ନୂଆଦିଲ୍ଲୀ,୨୬।୮: ୟୁଏଇରେ ଆସନ୍ତା ମାସରୁ ଆରମ୍ଭ ହେବାକୁ ଥିବା ଆଇପିଏଲ ସିଜନର ବଳକା ୩୧ ମ୍ୟାଚ୍ ପାଇଁ ଦୁଇ ଥର ଚାମ୍ପିୟନ କୋଲକାତା ନାଇଟ୍ ରାଇଡର୍ସ (କେକେଆର୍) ନ୍ୟୁଜିଲାଣ୍ଡର ଷ୍ଟାର ପେସର ଟିମ୍ ସୌଦିଙ୍କ ସହ ଚୁକ୍ତି କରିଛି। ଏ ନେଇ ବିଦ୍ଧିବଧ ଭାବେ ସୂଚନା ଦେଇଛି କେକେଆର୍। ବ୍ୟକ୍ତିଗତ କାରଣ ଦର୍ଶାଇ ଆଇପିଏଲର ବଳକା ମ୍ୟାଚ୍ରୁ ଓହରି ଯାଇଥିବା ଅଷ୍ଟ୍ରେଲିଆର ପେସର ପାଟ କୁମିନ୍ସଙ୍କ ବଦଳରେ ସୌଦିଙ୍କୁ ନିଆଯାଇଛି।
ଗତ ୬ ବର୍ଷ ହେଲା ଆଇପିଏଲରେ ଖେଳୁଥିବା ସୌଦିଙ୍କୁ ୨୦୨୦ ଅକଶନରେ କୌଣସି ଫ୍ରାଞ୍ଚାଇଜ କିଣି ନ ଥିଲା। ଅନ୍ତିମ ଥର ୨୦୧୯ରେ ଆରସିବି ପାଇଁ ଖେଳିଥିଲେ ସୌଦି। ତାଙ୍କୁ ମାତ୍ର ୩ ମ୍ୟାଚ୍ରେ ଖେଳିବାକୁ ସୁଯୋଗ ମିଳିଥିଲା, ଯେଉଁଥିରେ ସେ ମହଙ୍ଗା ସାବ୍ୟସ୍ତ ହୋଇଥିଲେ। ଆଇପିଏଲରେ ମୋଟ ୪୦ ମ୍ୟାଚ୍ ଖେଳିଥିବା ୩୨ ବର୍ଷୀୟ ଡାହାଣହାତୀ ପେସରଙ୍କ ନାମରେ ରହିଛି ୨୮ ଉଇକେଟ।