ଲକ୍ଷ୍ନୌ,୬।୪: ଉତ୍ତରପ୍ରଦେଶର ବରେଲି ସହରର କାକା ଜୋଗିନ୍ଦର ସିଂ ଓରଫ ଧରତି ପକଡ଼ ୧୯୬୨ରୁ ନେଇ ମୃତ୍ୟୁ ପର୍ଯ୍ୟନ୍ତ ପ୍ରତିଟି ନିର୍ବାଚନ ଲଢ଼ିଥିଲେ। ଜିତିବା ପାଇଁ ନୁହେଁ ବରଂ ହାରିବା ଲାଗି ସେ ସର୍ବଦା ନାମାଙ୍କନ କରୁଥିଲେ। କାକା ଯୋଗିନ୍ଦରଙ୍କ ଏହି ବିଶେଷତା ଯୋଗୁ ସାରା ଦେଶରେ ତାଙ୍କର ଲୋକପ୍ରିୟତା ବଢ଼ିଥିଲା। ସେ ନିଜ ଜୀବନରେ ମେୟରଠାରୁ ଆରମ୍ଭ କରି ବିଧାନସଭା, ଲୋକ ସଭା , ଉପରାଷ୍ଟ୍ରପତି ଏବଂ ରାଷ୍ଟ୍ରପତି ପଦ ଭଳି ପ୍ରତିଟି ନିର୍ବାଚନ ଲଢ଼ିଥିଲେ। ମୋଟ ଉପରେ ଦେଖିଲେ ୩୬ ବର୍ଷରେ ସେ ୩୫୦ ନିର୍ବାଚନ ଲଢ଼ିଥିଲେ। ସବୁ ନିର୍ବାଚନରେ ସେ କେବଳ ନାମାଙ୍କନ କରୁଥିଲେ। ଭୋଟରଙ୍କ ପାଖକୁ ଯାଇ ଭୋଟ ନ ଦେବାକୁ କହୁଥିଲେ। ତାଙ୍କର ପ୍ରଚାରର ଶୈଳୀ ଭିନ୍ନ ଥିଲା। ସେ ସାଇକେଲରେ ପ୍ରଚାର କରୁଥିଲେ। ଏଣୁ ତାଙ୍କୁ ବାରମାସିଆ ପ୍ରାର୍ଥୀ ବୋଲି କୁହାଯାଉଥିଲା। ହାରି ଯିବା ପରେ ସେ ସମଗ୍ର ଅଞ୍ଚଳରେ ମିଠା ବାଣ୍ଠୁଥିଲେ। ତେବେ ତାଙ୍କୁ ପ୍ରତ୍ୟେକ ବିଧାନସଭାରେ କିଛି ଭୋଟ ନିଶ୍ଚିତ ମିଳୁ ଥିଲା।
ପ୍ରତିଟି ନିର୍ବାଚନରେ କାକା ଯୋଗିନ୍ଦର ସିକ୍ୟୁରିଟି ଟଙ୍କା ସରକାରଙ୍କ କାମରେ ଆସୁ ଭାବି ନାମାଙ୍କନ ରାଶି ଜମା କରୁଥିଲେ। ସେ ସର୍ବଦା ଦେଶରେ ଇଲେକ୍ସନ ନୁହେଁ, ସିଲେକ୍ସନ ହେବା ଉଚିତ ବୋଲି ଧାରଣା ରଖୁଥିଲେ। କାରଣ ନିର୍ବାଚନ ଯୋଗୁ ଦେଶ ଉପରେ ଖର୍ଚ୍ଚର ବୋଝ ବଢ଼ିଥାଏ। କେବଳ ଦଳ ଦେଖି ପ୍ରାର୍ଥୀ ବାଛିଥାନ୍ତି ଦଳ। ଏଣୁ ସର୍ବଦା ଜନସାଧାରଣ ପ୍ରାର୍ଥୀ ଚୟନ କରନ୍ତୁ ବୋଲି ସେ କହିଆସୁଥିଲେ। ହେଲେ ସେ ସର୍ବାଧିକ ଥର ନିର୍ବାଚନ ଲଢ଼ିବାର ରେକର୍ଡ ନିଜ ନାମରେ କରିବାକୁ ଲଢ଼ୁଥିଲେ।
ଏକଦା କାକା ଯୋଗିନ୍ଦର ରାଷ୍ଟ୍ରପତି ଏବଂ ଉପରାଷ୍ଟ୍ରପତି ନିର୍ବାଚନରେ ନିଜର ନାମାଙ୍କନ କରିଥିଲେ। ସେ ରାଷ୍ଟ୍ରପତି ନିର୍ବାଚନରେ ଡା. ଶଙ୍କରଦୟାଲ ଶର୍ମା ଏବଂ ଉପରାଷ୍ଟ୍ରପତି ନିର୍ବାଚନରେ କେ ଆର୍ ନାରାୟଣଙ୍କ ବିପକ୍ଷରେ ଛିଡ଼ା ହୋଇଥିଲେ। ସେତେବେଳେ ଏହି ଦୁଇ ପଦରେ ନିନ୍ଦ୍ୱନ୍ଦ୍ୱରେ ନିର୍ବାଚନ ହେବା ଲାଗି ଶାସକ ଏବଂ ବିରୋଧୀ ଦଳ ସହମତ ଥିଲେ। ହେଲେ କାକା ଯୋଗିନ୍ଦରଙ୍କ ଯୋଗୁ ତାହା ହୋଇପାରି ନ ଥିଲା।
କାକା ଯୋଗିନ୍ଦର ସିଂ ଭାରତର ଗୁଞ୍ଜରାବାଲା(ଏବେ ପାକିସ୍ତାନ)ରେ ୧୯୧୮ରେ ଜନ୍ମଗ୍ରହଣ କରିଥିଲେ। ବଣ୍ଟାଯିବା ପରେ ତାଙ୍କ ପରିବାର ବରେଲିରେ ରହି ଯାଇଥିଲା। ଏଠାର ବଡ ବଜାରରେ କାକାଙ୍କର ପୋଷାକ ଦୋକାନ ଆଜି ମଧ୍ୟ ରହିଛି। ସେ ନିଜର ପ୍ରଥମ ନିର୍ବାଚନ ବରେଲି ସହର ବିଧାନସଭାରୁ ୧୯୬୨ରେ ଲଢ଼ିଥିଲେ। ତାଙ୍କୁ ମୋଟ ୭୪୭ ଭୋଟ ମିଳିଥିଲା। ଏହାପରେ ସେ ସବୁ ନିର୍ବାଚନରେ ନାମାଙ୍କନ କରିଥିଲେ। କେବଳ ଉତ୍ତରପ୍ରଦେଶ ନୁହେଁ, ବରଂ ଅନ୍ୟ ରାଜ୍ୟରୁ ମଧ୍ୟ ସେ ନାମାଙ୍କନ କରୁଥିଲେ।