ଦୁବାଇ, ୨୫।୯: ଆଇପିଏଲ୍ରେ ଗୁରୁବାର ଖେଳାଯାଇଥିବା ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିପକ୍ଷ ମ୍ୟାଚ୍ରେ କିଙ୍ଗ୍ସ ଇଲେଭେନ ପଞ୍ଜାବ ୯୭ ରନର ବୃହତ୍ ବ୍ୟବଧାନରେ ବିଜୟ ହାସଲ କରିଥିଲା। ଏହି ମ୍ୟାଚ୍ରେ ପଞ୍ଜାବର ଅଧିନାୟକ ଲୋକେଶ ରାହୁଲ ମାତ୍ର ୬୯ ବଲରୁ ୧୩୨ ରନର ମାରାଥନ ଶତକୀୟ ଇନିଂସ ଖେଳି ଦଳୀୟ ବିଜୟରେ ନାୟକ ସାଜିଥିଲେ। ଏଥିସହ ରାହୁଲ ପ୍ରଥମ ଭାରତୀୟ ବ୍ୟାଟ୍ସମ୍ୟାନ ଭାବେ ଟି୨୦ କ୍ରିକେଟ୍ରେ ୪ଟି ଭିନ୍ନ ଦେଶରେ ଶତକ ହାସଲ କରିବାର କୀର୍ତ୍ତିମାନ ହାସଲ କରିଛନ୍ତି। ୟୁଏଇରେ ଶତକ ହାସଲ କରିବାର ପୂର୍ବରୁ ରାହୁଲ ଆମେରିକା, ଇଂଲଣ୍ଡ ଓ ଭାରତରେ ମଧ୍ୟ ଟି୨୦ କ୍ରିକେଟ୍ରେ ଶତକ ମାରି ସାରିଛନ୍ତି। ଟି୨୦ କ୍ରିକେଟ୍ରେ ସର୍ବାଧିକ ଦେଶରେ ଶତକ ହାସଲ କରିବାର ରେକର୍ଡ କ୍ରିସ୍ ଗେଲ୍ (୭ଟି)ଙ୍କ ନାମରେ ରହିଛି। ରାହୁଲ ଓଭର୍ଅଲ୍ ଟି୨୦ କ୍ରିକେଟ୍ରେ ୪ ଶତକ ହାସଲ କରିଛନ୍ତି। ଭାରତୀୟ ବ୍ୟାଟ୍ସମ୍ୟାନ ଭାବେ ରୋହିତ୍ ଶର୍ମା (୬) ଓ ବିରାଟ କୋହଲି (୫) ଏହି ତାଲିକାରେ ପ୍ରଥମ ଓ ୨ୟ ସ୍ଥାନରେ ରହିଛନ୍ତି।