ମସ୍କୋ,୧୨।୮: ସାରା ବିଶ୍ୱରେ ଲୋକଙ୍କ ଜୀବନ ନେଇଚାଲିଥିବା ମହାମାରୀ କରୋନାର ପ୍ରଥମ ଟିକା ରୁଷିଆ ଉଦ୍ଭାବନ କରିଛି। ମଙ୍ଗଳବାର ସକାଳେ ‘ସ୍ଫୁଟନିକ ଭି’ ଭାକ୍ସିନ୍କୁ ମଞ୍ଜୁରୀ ନିଆଯାଇଥିବା ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ଘୋଷଣା କରିଥିଲେ। ତେବେ ଏହି ଟିକା ତାଙ୍କର ଜଣେ ଝିଅଙ୍କଠାରେ ପ୍ରୟୋଗ କରାଯାଇଛି। ଟେଷ୍ଟିଂରେ ଭାଗନେଇଥିବା ଝିଅ ଦ୍ୱିତୀୟ ଥର ଟିକା ନେଇଥିବାବେଳେ ତାଙ୍କୁ ସାମାନ୍ୟ ଜ୍ୱର ହୋଇଥିଲା। ତାଙ୍କ ଶରୀରରେ ଆଣ୍ଟିବଡି ମାତ୍ରା ବଢ଼ିଯାଇଥିବାରୁ ସେ ଏବେ ସୁସ୍ଥ ଥିବା ଜଣାପଡ଼ିଛି। ତେବେ ରାଷ୍ଟ୍ରପତି ପୁଟିନଙ୍କର ୨ ଝିଅ ଥିବାବେଳେ ସେ କାହାକୁ ଏହି ଟିକା ଦେଇଛନ୍ତି ତାହା ବର୍ତ୍ତମାନ ପର୍ଯ୍ୟନ୍ତ ଜଣାପଡ଼ି ନାହିଁ।
ରାଷ୍ଟ୍ରପତି ପୁଟିନଙ୍କ ପରିବାର ସବୁବେଳେ ଲାଇମ୍ଲାଇଟ୍ଠାରୁ ଦୂରେଇ ରହିଥାନ୍ତି। ତାଙ୍କର ୨ ଝିଅଙ୍କ ନାମ ମାରିୟା ଏବଂ କ୍ୟାଟ୍ରିନା। ବଡ଼ ଝିଅ ମାରିୟା ମେଡିକାଲ ରିସର୍ଚ୍ଚ ଆଣ୍ଡ୍ ଏଜୁକେଶନ ସେକ୍ଟରରେ କାମ କରନ୍ତି। ସେ ନେଦରଲ୍ୟାଣ୍ଡର ଜଣେ ବ୍ୟବସାୟୀଙ୍କୁ ବିବାହ କରିବା ପରଠାରୁ ସେଠାରେ ହିଁ ସ୍ବାମୀଙ୍କ ସହ ରହୁଛନ୍ତି। ମାରିୟାଙ୍କୁ ପରିବାର ଲୋକେ ମାଶା ବୋଲି ଡାକିଥାନ୍ତି। କୁହାଯାଏ ପୁତିନଙ୍କ ମା’ଙ୍କ ନାମ ମାଶା ଥିଲା, ତେଣୁ ସେ ନିଜର ବଡ଼ ଝିଅକୁ ଗେହ୍ଲାରେ ମା’ଙ୍କ ନାମରେ ଡାକିଥାନ୍ତି।
ସେହିପରି ପୁଟିନଙ୍କ ସାନ ଝିଅ କ୍ୟାଟ୍ରିନାଙ୍କ ବୟସ ୩୩। ସେ ରୁଷ୍ରେ ଆର୍ଟିଫିଶିଆଲ ଇଣ୍ଟେଲିଜେନ୍ସି ଇନିସିଏଟିଭ୍ରେ କାମ କରୁଛନ୍ତି। କ୍ୟାଟ୍ରିନାଙ୍କର ନୃତ୍ୟପ୍ରତି ଦୁର୍ବଳତା ରହିଛି। ଏହା ବ୍ୟତୀତ ସେ ପଢ଼ିବା ସମୟରେ ମସ୍କୋ ଷ୍ଟେଟ୍ ୟୁନିଭର୍ସିଟିରେ ଶୀର୍ଷ ସ୍ଥାନରେ ରହିଥିଲେ। ତେବେ କରୋନା ଟିକା ରାଷ୍ଟ୍ରପତିଙ୍କ ଝିଅ ଉପରେ ପ୍ରୟୋଗ କରାଯିବା ପରଠାରୁ ସେମାନେ ଆଲୋଚନାକୁ ଆସିଛନ୍ତି।