ପର୍ଲ,୧୯।୧: ବୁଧବାରଠାରୁ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ତିନି ମ୍ୟାଚ୍ ବିଶିଷ୍ଟ ସିରିଜ୍ର ପ୍ରଥମ ମୁକାବିଲା ଖେଳାଯିବ। ଏଥିରେ ଜଣେ ଅଧିନାୟକ ଭାବେ ନୁହେଁ, ବରଂ ଜଣେ ବ୍ୟାଟର ଭାବେ ପଡ଼ିଆକୁ ଓହ୍ଲାଇବେ ବିରାଟ କୋହଲି। ଲୋକେଶ ରାହୁଲଙ୍କ ଅଧିନାୟକତ୍ୱରେ ସେ ଖେଳିବେ। ଏଣୁ ସମସ୍ତଙ୍କ ନଜର ତାଙ୍କ ଉପରେ ରହିବ। ତେବେ ମ୍ୟାଚର ଅବ୍ୟବହିତ ପୂର୍ବରୁ କୋହଲିଙ୍କ ଅଧିନାୟକତ୍ୱକୁ ନେଇ ରାହୁଲ ବଡ଼ ବୟାନ ଦେଇଛନ୍ତି।
କୋହଲିଙ୍କ ନେତୃତ୍ୱରେ ଭାରତୀୟ ଦଳ ବଡ଼ ସଫଳତା ହାସଲ କରିଛି। ପୂର୍ବରୁ ଆମେ ଭାରତ ବାହାରେ ସିରିଜ ଜିତୁ ନ ଥିଲୁ। ହେଲେ କୋହଲିଙ୍କ ସମୟରେ ଆମେ ପ୍ରତ୍ୟେକ ଦେଶ ଯାଇଥିଲୁ, ସେଠାରେ ସିରିଜ ଜିତିଥିଲୁ। ଆମେ ବହୁତ ଭଲ ଖେଳିଥିଲୁ, ଯାହା ଭାରତୀୟ ଦଳ ପାଇଁ ନୂତନ ମାନଦଣ୍ଡ ସ୍ଥିର କରିଛି। କୋହଲି ଯେଉଁ ସାମ୍ରାଜ୍ୟ ଗଢ଼ିଛନ୍ତି, ଦଳ ତାକୁ ଆଗକୁ ନେବାକୁ ଚେଷ୍ଟା କରିବ। ଆମେ ଜାଣୁ ଚାମ୍ପିୟନ ଦଳ ହେବା ଲାଗି ଆମକୁ କ’ଣ କରିବାକୁ ହେବ। ଏଥିଲାଗି ଜଣେ ଖେଳାଳି ଭାବେ ଉନ୍ନତି ଜାରି ରଖିବା, ଯଥାସମ୍ଭବ ଶୃଙ୍ଖଳିତ ଏବଂ ସ୍ଥିର ରହିବା, ବିଶେଷକରି ଖେଳକୁ ଉପଭୋଗ କରିବା ଜରୁରୀ ବୋଲି ସେ କହିଛନ୍ତି।
ରାହୁଲ କହିଛନ୍ତି, ସାଥୀ ଖେଳାଳିଙ୍କଠାରୁ ସର୍ବଶ୍ରେଷ୍ଠ ପ୍ରଦର୍ଶନ ପାଇବା ଲାଗି କୋହଲିଙ୍କୁ ଅନୁକରଣ କରିବେ। କାରଣ ଯେତେବେଳେ ନେତୃତ୍ୱ କଥା ଆସେ, ପ୍ରତ୍ୟେକ ଖେଳାଳିଠାରୁ ସର୍ବଶ୍ରେଷ୍ଠ ପ୍ରଦର୍ଶନ ପାଇବା ଲାଗି ବିରାଟଙ୍କର ଏକ ଚମତ୍କାର ଦକ୍ଷତା ଥିଲା। ସେ ସମସ୍ତଙ୍କୁ ଉତ୍ସାହିତ କରୁଥିଲେ। ଏହା ମୁଁ ତାଙ୍କଠାରୁ ଶିଖିଛି। ଆଶା କରେ ଦଳସହ ସେଭଳି କରିବି।