ଦୁବାଇ,୫।୧: ସେଞ୍ଚୁରିଆନ ଟେଷ୍ଟର ବିଜୟ ପରେ ଭାରତୀୟ ଖେଳାଳିଙ୍କ ମାନ୍ୟତାରେ ଉଲ୍ଲେଖନୀୟ ପରିବର୍ତ୍ତନ ହୋଇଛି। ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟେଷ୍ଟରେ ୧୨୩ ରନ୍ ଇନିଂସ ଯୋଗୁ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ ହୋଇଥିବା ରାହୁଲ। ସେ ପୂର୍ବ ଅପେକ୍ଷା ୧୮ଟି ସୋପାନ ଉପରକୁ ଉଠି ୧୩ ତମ ମାନ୍ୟତା ହାସଲ କରିଛନ୍ତି। ସଦ୍ୟ ପ୍ରକାଶିତ ଆଇସିସି ଟେଷ୍ଟ ଖେଳାଳିଙ୍କ ର଼୍ୟାଙ୍କିଙ୍ଗ୍ରେ ଏହା ଦର୍ଶାଯାଇଛି।
ସେଞ୍ଚୁରିଆନ ଟେଷ୍ଟରେ ରାହୁଲଙ୍କ ସହ ମିଶି ଓପନିଂ ଉଇକେଟ ପାଇଁ ୧୧୭ ରନ୍ ଯୋଡ଼ିଥିଲେ ମୟଙ୍କ ଅଗ୍ରଓ୍ବାଲ। ଏହି ଭାଗୀଦାରି ଅବସରରେ ମୟଙ୍କ ୬୦ ରନ୍ର ଅର୍ଦ୍ଧଶତକୀ ପାଳି ଖେଳିଥିଲେ। ସେ ପୂର୍ବ ଅପେକ୍ଷା ଗୋଟିଏ ସ୍ଥାନ ଉପରକୁ ଉଠିଥିବା ବେଳେ ଦୁଇଟି ସୋପାନ ଡେଇଁ ୨୫ତମ ସ୍ଥାନରେ ପହଞ୍ଚିଛନ୍ତି ଅଜିଙ୍କ୍ୟ ରାହାନେ।
ଭାରତୀୟ ପେସରଙ୍କ ମଧ୍ୟରେ ଯଶପ୍ରୀତ ବୁମରା ଓ ମହମ୍ମଦ ଶାମିଙ୍କ ମାନ୍ୟତା ମଧ୍ୟରେ ଉନ୍ନତି ଆସିଛି। ବୁମରା ୩ ସ୍ଥାନ ଉପରକୁ ଉଠି ୯ମ ସ୍ଥାନ ଅଧିକାର କରିଛନ୍ତି। ତାଙ୍କ ଭଳି ଶାମି ହାସଲ କରିଛନ୍ତି ୧୭ତମ ମାନ୍ୟତା। ସେ ପୂର୍ବରୁ ୧୯ତମ ସ୍ଥାନରେ ଥିଲେ।