ପାର୍ବଣ ଋତୁ ଆରମ୍ଭ ହେବା ପୂର୍ବରୁ ଆପଲ୍ କମ୍ପାନୀ ନୂଆ ଆଇଫୋନ୍ ସିରିଜର ଘୋଷଣା କରିଥିଲା। ଏହା ପରେ ସୋସିଆଲ ମିଡିଆରେ ଆଇଫୋନ୍ ସହ ଜଡ଼ିତ କିଛି ମେମେ ଭାଇରାଲ ହୋଇଥିଲା। ଏବେ ଆଇଫୋନ୍ କିଣିବା ପାଇଁ ଲୋକଙ୍କୁ ନିଜର କିଡନୀ ବିକିବାକୁ ପଡ଼ିବ ବୋଲି ଏକ ମେମେରେ କୁହାଯାଇଥିଲା। ଠିକ୍ ଏଭଳି ଏକ ଘଟଣାକ୍ରମରେ ଚାଇନାର ଜଣେ ବ୍ୟକ୍ତି ଆଇଫୋନ୍ କିଣିବା ଲାଗି ନିଜ କିଡନୀ ବିକି ଦେଇଥିଲେ। ହେଲେ ଏବେ ସେ ଜୀବନମରଣ ସହ ସଂଗ୍ରାମ କରୁଥିବା ଜଣାପଡ଼ିଛି।
ଘଟଣାଟି ୨୦୧୧ ମସିହାର। ସେତେବେଳେ ଚାଇନାର ୧୭ ବର୍ଷୀୟ ନାବାଳକ ଓ୍ବାଗଂ ଶାଙ୍ଗୁନ୍ ଆଇପେଡ ୨ ଏବଂ ଆଇଫୋନ କିଣିବାକୁ ନିଜ କିଡନୀ ବିକି ଦେଇଥିଲେ। ତାଙ୍କୁ ଦୁଇଟି କିଡନୀର ଆବଶ୍ୟକତା ନାହିଁ। ଗୋଟିଏ ଯଥେଷ୍ଟ ବୋଲି ସେ ପ୍ରତିକ୍ରିୟାରେ କହିଥିଲେ। ଗୋଟିଏ କିଡନୀ ପାଇଁ ତାଙ୍କୁ ୩,୨୭୩ ଡଲାର ଟଙ୍କା ମିଳିଥିଲା। ଏବେ ତାଙ୍କୁ ୨୫ ବର୍ଷ ହୋଇଥିବା ବେଳେ ସ୍ବାସ୍ଥ୍ୟଗତ ସମସ୍ୟାକୁ ନେଇ ସେ ପୁଣି ଚର୍ଚ୍ଚାର ପରିସରକୁ ଆସିଛନ୍ତି। କାରଣ ସେ ଏବେ ଜୀବନମରଣ ସହ ସଂଘର୍ଷ କରୁଛନ୍ତି।
ସେତେବେଳେ ଶାଙ୍ଗୁନ୍ ଆଇଫୋନ୍ କିଣିବା ଲାଗି ଏତେ ଉତ୍ସାହିତ ଥିଲେ ଯେ ଭବିଷ୍ୟତ କଥା ନ ଭାବି ନିଜ କିଡନୀ ଦଲାଲଙ୍କୁ ବିକି ଦେଇଥିଲେ। ହେଲେ ଅପରେଶନ ସମୟରେ ତ୍ରୁଟି ଯୋଗୁ ତାଙ୍କର ସଂକ୍ରମଣ ହୋଇଥିବା ପରେ ଜଣାପଡ଼ିଥିଲା। ଧିରେ ଧିରେ ଏହା ବଢ଼ି ଚାଲିଥିଲା। ଏବେ ତାଙ୍କୁ ପ୍ରତ୍ୟେହ ଡାଇଲିସିସ୍ କରିବାକୁ ପଡ଼ୁଛି।
ଶାଂଗୁନ ନିଜର କିଡ଼ନୀ ବିକିଥିବା ନେଇ ପରିବାରଲୋକଙ୍କୁ ଜଣାଇ ନ ଥିଲେ। ହେଲେ ପୁଅ ହାତରେ ଦାମୀ ଫୋନ ଦେଖି ସମସ୍ତେ ସନ୍ଦେହ କରିଥିଲେ। ପରେ ପଚରାଯିବାରେ ସେ ସତ ମାନିଥିଲେ। ଏପରିକି ପୋଲିସ ଆଗରେ ସେ ସବୁକଥା କହିଥିଲେ। ଶେଷରେ ୯ଜଣ ଦଲାଲ ଗିରଫ ହୋଇଥିଲେ। ହେଲେ ଏବେ ସେ ନାବାଳକ ସମୟରେ କରିଥିବା ଭୁଲ ପାଇଁ ନିଶ୍ଚିତ ପଶ୍ଚାତାପ କରୁଥିବେ ବୋଲି ଅନେକ ମତ ରଖୁଛନ୍ତି।