୧୮ତମ ଲୋକ ସଭାର ପ୍ରଥମ ଅଧିବେଶନ ଆରମ୍ଭ ହୋଇଛି। ଏଥିସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଅନ୍ୟ ସଦସ୍ୟମାନେ ଶପଥ ନେଇଛନ୍ତି। କାମଚଳା ବାଚସ୍ପତି ଭର୍ତ୍ତୃହରି ମହତାବ ଏମ୍ପିମାନଙ୍କୁ ଶପଥ ପାଠ କରାଇଛନ୍ତି। ତେବେ ଜୁନ ୨୪ରୁ ଆରମ୍ଭ ହୋଇଥିବା ସଂସଦ ଜୁଲାଇ ୩ ଯାଏ ଚାଲିବ। ଏସବୁ ମଧ୍ୟରେ ଲୋକମାନଙ୍କ ମନରେ ପ୍ରଶ୍ନ ରହିଛି ଯେ ଏମ୍ପିମାନଙ୍କୁ କ’ଣ କ’ଣ ସୁବିଧା ମିଳିଥାଏ? ସେମାନଙ୍କର ଦରମା କେତେ? କ’ଣ ସେମାନେ ବି ଟିକସ ଦେଇଥାନ୍ତି ? ଇତ୍ୟାଦି…
ଏମ୍ପିଙ୍କ ଦରମା କେତେ?
ସଂସଦର ଅଧିବେଶନରେ ଭାଗ ନେଲେ ଏମ୍ପିମାନଙ୍କୁ ଦୈନିକ ପାଉଣା ମିଳିଥାଏ। ସଦସ୍ୟ ଭାବେ(ବେତନ,ଭତ୍ତା,ପେନସନ) ଅଧିନିୟମ୧୯୫୪ ମୁତାବକ ଏମ୍ପିଙ୍କୁ ଦରମା ଏବଂ ଅନ୍ୟ ସୁବିଧା ମିଳିଥାଏ। କେବଳ ଦରମା କଥା କହିଲେ ଏମ୍ପିମାନଙ୍କୁ ମାସକୁ ୧ ଲକ୍ଷ ଟଙ୍କା ମିଳିଥାଏ। ଏହାଛଡ଼ା ବିଭିନ୍ନ ପ୍ରକାର ଭତ୍ତା ଏବଂ ପେନସନ ସୁବିଧା ମିଳିଥାଏ।
ଦରମା ବୃଦ୍ଧିର ନିୟମ:
ପ୍ରତି ୫ ବର୍ଷ ପରେ ଏମ୍ପିମାନଙ୍କ ଦରମା ଏବଂ ଦୈନିକ ଭତ୍ତା ବୃଦ୍ଧି ପାଇପାରେ। ଏପ୍ରିଲ ୧, ୨୦୨୩ଠାରୁ ଲାଗୁ ହୋଇଥିବା ନିୟମ ମୁତାବକ ଏମ୍ପିଙ୍କ ଦରମା ଏବଂ ଦୈନିକ ଭତ୍ତା ପ୍ରତି ୫ ବର୍ଷରେ ବୃଦ୍ଧି ପାଇବାର ପ୍ରାବଧାନ ରହିଛି। ଏମ୍ପିଙ୍କୁ କାର୍ଯ୍ୟାଳୟ ଖର୍ଚ୍ଚ ଏବଂ ନିର୍ବାଚନମଣ୍ଡଳୀର ଭତ୍ତା ମଧ୍ୟ ମିଳିଥାଏ। ଏହାଛଡ଼ା ଟେଲିଫୋନ୍,ଇଣ୍ଟରନେଟ୍ ଏବଂ ଚିକିତ୍ସା ସୁବିଧା ମିଳିଥାଏ। ଯଦି କୌଣସି ଏମ୍ପିଙ୍କୁ ଚିକିତ୍ସା ଲାଗି ବେସରକାରୀକୁ ରେଫର କରାଯାଇଥାଏ। ତେବେ ତାଙ୍କର ସମ୍ପୂର୍ଣ୍ଣ ଖର୍ଚ୍ଚ ସରକାର ବହନ କରନ୍ତି।
ସଡ଼କ ପଥରେ ଯିବା ଲାଗି ମିଳେ ଭତ୍ତା:
ଏମ୍ପିଙ୍କୁ ସଡ଼କ ପଥ ଦେଇ ଯାତ୍ରା କରିବା ଲାଗି ଭତ୍ତା ମିଳିଥାଏ। ଏମିତିରେ ପ୍ରତି କିମି ପିଛା ୧୬ଟଙ୍କା ସେମାନେ ପାଇଥାନ୍ତି। ଏମ୍ପିମାନେ ନିର୍ବାଚନମଣ୍ଡଳୀ ଭତ୍ତା ଭାବେ ୭୦,୦୦୦ ଟଙ୍କା ଏବଂ କାର୍ଯ୍ୟାଳୟ ଖର୍ଚ୍ଚ ପାଇଁ ୬୦,୦୦୦ ପ୍ରତି ମାସରେ ମିଳିଥାଏ। ଏହାଛଡ଼ା ଏମ୍ପିମାନଙ୍କୁ ଘର,ସୁରକ୍ଷାକର୍ମୀ ଏବଂ କେୟାରଟେକର ଆଦିର ସୁବିଧା ମିଳିଥାଏ। ଏହାଛଡ଼ା ଅବସର ପରେ ମଧ୍ୟ ପେନସନ ମିଳିଥାଏ।
କ’ଣ ଏମ୍ପିମାନେ ଦେଇଥାନ୍ତି ଟିକସ?
ହଁ, ଏମ୍ପିମାନଙ୍କୁ ଦରମା ଉପରେ ଟିକସ ଦେବାକୁ ପଡ଼ିଥାଏ। କେବଳ ଏମ୍ପି କାହିଁକି ରାଷ୍ଟ୍ରପତି ଏବଂ ଉପରାଷ୍ଟ୍ରପତି ମଧ୍ୟ ନିଜ ଦରମା ଉପରେ ଟିକସ ଦେଇଥାନ୍ତି। ବେତନ ବ୍ୟତିତ ମିଳୁଥିବା ସରକାରୀ ଭତ୍ତା ଉପରେ ଟିକସ ଦେବାକୁ ପଡ଼ି ନ ଥାଏ। ବର୍ଷକୁ ସେମାନେ ୧୨ ଲକ୍ଷ ପାଉଥିବାବେଳେ ଏହା ଉପରେ ଟିକସ ଭରିଥାନ୍ତି।
ଟ୍ରେନ ଯାତ୍ରାର ସୁବିଧା:
ଜଣେ ଏମ୍ପିଙ୍କୁ ଟ୍ରେନରେ ମାଗଣା ଯାତ୍ରାର ସୁବିଧା ମିଳିଥାଏ। ଏଥିଲାଗି ତାଙ୍କୁ ବିଧିବଦ୍ଧ ଭାବେ ପାସ୍ ମିଳିଥାଏ। ଫଳରେ ଏମ୍ପି ଫାଷ୍ଟ ଏସି ଅଥବା ଏଗ୍ଜିକ୍ୟୁଟିଭ୍ ଶ୍ରେଣୀରେ ମାଗଣାରେ ଯାତ୍ରା କରିଥାନ୍ତି।