ନୂଆଦିଲ୍ଲୀ,୧୪।୪: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍) ୨୦୨୧ର ପଞ୍ଚମ ମୁକାବିଲା କୋଲକାତା ନାଇଟ୍ ରାଇଡର୍ସ(କେକେଆର୍) ଏବଂ ମୁମ୍ବାଇ ଇଣ୍ଡିଆନ୍ସ(ଏମ୍ଆଇ) ମଧ୍ୟରେ ଖେଳାଯାଇଛି। ଏଥିରେ କୋଲକାତା ଟିମ୍ ଟସ୍ ଜିତି ବୋଲିଂ କରିବା ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରି ସୂର୍ଯ୍ୟକୁମାର ଯାଦବ(୫୬) ଏବଂ ରୋହିତ ଶର୍ମା(୪୩)ରନ୍ କରିଥିଲେ। ଉଭୟ ବ୍ୟାଟିଂ କରିବା ସମୟରେ ଦଳ ବଡ ସ୍କୋର କରିବ ବୋଲି ଆଶା କରାଯାଉଥିଲା। ହେଲେ କୋଲକାତା ଅଲରାଉଣ୍ଡର ଆନ୍ଦ୍ରେ ରସେଲଙ୍କ ଦମ୍ଦାର ବୋଲିଂ ଯୋଗୁ ରନ୍ ଉପରେ ଅଙ୍କୁଶ ଲାଗିଥିଲା। ରସେଲ ମାତ୍ର ୨ ଓଭରରେ ୧୫ରନ୍ ଦେଇ ୫ ଉଇକେଟ ନେଇଥିଲେ। ଫଳରେ ମୁମ୍ବାଇ ୨୦ ଓଭରରେ ୧୫୨ରନ୍ରେ ସୀମିତ ରହିିଥିଲା।
ଜବାବରେ କୋଲକାତା ଟିମ୍ ଭଲ ଆରମ୍ଭ କରିଥିଲେ ହେଁ ୭ ଉଇକେଟ ହରାଇ ୧୪୨ରନ୍ କରି ପରାସ୍ତ ହୋଇଥିଲା। ନୀତିଶ ରାଣା ଓ ଶୁବମନ ଗିଲଙ୍କୁ ବାଦ୍ ଦେଲେ ଅନ୍ୟମାନେ ଦୁଇ ଅଙ୍କ ଛୁଇଁପାରି ନ ଥିଲେ। ନୀତିଶ-ଶୁବମନ ୭୨ରନ୍ର ଭାଗିଦାରୀ କରିଥିଲେ। ହେଲେ ମୁମ୍ବାଇର ସ୍ପିନର ରାହୁଲ ଚହର ଉଭୟଙ୍କୁ ଆଉଟ୍ କରିଥିଲେ। ଏହାପରେ ସେ ରାହୁଲ ତ୍ରିପାଠୀ(୫), ଅଧିନାୟକ ଇୟୋନ ମୋର୍ଗାନ(୭)ଙ୍କ ଉଇକେଟ ନେଇଥିଳେ। ୧୫ ଓଭର ଶେଷ ହେବା ପର୍ଯ୍ୟନ୍ତ କୋଲକାତା ୪ ଉଇକେଟ ହରାଇ ୧୨୨ରନ୍ କରିିଥିଲା।
ପରେ କୋଲକାତା ପାଖରେ ୬ ଉଇକେଟ ଥିବା ବେଳେ ୩୦ ବଲ୍ରେ ମାତ୍ର ୩୧ରନ୍ କରିବାର ଥିଲା। ପଡ଼ିଆରେ ଶକିବ ଅଲ ହାସନ ଏବଂ ଦୀନେଶ କାର୍ତ୍ତିକ ଥିଲେ। ହେଲେ କୃନାଲ ପାଣ୍ଡ୍ୟା ୧୬ ଓଭର ବୋଲିଂ କରିବାକୁ ଆସି ଶକିବଙ୍କ ଉଇକେଟ ନେଇଥିଲେ। ତାଙ୍କ ପରେ ରସେଲ ଏବଂ କାର୍ତ୍ତିକ ଭଲ ବ୍ୟାଟିଂ କରିବେ ବୋଲି ଆଶା କରାଯାଉଥିଲା। ଧିରେ ଧିରେ ମ୍ୟାଚ୍ ଶେଷ ଓଭର ପର୍ଯ୍ୟନ୍ତ ଯାଇଥିଲା। ଏଥିରେ ୬ ବଲ୍ରେ ୧୫ ରନ୍ର ଆବଶ୍ୟକତା ରହିଥିଲା। ଟ୍ରେଣ୍ଟ ବୋଲ୍ଟ ବୋଲିଂ କରିବାକୁ ଆସିଥିଲେ।
ଶେଷ ଓଭରର ପ୍ରଥମ ବଲ୍ରେ ୧ ରନ୍, ଦ୍ୱିତୀୟ ବଲ୍ରେ ୧ ରନ୍, ତୃତୀୟରେ ଉଇକେଟ, ଚତୁର୍ଥରେ ଉଇକେଟ, ପଞ୍ଚମରେ ୨ ରନ୍, ଷଷ୍ଠରେ ୦ ରନ୍ ହୋଇଥିଲା। ଫଳରେ ୧୦ ରନ୍ରେ ମ୍ୟାଚ୍ ହାରିଥିଲା କୋଲକତା ଟିମ୍।