ଆଗ୍ରା: ନିର୍ବାଚନ ଛୋଟ ହେଉ ଅଥବା ବଡ଼, ପ୍ରତ୍ୟେକ ପ୍ରାର୍ଥୀ ଏହାକୁ ଜିତିବାକୁ ଇଚ୍ଛା ରଖିଥାନ୍ତି। ଏଥିପାଇଁ ସେ ସବୁକିଛି କରନ୍ତି। ହେଲେ ଯଦି ଆମେ ଆପଣଙ୍କୁ ହାରିବାକୁ ନିର୍ବାଚନ ଲଢ଼ନ୍ତୁ ବୋଲି କହିବୁ ତେବେ କ’ଣ ହେବ? ନା କହିବେ ନିଶ୍ଚୟ। ତେବେ ଆଗ୍ରାରେ ଜଣେ ଏଭଳି ବ୍ୟକ୍ତି ଅଛନ୍ତି ଯିଏ ୯୩ ଥର ନିର୍ବାଚନ ଲଢ଼ିଛନ୍ତି ଏବଂ ପ୍ରତ୍ୟେକ ଥର ହାରିଛନ୍ତି। ସେ ନିର୍ବାଚନରେ ୧୦୦ ଥର ହାରି ରେକର୍ଡ କରିବାକୁ ଇଚ୍ଛା ରଖିଛନ୍ତି। ଏଥିଲାଗି ଆଗାମୀ ଦିନରେ ଉତ୍ତରପ୍ରଦେଶରେ ହେବାକୁ ଥିବା ବିଧାନସଭା ନିର୍ବାଚନ ଉପରେ ତାଙ୍କ ଆଖି ରହିଛି।
ବ୍ୟକ୍ତିଜଣଙ୍କ ହେଉଛନ୍ତି ଆଗ୍ରା ନିବାସୀ ୭୫ ବର୍ଷୀୟ ହନନୁରାମ ଆମ୍ବେଦକର। ସେ ନିଜକୁ ଡା. ଭୀମରାଓ ଆମ୍ବେଦକରଙ୍କ ଅନୁଗାମୀ ବୋଲି କୁହନ୍ତି। ୯୩ ଥର ସେ ନିର୍ବାଚନରେ ହାରିଥିଲେ ହେଁ ସେ ଏଥିରେ ଦୁଃଖି ନୁହନ୍ତି କିମ୍ବା ନିରାଶ ହୋଇନାହାନ୍ତି। ଏବେ ସେ ପୁଣିଥରେ ୟୁପି ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଚିନ୍ତା କରୁଛନ୍ତି।
ହସନୁରାମ ଏପର୍ଯ୍ୟନ୍ତ ପଞ୍ଚାୟତ ନିର୍ବାଚନଠାରୁ ଆରମ୍ଭ କରି ବିଧାନସଭା ଏବଂ ଲୋକ ସଭା ନିର୍ବାଚନ ଲଢ଼ି ସାରିଛନ୍ତି। ସେ ଦେଶର ରାଷ୍ଟ୍ରପତି ପଦ ପାଇଁ ତାଙ୍କ ପ୍ରାର୍ଥୀପତ୍ର ଦେଇଥିଲେ ହେଁ ତାଙ୍କ ଆବେଦନକୁ ପ୍ରତ୍ୟାଖ୍ୟାନ କରାଯାଇଥିଲା।
ଦେଶର ସ୍ବାଧୀନତା ଦିନ ଅର୍ଥାତ ୧୯୪୭ ଅଗଷ୍ଟ ୧୫ରେ ଜନ୍ମଗ୍ରହଣ କରିଥିବା ହସନୁରାମ ଅତୀତରେ ରାଜସ୍ବ ବିଭାଗରେ ଅମିନ ଭାବରେ କାର୍ଯ୍ୟ କରିଆସୁଥିଲେ। ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାର ଇଚ୍ଛା ଏପରି ଥିଲା ଯେ ସେ ଚାକିରି ଛାଡି ରାଜନୀତିରେ ଯୋଗ ଦେଇଥିଲେ। କିନ୍ତୁ ତା’ପରେ ଯେଉଁ ଦଳରୁ ଲଢ଼ିବା ପାଇଁ ଅଧିକ ଆଶା କରିଥିଲେ ସେଥିରୁ ସେ ଟିକେଟ ପାଇ ନ ଥିଲେ। ଏହା ପରେ ସେ ପ୍ରତ୍ୟେକ ଥର ଜଣେ ସ୍ବାଧୀନ ପ୍ରାର୍ଥୀ ଭାବରେ ଲଢ଼ି ଆସୁଛନ୍ତି।
ପ୍ରାରମ୍ଭରେ ତାଙ୍କର ଉଦ୍ଦେଶ୍ୟ ମଧ୍ୟ ନିର୍ବାଚନରେ ଜିତିବା ଥିଲା। କିନ୍ତୁ ବର୍ତ୍ତମାନ ସେ ୯୩ ଥର ହାରିଯାଇଥିବାରୁ ୧୦୦ ଥର ହାରି ଏକ ରେକର୍ଡ କରିବାକୁ ଚାହୁଁଛନ୍ତି । ଏଥିପାଇଁ ସେ ପୁଣିଥରେ ୟୁପି ବିଧାନସଭା ନିର୍ବାଚନରେ ନିଜ ଭାଗ୍ୟ ପରୀକ୍ଷା କରିବାକୁ ପ୍ରସ୍ତୁତ ହେବା ଆରମ୍ଭ କରିଛନ୍ତି।