ଶାରଜା,୨୮।୯: ମଙ୍ଗଳବାର ଅପରାହ୍ନରେ ଶାରଜାରେ ଖେଳାଯାଇଥିବା ମ୍ୟାଚ୍ରେ କୋଲକାତା ନାଇଟ୍ ରାଇଡର୍ସ (କେକେଆର୍) ୩ ଉଇକେଟରେ ଦିଲ୍ଲୀ କ୍ୟାପିଟାଲ୍ସ (ଡିସି)କୁ ହରାଇ ଦେଇଛି। ଏହି ବିଜୟ ସହ କେକେଆର୍ର ପ୍ଲେ-ଅଫ୍ ଆଶା ଉଜ୍ଜୀବିତ ରଖିଛି।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ଦିଲ୍ଲୀ ଧାର୍ଯ୍ୟ ୨୦ ଓଭରରେ ୯ ଉଇକେଟ ହରାଇ ୧୨୭ ରନ୍ କରିଛି। ଦଳ ପାଇଁ ଷ୍ଟିଭ ସ୍ମିଥ (୩୯), ଅଧିନାୟକ ରିଷଭ ପନ୍ତ (୩୯), ଶିଖର ଧାଓ୍ବନ (୨୪)ଙ୍କୁ ଭଲ ଆରମ୍ଭ ମିଳିଥିଲା। କିନ୍ତୁ କେହି ବଡ଼ ଇନିଂସ ଖେଳିପାରି ନ ଥିଲେ। ଦିଲ୍ଲୀର କୌଣସି ବ୍ୟାଟ୍ସମ୍ୟାନ ଗୋଟିଏ ହେଲେ ଛକା ମାରିପାରି ନ ଥିଲେ। ଲୋକି ଫର୍ଗୁସନ, ଭେଙ୍କଟେଶ ଆୟାର ଓ ସୁନିଲ ନାରିନ ୨ ଲେଖାଏ ଉଇକେଟ ନେଇଥିଲେ। ଜବାବରେ କୋଲକାତା ମଧ୍ୟ କ୍ରମାଗତ ବ୍ୟବଧାନରେ ଉଇକେଟ ହରାଇଥିଲା। କିନ୍ତୁ ଶେଷ ଆଡ଼କୁ ସୁନିଲ ନାରିନଙ୍କ ୨୧ ଓ ନୀତିଶ ରାଣାଙ୍କ ଅପରାଜିତ ୩୬ ରନର ପାଳି ଯୋଗୁ କେକେଆର୍ ୧୮.୨ ଓଭରରେ ୭ ଉଇକେଟ ହରାଇ ୧୩୦ ରନ୍ କରି ମ୍ୟାଚ୍ ଜିତି ନେଇଥିଲା। ଅଭେଶ ଖାନ ୩ ଉଇକେଟ ହାତେଇଥିଲେ।