ନୂଆଦିଲ୍ଲୀ, ୧୬।୯: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ତ୍ରୟୋଦଶ ସଂସ୍କରଣର ବିଗୁଲ୍ ବାଜି ସାରିଛି। ଆଉ ୨ ଦିନ ପରେ ଆରମ୍ଭ ହେବ ବିଶ୍ୱର ଏହି ଧନାଢ଼୍ୟ ଟି୨୦ କ୍ରିକେଟ୍ ଲିଗ୍। ସେପ୍ଟେମ୍ବର ୧୯ରେ ଉଦ୍ଘାଟନୀ ମୁକାବିଲାରେ ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସର ମୁକାବିଲା ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱାଧୀନ ଚେନ୍ନାଇ ସୁପର୍ କିଙ୍ଗ୍ସ ସହ ହେବ। ଆଇପିଏଲ୍ ଆରମ୍ଭ ହେବା ପୂର୍ବରୁ ଆସନ୍ତୁ ଜାଣିବା ଟୁର୍ନାମେଣ୍ଟ ଇତିହାସରେ ବୋଲରଙ୍କ ନାମରେ ରହିଥିବା କିଛି ପ୍ରମୁଖ ରେକର୍ଡ।
ଇତିହାସରେ ସବୁଠାରୁ ଅଧିକ ଉଇକେଟ୍ ମୁମ୍ବାଇ ଇଣ୍ଡିଆନ୍ସର ଲସିଥ୍ ମାଲିଙ୍ଗା ହାସଲ କରିଛନ୍ତି। ମାଲିଙ୍ଗା ୧୨୨ ମ୍ୟାଚ୍ରୁ ୧୭୦ ଉଇକେଟ୍ ନେଇ ଏହି ତାଲିକାର ସର୍ବାଗ୍ରେ ରହିଛନ୍ତି। କିନ୍ତୁ ବ୍ୟକ୍ତିଗତ କାରଣ ଲାଗି ମାଲିଙ୍ଗା ଚଳିତ ସିଜନରୁ ଓହରି ଯାଇଛନ୍ତି।
ଗୋଟିଏ ମ୍ୟାଚ୍ରେ ଶ୍ରେଷ୍ଠ ବୋଲିଂ ପ୍ରଦର୍ଶନ ଓ୍ବେଷ୍ଟଇଣ୍ଡିଜର ଆଲ୍ଜରୀ ଜୋସେଫ୍ଙ୍କ ନାମରେ ରହିଛି। ମୁମ୍ବାଇ ପକ୍ଷରୁ ପ୍ରତିନିଧିତ୍ୱ କରୁଥିବା ଜୋସେଫ୍ ଗତବର୍ଷ ସନ୍ରାଇଜର୍ସ ହାଇଦ୍ରାବାଦ ବିପକ୍ଷରେ ୩.୪ ଓଭର ବୋଲିଂ କରି ୧୨ ରନ୍ ବିନିମୟରେ ୬ ଉଇକେଟ୍ ନେଇଥିଲେ।
ଇନିଂସରେ ୫ ଉଇକେଟ୍ ନେବାରେ ସବୁଠାରୁ ସଫଳ ବୋଲର୍ ରହିଛନ୍ତି ଅଷ୍ଟ୍ରେଲିଆର ଜେମ୍ସ ଫକ୍ନର। ସେ ଆଇପିଏଲ୍ରେ ୨ ଥର ୫ ବା ଏହାଠାରୁ ଊର୍ଦ୍ଧ୍ୱ ଉଇକେଟ୍ ନେବାର ସୌଭାଗ୍ୟ ଲାଭ କରିଛନ୍ତି।
ଗୋଟିଏ ସିଜନରେ ସବୁଠାରୁ ଅଧିକ ଉଇକେଟ୍ ଚେନ୍ନାଇ ସୁପର୍ କିଙ୍ଗ୍ସ ଅଲ୍ରାଉଣ୍ଡର ଡ୍ବେନ ବ୍ରାଭୋଙ୍କ ନାମରେ ରହିଛି। ବ୍ରାଭୋ ୨୦୧୩ରେ ୧୮ ମ୍ୟାଚ୍ ଖେଳି ୩୨ ଉଇକେଟ୍ ନେଇଥିଲେ।
