ଲାଫିଙ୍ଗ୍ ବୁଦ୍ଧଙ୍କୁ ଖୁସି ଓ ସମୃଦ୍ଧିର ପ୍ରତୀକ ବୋଲି କୁହାଯାଏ। ସେଥିପାଇଁ ଘରେ ତାଙ୍କର ମୂର୍ତ୍ତି ରଖିଲେ ପରିବାରରେ ସୁଖଶାନ୍ତି ବୃଦ୍ଧି ପାଇବା ସହ ନକାରାତ୍ମକ ଶକ୍ତିର ବିନାଶ ହୋଇଥାଏ ବୋଲି ବିଶ୍ୱାସ କରାଯାଏ। କିନ୍ତୁ ଲାଫିଙ୍ଗ୍ ବୁଦ୍ଧଙ୍କ ମୂର୍ତ୍ତିକୁ ଘରେ ଯେଉଁଠି ନାହିଁ ସେଇଠି ରଖିବା ଠିକ୍ ନୁହେଁ। ମାନ୍ୟତା ରହିଛି ଯେ, ଘରର ମୁଖ୍ୟଦ୍ୱାର ସମ୍ମୁଖରେ ଲାଫିଙ୍ଗ୍ ବୁଦ୍ଧଙ୍କ ମୂର୍ତ୍ତି ରଖିବା ସବୁଠୁ ଶୁଭ ହୋଇଥାଏ। ଆବଶ୍ୟକ କ୍ଷେତ୍ରରେ ଏହି ମୂର୍ତ୍ତିକୁ ଘରର ପୂର୍ବ ଦିଗରେ ରଖିପାରିବେ, କିନ୍ତୁ ଭୁଲ୍ରେ ବି ଦକ୍ଷିଣ ଦିଗରେ ରଖିବେ ନାହିଁ। ସେହିପରି ଏହି ମୂର୍ତ୍ତିକୁ କେବେ ବି ତଳେ ରଖିବେ ନାହିଁ, ଟିକେ ଉଚ୍ଚ ସ୍ଥାନରେ ରଖିବେ। ରୋଷେଇଘର, ପୂଜାଘର, ଡାଇନିଂ ଟେବୁଲ କିମ୍ବା ପାଇଖାନା ଘର ନିକଟରେ ଏହି ମୂର୍ତ୍ତିକୁ ରଖିବା ଆଦୌ ଠିକ୍ ନୁହେଁ। ପିଲାଙ୍କର ପଢ଼ାରେ ମନ ଲଗାଇବା ପାଇଁ ଏହି ମୂର୍ତ୍ତିକୁ ଷ୍ଟଡି ଟେବୁଲ ଉପରେ କିନ୍ତୁ ରଖିପାରିବେ। ସେହିପରି ପତିପତ୍ନୀଙ୍କ ଭିତରେ ସମ୍ପର୍କକୁ ଦୃଢ଼ କରିବା ପାଇଁ ଏହି ମୂର୍ତ୍ତିକୁ ବେଡ୍ରୁମ୍ରେ ବି ରଖାଯାଇପାରେ। ତେବେ ଧ୍ୟାନ ଦେବେ, ଘରେ କେବେ ବି ୧୨ ଇଞ୍ଚରୁ ଅଧିକ ଉଚ୍ଚର ଲାଫିଙ୍ଗ୍ ବୁଦ୍ଧଙ୍କ ମୂର୍ତ୍ତି ରଖିବେ ନାହିଁ; ନଚେତ୍ ଏହା ଶୁଭଫଳ ପରିବର୍ତ୍ତେ ଅନେକ ସମସ୍ୟା ସୃଷ୍ଟି କରିଥାଏ।
