିଲେ। ରାହୁଲ ତ୍ରିପାଠୀ ସେତେବେଳେ ଷ୍ଟ୍ରାଇକ୍ରେ ଥିଲେ। ସେ ଏକ ସିଧା ଶଟ୍ ଖେଳିଥିଲେ। ଏହା ମୋର୍ଗାନଙ୍କ ବ୍ୟାଟ୍ରେ ଲାଗି ଶର୍ଟ କଭର୍ସ ଦିଗରେ ଚାଲିଯାଇଥିଲା। ଏହି ସମୟରେ ରନ୍ ନେବାକୁ ଯାଇ ମୋର୍ଗାନ ନିଜର ଉଇକେଟ ହରାଇଥିଲେ। ଅଧାରାସ୍ତାରେ ଉଭୟ ବ୍ୟାଟ୍ସମ୍ୟାନଙ୍କ ମଧ୍ୟରେ ବୁଝାମଣାର ଅଭାବ ଯୋଗୁ ଏଭଳି ହୋଇଥିଲା।