ସେଞ୍ଚୁରିଅନ,୨୭।୧୨: ସେଞ୍ଚୁରିଅନ ଗ୍ରାଉଣ୍ଡରେ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ପ୍ରଥମ ଟେଷ୍ଟ ମ୍ୟାଚ ଖେଳାଯାଉଛି। ଏହି ଟେଷ୍ଟ ମ୍ୟାଚର ପ୍ରଥମ ଦିନରେ ଟିମ ଇଣ୍ଡିଆ ୨୪୫ ରନ୍ରେ ଅଲଆଉଟ୍ ହୋଇଛି। ଏହି ମ୍ୟାଚ୍ରେ ଭାରତର ସଙ୍କଟମୋଚକ ସାଜିଛନ୍ତି କେ.ଏଲ ରାହୁଲ। ସେ ୧୩୭ ବଲ୍ରେ ୧୦୧ ରନ୍ କରିଥିଲେ। କେ.ଏଲ ରାହୁଲଙ୍କ ଏହି ଇନିଂସ ଟିମ ଇଣ୍ଡିଆକୁ ଅସୁବିଧାରୁ ରକ୍ଷା କରିଥିଲା। କାରଣ ଏକ ସମୟରେ ଦଳର ସ୍କୋର ୧୨୧ ରନରେ ୬ ଉଇକେଟ୍ ହରାଇଥିଲା। ରାହୁଲଙ୍କ ଶତକ ଯୋଗୁ ଦଳ ୨୪୫ ରନ୍ ପର୍ଯ୍ୟନ୍ତ ଯାଇପାରିଥିଲା।
ଟିମ ଇଣ୍ଡିଆର ବହୁ ପୂର୍ବତନ କ୍ରିକେଟର ତାଙ୍କୁ ପ୍ରଶଂସା କରିଛନ୍ତି। ଟିମ ଇଣ୍ଡିଆର ବ୍ୟାଟିଂ କୋଚ ବିକ୍ରମ ରାଠୋର କହିଛନ୍ତି, ରାହୁଲ ପ୍ରତ୍ୟେକ ଥର, କଠିନ ପରିସ୍ଥିତିରେ ସେ ଆମକୁ ଭଲ ଭାବରେ ପରିଚାଳନା କରନ୍ତି। ସେ ବିଶେଷ କିଛି କରନ୍ତି ନାହିଁ, ଯୋଜନା ଅନୁସାରେ ଖେଳନ୍ତି। ସେ ଖରାପ ବଲକୁ ରକ୍ଷା କରି ସଠିକ ବଲ ଉପରେ ଆକ୍ରମଣ କରନ୍ତି।
ପୂର୍ବତନ ଭାରତୀୟ କ୍ରିକେଟର ସଞ୍ଜୟ ମଞ୍ଜରେକର କହିଛନ୍ତ, କେଏଲ ରାହୁଲଙ୍କ ପାଇଁ ଏହି ବର୍ଷ ଚମତ୍କାର ରହିଛି। ତାଙ୍କର ଚିନ୍ତାଧାରା ଟିକିଏ ଅଲଗା ଅଟେ। ଏସିଆ କପ୍ରେ ଫେରିବା ପରେ ସେ ପୂର୍ବ ଅପେକ୍ଷା ଅଧିକ ଆକ୍ରମଣାତ୍ମକ ହୋଇଯାଇଛନ୍ତି ଏବଂ ବିଶ୍ୱକପ୍ରେ ଉଭୟ ବ୍ୟାଟିଂ ଏବଂ ଉଇକେଟ ରକ୍ଷଣରେ ଚମତ୍କାର ପ୍ରଦର୍ଶନ କରିଥିଲେ।
ଟିମ ଇଣ୍ଡିଆର ପୂର୍ବତନ କୋଚ ତଥା ସମୀକ୍ଷକ ରବି ଶାସ୍ତ୍ରୀ କହିଛନ୍ତି, ସେ ବ୍ୟାଟିଂକୁ ସହଜ କରିଛନ୍ତି। ସେ ସନ୍ତୁଳନ ରକ୍ଷା କରି ଖେଲୁଛନ୍ତି। ଟିମ ଇଣ୍ଡିଆର ପୂର୍ବତନ ଅଧିନାୟକ ତଥା ଭେଟେରାନ ବ୍ୟାଟ୍ସମ୍ୟାନ ସୁନୀଲ ଗାଭାସ୍କର ମଧ୍ୟ କେ.ଏଲ ରାହୁଲଙ୍କୁ ପ୍ରଶଂସା କରି କହିଛନ୍ତି, ଆମେ ତାଙ୍କ ପ୍ରତିଭା ବିଷୟରେ ବହୁ ଦିନରୁ ଜାଣିଛୁ, କିନ୍ତୁ ଗତ ଆଠ, ନଅ ମାସ ମଧ୍ୟରେ ଆମେ ଏହା ଦେଖିଛୁ। ଦେଖାଯାଉଛି।
