ପ୍ୟାରିସ,୧୩।୧୦: ଫ୍ରାନ୍ସରେ ଏକ ଆତଙ୍କବାଦୀ ଆକ୍ରମଣ ହୋଇଥିବା ଆଶଙ୍କା କରାଯାଉଛି। ଉତ୍ତର ଫ୍ରାନ୍ସର ଏକ ସ୍କୁଲରେ ଆକ୍ରମଣ ଯୋଗୁ ଜଣେ ଶିକ୍ଷକଙ୍କ ମୃତ୍ୟୁ ଘଟିଥିବା ବେଳେ ୨ ଆହତ ହୋଇଛନ୍ତି। ଅଭିଯୁକ୍ତ ସମସ୍ତଙ୍କୁ ଛୁରୀରେ ଆକ୍ରମଣ କରିଥିବା ଜଣାପଡ଼ିଛି। ଇସ୍ରାଏଲ ଏବଂ ହମାସ ମଧ୍ୟରେ ଯୁଦ୍ଧ ମଧ୍ୟରେ ଏଭଳି ଆକ୍ରମଣ ସହ ଆତଙ୍କବାଦୀ ଲିଙ୍କକୁ ନେଇ ଯାଞ୍ଚ କରାଯାଉଛି। ତେବେ ଅଭିଯୁକ୍ତଙ୍କୁ ଗିରଫ କରାଯାଇଛି।
ଉତ୍ତର ପ୍ୟାରିସର ପ୍ରାୟ ୧୮୫କିମି ଦୂର ଅର୍ରୋସ ସହରର ଗୈମ୍ବେଟା ହାଇସ୍କୁଲରେ ଘଟିଥିବା ଏହି ଆକ୍ରମଣର ଯାଞ୍ଚ କରାଯାଉଛି ବୋଲି ଫ୍ରାନ୍ସର ଆତଙ୍କବାଦ ବିରୋଧୀ ଟିମ୍ କହିଛି। ଘଟଣାସ୍ଥଳରେ ପୋଲିସ ପହଞ୍ଚିବା ପରେ ସେ ଆରବ ଭାଷାରେ ‘ଆଲ୍ଲାହୁ ଆକବର’ ସ୍ଲୋଗାନ୍ ଦେଉଥିଲେ। ଏଣୁ ତାଙ୍କର ଆତଙ୍କବାଦ ସହ କିଛି ସମ୍ପର୍କ ଅଛି କି ନାହିଁ ତାର ଯାଞ୍ଚ କରାଯାଉଥିବା ଟିମ୍ କହିଛି।
