ନୂଆଦିଲ୍ଲୀ,୨୭।୬: ଆଇସିସି ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲରେ ଟିମ୍ ଇଣ୍ଡିଆର ଲଜ୍ଜାଜନକ ପରାଜୟ ପରେ ଦଳର ବ୍ୟାଟ୍ସମ୍ୟାନଙ୍କ ଉପରେ ଖପ୍ପା ହୋଇଛନ୍ତି ଭାରତୀୟ ପ୍ରଶଂସକ। ଦ୍ୱିତୀୟ ସେସନରେ ମାତ୍ର ୧୭୦ ରନ୍ରେ ଆଉଟ୍ ହେବାକୁ ନେଇ ସୋସିଆଲ ମିଡିଆରେ କଟୁ ସମାଲୋଚନା କରାଯାଉଛି। ଏହି ସମାଲୋଚନାର ଶୀର୍ଷରେ ରହିଛନ୍ତି ଭାରତୀୟ ଅଧିନାୟକ ବିରାଟ କୋହଲି। ସେ ଖରାପ ଫର୍ମରେ ଥିବା ବେଳେ ଶତକ ମାରିବାରେ ବିଫଳ ହେଉଛନ୍ତି।
ଷ୍ଟାର ବ୍ୟାଟ୍ସମ୍ୟାନ କୋହଲି ଗତ ଦେଢ଼ ବର୍ଷରୁ ଅଧିକ ସମୟ ଧରି ଖରାପ ଫର୍ମରେ ଅଛନ୍ତି। ସେ ୨୦୧୯ରେ ବାଂଲାଦେଶ ବିପକ୍ଷ ଟେଷ୍ଟ ମ୍ୟାଚ୍ରେ ଶେଷଥର ପାଇଁ ଶତକ ହାସଲ କରିଥିଲେ। ସେବେଠାରୁ ଟେଷ୍ଟରେ ତାଙ୍କ ପ୍ରଦର୍ଶନ ହାରାହାରି ୨୪.୬୪ ରହିଛି। ହେଲେ ଦିନିକିଆ ଟୁର୍ନାମେଣ୍ଟରେ ତାଙ୍କ ଖେଳ ସାମାନ୍ୟ ଉନ୍ନତ ରହିଛି। ଏଥିରେ ତାଙ୍କ ପ୍ରଦର୍ଶନ ହାରାହାରି ୪୩.୨୬ ରହିଛି।
କୋହଲିଙ୍କ ପୂର୍ବ ପ୍ରଦର୍ଶନକୁ ଦେଖିଲେ ସେ ଟେଷ୍ଟ କ୍ରିକେଟରେ ସର୍ବାଧିକ ଟେଷ୍ଟ ସ୍କୋର କରିଥିବା କ୍ରିକେଟର ହୋଇପାରନ୍ତି। କାରଣ ସେ ଏବେ ମହାନ ସଚିନ ତେନ୍ଦୁଲକରଙ୍କ ୪୯ ଦିନିକିଆ ଶତକରୁ ୬ ପାଦ ଦୂରରେ ଅଛନ୍ତି। ଚେନ୍ନାଇରେ ଖେଳାଯାଇଥିବା ଇଂଲଣ୍ଡ ବିପକ୍ଷ ମ୍ୟାଚ୍ରେ ସେ ୨ ଅର୍ଦ୍ଧଶତକ କରିଥିଲେ। ଏହାବ୍ୟତିତ ଆଡିଲେଡ୍ଷର ଅଷ୍ଟ୍ରେଲିଆ ବିପକ୍ଷ ଟେଷ୍ଟ ମ୍ୟାଚ୍ରେ ସେ ମଧ୍ୟ ଅର୍ଦ୍ଧଶତକ କରିଥିଲେ।
୨୦୧୯ ନଭେମ୍ବରଠାରୁ କୋହଲି ୧୫ ଦିନିକିଆ ମୁକାବିଲା ଖେଳି ୬୪୯ ରନ୍ କରିଛନ୍ତି। ସେ ଟେଷ୍ଟ ଅପେକ୍ଷା ଦିନିକିଆରେ ଭଲ ରହିଥିବା ବେଳେ ୮ ଅର୍ଦ୍ଧଶତକ କରିଛନ୍ତି। ହେଲେ ଶତକ କରିବାରେ ବିଫଳ ହୋଇଛନ୍ତି।
ଭାରତର ପୂର୍ବ ବ୍ୟାଟିଂ ପ୍ରଶିକ୍ଷକ ସଞ୍ଜୟ ବାଙ୍ଗର କହିଛନ୍ତି, ଶତକର ମରୁଡ଼ିକୁ ନେଇ ଉତ୍କଣ୍ଠା କୋହଲିଙ୍କ ମନରେ ଥିବ। ହେଲେ ସେ ଏଥିରୁ ମୁକୁଳିଯିବେ। ସେ ନିଜର ୭୫୦୦ ଟେଷ୍ଟ ରନ୍ ପାଖରେ ରହିଛନ୍ତି। କ୍ରିକେଟ ଏଭଳି ଏକ ଫର୍ମାଟ ଯେଉଁଥିରେ ସେ ସବୁକିଛି ଆରାମରେ ଦେଇପାରିବେ। ଟି୨୦ ଖେଳରେ ସେ ସୁଧାର ଆଣିଛନ୍ତି ବୋଲି ସେ କହିଛନ୍ତି।
