ନୂଆଦିଲ୍ଲୀ,୨୨।୨: ଟିମ ଇଣ୍ଡିଆର ଓପନିଂ ବ୍ୟାଟ୍ସମ୍ୟାନ ଲୋକେଶ ରାହୁଲ ଏକ ମହାନ କାମ କରିଛନ୍ତି। ଏକ ବିରଳ ରୋଗରେ ଆକ୍ରାନ୍ତ ଥିବା ୧୧ ବର୍ଷୀୟ ବାଳକ ବରଦର ଅସ୍ତ୍ରୋପଚାର ପାଇଁ ରାହୁଲ ସହାୟତାର ହାତ ବଢ଼ାଇଛନ୍ତି। ବରଦ ଅପ୍ଲାଷ୍ଟିକ ଏନିମିଆ ଭଳି ବିରଳ ରୋଗରେ ଆକ୍ରାନ୍ତ ଥିଲେ। ଏହାର ଚିକିତ୍ସା ଲାଗି ତୁରନ୍ତ ବୋନ ମ୍ୟାରୋ ଟ୍ରାନ୍ସପ୍ଲାଣ୍ଟ (ବିଏମଟି)ର ଆବଶ୍ୟକ ଥିଲା। କିନ୍ତୁ ପରିବାର ପାଖରେ ସର୍ଜରୀ ପାଇଁ ଆବଶ୍ୟକ ୩୫ ଲକ୍ଷ ଟଙ୍କା ନ ଥିଲା। ଆଉ ଯେତେବେଳେ ରାହୁଲଙ୍କ କାନରେ ଏକଥା ପଡ଼ିଥିଲା ସେ ତୁରନ୍ତ ସର୍ଜରୀ ପାଇଁ ସହାୟତା କରିବାକୁ ଆଗେଇ ଆସିଥିଲେ।
ଗତବର୍ଷ ଡିସେମ୍ବରରେ ବରଦଙ୍କ ମାତା-ପିତା ଏକ ଏନଜିଓ ଜରିଆରେ ବୋନ ମ୍ୟାରୋ ଟ୍ରାନ୍ସପ୍ଲାଣ୍ଟ ପାଇଁ ଆବଶ୍ୟକ ୩୫ ଲକ୍ଷ ଟଙ୍କା ଫଣ୍ଡ ସଂଗ୍ରହ କରିବା ଆରମ୍ଭ କରିଥିଲେ। ପଞ୍ଚମ ଶ୍ରେଣୀରେ ପୁଥିବା ବରଦ ଗତବର୍ଷ ସେପ୍ଟେମ୍ବରରୁ ମୁମ୍ବାଇର ଜସଲୋକ ହସ୍ପିଟାଲରେ ଚିକିତ୍ସିତ ହୋଇ ଆସୁଥିଲେ। ବରଦଙ୍କ ରକ୍ତରେ ପ୍ଲେଟଲେଟର ସ୍ତର ବହୁତ କମ ଥିଲା। ଏହି କାରଣରୁ ତାଙ୍କର ଇମ୍ୟୁନିଟୀ ମଧ୍ୟ ହ୍ରାସ ପାଉଥିଲା ଏବଂ ସାଧାରଣ ଜ୍ୱର ଠିକ ହେବାକୁ ମାସେ ଲାଗିଯାଉଥିଲା। ବୋନ ମ୍ୟାରୋ ଟ୍ରାନ୍ସପ୍ଲାଣ୍ଟ ଦ୍ୱାରା ଏହାର ସ୍ଥାୟୀ ଉପଚାର ହୋଇପାରିବ। ଏହା ପରେ ପରିବାର ମଧ୍ୟବର୍ଗୀୟ ପରିବାର ହୋଇଥିବାରୁ ସେମାନଙ୍କୁ ସର୍ଜରୀ ପାଇଁ ଅର୍ଥ ସଂଗ୍ରହ କରିବାରେ ସମସ୍ୟା ହୋଇଥିଲା। ଯେତେବେଳେ ରାହୁଲ ଏହି ପିଲାଟି ବିଷୟରେ ଜାଣିବାକୁ ପାଇଲେ, ତୁରନ୍ତ ସହାୟତାର ହାତ ବଢ଼ାଇଥିଲେ। ରାହୁଲଙ୍କ ସହାୟତା ପରେ ବରଦଙ୍କ ସର୍ଜରୀ ମଧ୍ୟ ସଫଳ ହୋଇଛି। ଏବେ ବରଦ ସୁସ୍ଥ ହେଉଛନ୍ତି।
ଏନେଇ ରାହୁଲ ଖୁସିବ୍ୟକ୍ତ କରିବା ସହ ବରଦ ସୁସ୍ଥ ହୋଇ ନିଜର କ୍ରିକେଟର ହେବାର ସ୍ବପ୍ନକୁ ସାକାର କରନ୍ତୁ ବୋଲି କହିଛନ୍ତି। ସେହିଭଳି ରାହୁଲଙ୍କ ଏହି ମହାନ କାମ ପାଇଁ ବରଦଙ୍କ ମା’ ସ୍ବପ୍ନା ବହୁତ ଖୁସି ହୋଇଛନ୍ତି। ସେ ରାହୁଲଙ୍କ ନିକଟରେ କୃତଜ୍ଞତା ଜଣାଇଛନ୍ତି। ତାଙ୍କର ଏହି ସହାୟତାକୁ ସେ ଓ ତାଙ୍କ ପରିବାର କେବେବି ଭୁଲିପାରିବେ ନାହିଁ ବୋଲି କହିଛନ୍ତି।