ବେଙ୍ଗାଲୁରୁ, ୨୨।୮: ଭାରତୀୟ କ୍ରିକେଟ୍ ଦଳର ଉଦୀୟମାନ ଖେଳାଳି ଲୋକେଶ ରାହୁଲ ନିଜର ମହାନତା ପାଇଁ ଏବେ ଚର୍ଚ୍ଚାର ପରିଧିରେ ରହିଛନ୍ତି। ଆଇପିଏଲ୍ରେ ଖେଳିବା ଲାଗି ୟୁଏଇ ଗସ୍ତ କରିବା ପୂର୍ବରୁ ରାହୁଲ ସେଣ୍ଟ୍ରାଲ ଇଣ୍ଡଷ୍ଟ୍ରିଆଲ ସିକ୍ୟୁରିଟି ଫୋର୍ସ (ସିଆଇଏସ୍ଏଫ୍) କର୍ମଚାରୀଙ୍କୁ ସହଯୋଗର ହାତ ବଢ଼ାଇଛନ୍ତି। ବେଙ୍ଗାଲୁରୁ ବିମାନ ବନ୍ଦରରେ ନିୟୋଜିତ ସିଆଇଏସ୍ଏଫ୍ କର୍ମଚାରୀଙ୍କୁ ଏହି ଡାହାଣହାତୀ ବ୍ୟାଟ୍ସମ୍ୟାନ ପିପିଇ କିଟ୍ ପ୍ରଦାନ କରିଛନ୍ତି। ଯାହା ଫଳରେ ରାହୁଲ ଏହି କର୍ମଚାରୀମାନଙ୍କୁ କରୋନା ମହାମାରୀ ସହିତ ମୁକାବିଲା କରିବରେ ସାହାଯ୍ୟ କରିଛନ୍ତି। ଆଇପିଏଲ୍ର ୧୩ତମ ସିଜନରେ କିଙ୍ଗ୍ସ ଇଲେଭେନ୍ ପଞ୍ଜାବର ଅଧିନାୟକ ନିଯୁକ୍ତ ହୋଇଥିବା ରାହୁଲ କହିଛନ୍ତି, ‘ସିଆଇଏସ୍ଏଫ୍ କର୍ମଚାରୀମାନେ ଆମକୁ ଦିନରାତି ସୁରକ୍ଷା ଦେଉଛନ୍ତି। ସେମାନେ ନିଜ ଜୀବନକୁ ବିପଦରେ ପକାଇଛନ୍ତି, ଯାହାଦ୍ୱାରା ଆମେ ଆରାମରେ ବଞ୍ଚିପାରୁଛେ। ଏହା କେବଳ ମୋର ନୁହେଁ ବରଂ ସେମାନଙ୍କୁ ନିରାପଦ ଓ ଆରାମଦାୟକ ଅନୁଭବ ଦେବା ଆମ ସମସ୍ତଙ୍କର ଦାୟିତ୍ୱ। ସେମାନଙ୍କ ଲାଗି ଏହା ମୋ ପକ୍ଷରୁ କରାଯାଇଥିବା ଏକ ଛୋଟିଆ ପ୍ରୟାସ।’ ଏଥିପୂର୍ବରୁ ରାହୁଲ ଥାଲାସେମିଆ ରୋଗୀଙ୍କୁ ସହାୟତା କରିବା ଲାଗି ନିଜର ଜର୍ସି ଓ କିଟ୍ ନିଲାମ କରିଥିଲେ।