ଯୋଡ଼ା, ,୨୧।୬ (ଡି.ଏନ.ଏ.) କେନ୍ଦୁଝର ଜିଲା ଯୋଡ଼ା ସହରରେ ରବିବାର ମୌସୁମୀର ପ୍ରଥମ ବର୍ଷା ହୋଇଛି। ଫଳରେ ଲୋକେ ପ୍ରବଳ ଗରମରୁ ତ୍ରାହି ପାଇଥିବା ବେଳେ ଏହି ପହିଲି ବର୍ଷା ଯୋଡା ସହରବାସୀଙ୍କୁ ବେହାଲ କରିଦେଇଛି। ଯୋଡ଼ା ସହରରେ ଜଳ ନିଷ୍କାସନ ବ୍ୟବସ୍ଥା ନ ଥିବା ବେଳେ ଅଧିକାଂଶ ସ୍ଥାନରେ ଏହି ବର୍ଷା ଜଳ ଜମା ହୋଇ ହୋଇ ସାଧାରଣ ଲୋକଙ୍କୁ ଅସ୍ତବ୍ୟସ୍ତ କରିଦେଇଛି। ଯୋଡା ବସ୍ତି ଠାରୁ ବାହାରିଥିବା ମୁଖ୍ୟ ଡ୍ରେନଟି ଯୋଡା ବଜାର ଦେଇ ରାଧାକୃଷ୍ଣ ମନ୍ଦିର ନିଟକରେ ସୁନା ନଦୀରେ ମିଶିଥିବା ବେଳେ ବର୍ଷା ପୂର୍ବରୁ ଏହାର ସଫେଇ କାର୍ଯ୍ୟ କରାଯାଇ ନ ଥିବାରୁ ବର୍ଷା ଜଳ ରାସ୍ତା ଉପରେ ଆଣ୍ଠୁଏ ପାଣି ପ୍ରବାହିତ ହେଉଥିବା ଦେଖିବାକୁ ମିଳିଛି। ଏହି ଡ୍ରେନ୍ ଉପରେ ଢଳେଇ ସ୍ଲାବ ପକାଯାଇଥିବା ବେଳେ ଏହା ରାସ୍ତା ଠାରୁ ଏକ ଫୁଟ ଉଚ୍ଚରେ ଥିବାରୁ ରାସ୍ତାର ବର୍ଷା ଜଳ ମଧ୍ୟ ଏହି ଡ୍ରେନ୍ରେ ପ୍ରବାହିତ ହୋଇପାରୁ ନ ଥିବା ଦେଖିବାକୁ ମିଳିଛି। ସେହିପରି ପାଇପ୍ ଲାଇନ୍ ଖୋଲା ପାଣି ଜମିବାରେ ଆଉ ଏକ ପ୍ରମୁଖ କାରଣ ସାଜିଛି।
ଯୋଡା ବଜାରକୁ ଯାଇଥିବା ମୁଖ୍ୟ ପୋଲ ଉପରେ ଜଳ ନିଷ୍କାସନ ହୋଇନପାରି ଆଣ୍ଠୁଏ ପାଣି ଜମି ରହି ଥିବାରୁ ଲୋକେ ଯାତାୟାତରେ ବହୁ ଅସୁବିଧାର ସମ୍ମୁଖୀନ ହୋଇଛନ୍ତି। ଯୋଡା ସହର ମଧ୍ୟ ଦେଇ ଫ୍ଲାଏ ଓଭର ନିର୍ମାଣ କାର୍ଯ୍ୟ ଚାଲୁଥିବା ବେଳେ ବିଭିନ୍ନ ସ୍ଥାନରେ ମାଟି ଗଦା ହୋଇ ଜଳ ନିଷ୍କାସନ ହେବାରେ ବାଧକ ସାଜିଛି । ଏହା ସହିତ ରାସ୍ତା କଡ଼ରେ ପାଇପ ଲାଇନ ଖୋଳା ଯାଉଥିବାରୁ ବର୍ଷା ଜଳ ନିଷ୍କାସନ ହୋଇ ନ ପାରି ଜମି ରହିଛି। ଫଳରେ କାଦୁଅ ପଙ୍କରେ ରାସ୍ତା ପରିପୂର୍ଣ୍ଣ ରହୁଥିବାରୁ ଟ୍ରାଫିକ ସମସ୍ୟା ସୃଷ୍ଟି ହେଉଛି। ଏହି ଅସରାଏ ବର୍ଷାରେ ଆଇଡିବିଆଇ ବ୍ୟାଙ୍କ ନିକଟରୁ ଗୋପମହାନ୍ତି ହଟିଂ ପର୍ଯ୍ୟନ୍ତ ଜଳ ନିଷ୍କାସନ ହୋଇ ନ ପାରି କୃତ୍ରିମ ବନ୍ୟା ସୃଷ୍ଟି ହୋଇଥିବା ଦେଖିବାକୁ ମିଳିଛି। ଲାକଙ୍କ ଅଭିଯୋଗକ୍ରମେ ଯୋଡ଼ା ପୋରଧ୍ୟକ୍ଷ ଡ଼ାକ୍ତର ଜଗଦିଶ ପ୍ରସାଦ ସାହୁ ଘଟଣା ସ୍ଥଳରେ ପହଞ୍ଚି ଜେସିବି ସାହାଯ୍ୟରେ ଅସ୍ଥାୟୀ ଭାବେ ଏହି ଜଳ ନିଷ୍କାସନର ବ୍ୟବସ୍ଥା କରିଛନ୍ତି। ଯୋଡା ପୌରାଞ୍ଚଳରେ ଥିବା ଡ୍ରେନ ଗୁଡିକର ସଫେଇ କାର୍ଯ୍ୟ କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି।