ଅଯୋଧ୍ୟା, ୫।୮: ୫ ଅଗଷ୍ଟ ୨୦୨୦ରେ ପ୍ରଭୁ ଶ୍ରୀ ରାମଙ୍କ ଜନ୍ମଭୂମିରେ ଏକ ନୂଆ ଇତିହାସ ଲେଖା ହୋଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାମ ମନ୍ଦିର ନିର୍ମାଣ ଲାଗି ଭୂମି ପୂଜନ ସହ ଶିଳାନ୍ୟାସ କରିଛନ୍ତି। ଏହି ଅବସରରେ ନିର୍ଦ୍ଧାରିତ ମୁହୂର୍ତ୍ତରେ ଅଷ୍ଟ ଉପଶିଳା ସମେତ ମୁଖ୍ୟ କୁର୍ମ ଶିଳା ସ୍ଥାପନ କରିଥିଲେ। ଯଜମାନ ରୂପେ ପ୍ରଧାନମନ୍ତ୍ରୀ ୪୦ ମିନିଟ୍ ଧରି ରୀତିନୀତିର ସହିତ ଭୂମି ପୂଜାରେ ବସିଥିଲେ। ରାମ ଜନ୍ମଭୂମିରେ ବହୁପ୍ରତୀକ୍ଷିତ ମନ୍ଦିର ନିର୍ମାଣ ଲାଗି ଭୂମି ପୂଜନ ପରେ ସମସ୍ତ ବୈଦିକ ଆଚାର୍ଯ୍ୟ ଯଜମାନରୂପୀ ପ୍ରଧାନମନ୍ତ୍ରୀଙ୍କୁ ମନ୍ତ୍ରାତ୍ମକ ଆଶୀର୍ବାଦ ପ୍ରଦାନ କରିଥିଲେ। ବୈଦିକ ଆଚାର୍ଯ୍ୟମାନେ କହିଥିଲେ, ଯଜ୍ଞ ପୁରୁଷ ଏବଂ ଦକ୍ଷିଣା ନାରୀ ହୋଇଥାଏ। ଏହି ଦୁଇଜଣଙ୍କ ମିଳନରେ ଫଳ ପ୍ରାପ୍ତି ହୋଇଥାଏ। ପ୍ରଧାନମନ୍ତ୍ରୀଙ୍କ ଭଳି ଯଜମାନ ପ୍ରାପ୍ତ ହେବା ସାମାନ୍ୟ କଥା ନୁହେଁ। ବୈଦିକ ଆଚାର୍ଯ୍ୟଙ୍କ ଏହି କଥାରେ ହସୁଥିବାବେଳେ ମୋଦି ଗୁପ୍ତ ଦକ୍ଷିଣା ପ୍ରଦାନ କରିଥିଲେ। କରୋନାକୁ ଦୃଷ୍ଟିରେ ରଖି ଯଜମାନ ମୋଦି ଓ ପୂଜା କରୁଥିବା ପୁରୋହିତଙ୍କ ମଧ୍ୟରେ ସାମାଜିକ ଦୂରତାକୁ ବେଶ୍ ଧ୍ୟାନ ଦିଆଯାଇଥିଲା। ଭୂମି ପୂଜନ ଲାଗି ଚନ୍ଦ୍ରଭାନୁ ପାଣ୍ଡେ ମୁଖ୍ୟ ପୁରୋହିତ ଥିଲେ। ଯଜମାନଙ୍କଠାରୁ କେତେ ଦକ୍ଷିଣା ମିଳିଥାଏ ତାହା କୁହାଯାଇ ନ ଥାଏ ବୋଲି ପୁରୋହିତ କହିଥିଲେ।
