କୋଲକାତା,୧।୪: ଆଗାମୀ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ପୂର୍ବରୁ କୋଲକାତା ନାଇଟ୍ ରାଇଡର୍ସ (କେକେଆର) ଷ୍ଟାର ବ୍ୟାଟ୍ସମ୍ୟାନ ନୀତିଶ ରାଣାଙ୍କ କୋଭିଡ୍ ଟେଷ୍ଟ ରିପୋର୍ଟ ନେଗେଟିଭ ଆସିଛି। ଏ ନେଇ ଗୁରୁବାର ବିବୃତି ଜାରି କରିଛି କେକେଆର।
ମାର୍ଚ୍ଚ ୧୯ ତାରିଖରେ କରାଯାଇଥିବା କୋଭିଡ୍ ଟେଷ୍ଟ ରିପୋର୍ଟ ନେଗେଟିଭ ଆସିବା ପରେ ୨୧ ତାରିଖରେ କେକେଆର କ୍ୟାମ୍ପରେ ଯୋଗ ଦେଇଥିଲେ ବାମହାତୀ ବ୍ୟାଟ୍ସମ୍ୟାନ। କିନ୍ତୁ ୨୨ ତାରିଖରେ କରାଯାଇଥିବା ଟେଷ୍ଟରେ ସେ ପଜିଟିଭ ଥିବା ଜଣାପଡ଼ିଥିଲା। ଆଇପିଏଲ କୋଭିଡ୍ ପ୍ରୋଟୋକଲ ଅନୁସାରେ ସେବେଠାରୁ ତାଙ୍କୁ ଆସୋଲେଶନରେ ରଖାଯାଇଛି। ଖୁସିର କଥା ହେଲା, ଗୁରୁବାର କରାଯାଇଥିବା ଟେଷ୍ଟର ରିପୋର୍ଟ ଆସିଛି ନେଗେଟିଭ। ସେ ଶୀଘ୍ର ଦଳ ସହ ଟ୍ରେନିଂ କରିବେ ବୋଲି ଆମେ ଆଶା କରୁଛୁ ବୋଲି ବିବୃତିରେ କେକେଆର ପକ୍ଷରୁ କୁହାଯାଇଛି। କେକେଆର ପାଇଁ ନୀତିଶ ଜଣେ ଗୁରୁତ୍ୱପୂର୍ଣ୍ଣ ଖେଳାଳି। ସେ ଗତ ୩ ସଂସ୍କରଣରେ ୩୦୦ରୁ ଅଧିକ ରନ୍ କରିଛନ୍ତି।
