ଶାରଜା,୧୩।୧୦: ଆରମ୍ଭରୁ ସ୍ପିନରଙ୍କୁ କାମରେ ଲଗାଇ ଦେଇଥିଲା କୋଲକାତା ନାଇଟ୍ ରାଇଡର୍ସ (କେକେଆର)। ବରୁଣ ଚକ୍ରବର୍ତ୍ତୀ(୨ ଉଇକେଟ)ଙ୍କ ସହ ଲୋକି ଫର୍ଗୁସନ ଓ ଶିବମ ମାଭିଙ୍କ ଯୋଡ଼ି ଦିଲ୍ଲୀ କ୍ୟାପିଟାଲ୍ସର କୌଣସି ବ୍ୟାଟ୍ସମ୍ୟାନଙ୍କୁ ଖସିବାକୁ ସୁଯୋଗ ଦେଇ ନ ଥିଲେ। ଫଳରେ ଦିଲ୍ଲୀ ୨୦ ଓଭରରେ ୫ ଉଇକେଟ ହରାଇ ୧୩୫ ରନ୍ କରିପାରିଛି।
କେବଳ ପୃଥ୍ବୀ ଶ’ଙ୍କୁ ଛାଡ଼ି ଦେଲେ ଟପ୍ ଅର୍ଡରରେ କେହି ବଲ ପିଛା ରନ୍ ଠାରୁ ଅଧିକ ଷ୍ଟ୍ରାଇକ୍ ରେଟ୍ରେ ଖେଳି ପାରି ନ ଥିଲେ। ୧୨ ବଲରେ ୨ ଚୌକା ଓ ୧ ଛକା ବଳରେ ସେ ଖେଳିଥିଲେ ୧୮ ରନ୍ର ଛୋଟିଆ ପାଳି। ବାଉଣ୍ଡ୍ରି ଖୋଜି ଖୋଜି ଆଉଟ୍ ହୋଇଥିଲେ ଶିଖର ଧାଓ୍ବନ (୩୬ ରନ୍, ୧ ଚୌକା ଓ ୨ ଛକା ), ମାର୍କସ ଷ୍ଟୋଇନିସ (୧୮) ଓ ରିଷଭ ପନ୍ତ (୬)। ଜୀବନ ଦାନ ପାଇବା ପରେ ଶିମରନ ହେଟମାୟର (୧୭) ଦୁଇଟି ଛକା ଲଗାଇଥିଲେ। ଶ୍ରେୟାସ ଆୟାର (୩୦) ଶେଷ ପର୍ଯ୍ୟନ୍ତ ଅପରାଜିତ ରହିବା ସତ୍ତ୍ୱେ ଦିଲ୍ଲୀର ସ୍କୋର ଅଟକି ଯାଇଥିଲା ୧୩୫/୫ରେ।