ଢେଙ୍କାନାଳ ଜିଲା ପରଜଙ୍ଗ ବିଧାନସଭା ନିର୍ବାଚନ ମଣ୍ଡଳୀର ଭାଜପା ବିଧାୟକ ବିଭୂତି ଭୂଷଣ ପ୍ରଧାନ। ୨୦୨୪ ନିର୍ବାଚନରେ ସେ ବିଜେଡିର ବରିଷ୍ଠ ନେତା ତଥା ଜିଲା ବିଜେଡି ସଭାପତି ଡା. ନୃସିଂହ ଚରଣ ସାହୁଙ୍କୁ ୩୨,୧୬୨ ଭୋଟରେ ହରାଇ ପ୍ରଥମ ଥର ବିଧାୟକ ହୋଇଛନ୍ତି। ମୋଟ ୧ଲକ୍ଷ ୭୬ହଜାର ୬୬୯ ଖଣ୍ଡ ଭୋଟରୁ ବିଭୂତି ୧ଲକ୍ଷ ୫୯୫ ଖଣ୍ଡ ଭୋଟ ପାଇଥିବା ବେଳେ ଡା. ସାହୁଙ୍କୁ ୬୮ହଜାର ୪୩୩ ଖଣ୍ଡ ଭୋଟ ମିଳିଥିଲା।
ବିଧାନସଭା ନିର୍ବାଚନ ମଣ୍ଡଳୀର କଙ୍କଡ଼ାହାଡ଼ ବ୍ଲକ ପଙ୍ଗାତିରା ଗ୍ରାମରେ ୧୭.୭.୧୯୬୭ରେ ବିଭୂତିଙ୍କ ଜନ୍ମ। ବାପା ସ୍ବର୍ଗତ ପଦ୍ମଚରଣ ପ୍ରଧାନ ଓ ମା’ ସ୍ବର୍ଗତ ସତ୍ୟଭାମା ପ୍ରଧାନଙ୍କର ଦୁଇ ଝିଅଙ୍କ ମଧ୍ୟରେ ବିଭୂତି ଏକମାତ୍ର ପୁତ୍ର। ବାପା ସ୍ବର୍ଗତ ପଦ୍ମଚରଣ ଜଣେ ଚାଷୀ ଥିଲେ। ବିଭୂତି ଚାଷକୁ ଅଧିକ ଗୁରୁତ୍ୱ ଦିଅନ୍ତି ା ତାଙ୍କର ମାଛଚାଷ ଓ ଏକ ବଗିଚା କରି ଆମ୍ବଚାଷ କରିଛନ୍ତି। ସେହିପରି ଟ୍ରକ୍ରେ ପରିବହନ ବ୍ୟବସାୟ ମଧ୍ୟ କରିଛନ୍ତି। ବିଭୂତିଙ୍କ ଶିକ୍ଷାଗତ ଯୋଗ୍ୟତା ବିଏ.ଏଲ୍ଏଲ୍ବି। ରାଜନୀତିରେ ତାଙ୍କର ଉତ୍ଥାନ ଦେଖିଲେ ସେ ତାଳଚେର କଲେଜରେ ପଢ଼ିବା ବେଳେ ୧୯୮୩ରୁ ୧୯୮୭ ପର୍ଯ୍ୟନ୍ତ ଏବିଭିପିରେ ସକ୍ରିୟ ଭାବେ କାର୍ଯ୍ୟ କରୁଥିଲେ। ୧୯୮୪ରେ ତାଙ୍କ ମାମୁ ତଥା ପୂର୍ବତନ କେନ୍ଦ୍ରମନ୍ତ୍ରୀ ଡା. ଦେବେନ୍ଦ୍ର ପ୍ରଧାନ, ତତ୍କାଳୀନ ଦେବଗଡ଼ ଲୋକସଭା ନିର୍ବାଚନମଣ୍ଡଳୀରେ ଭାଜପା ପ୍ରାର୍ଥୀ ଭାବେ ଲଢୁଥିବା ବେଳେ ସେତେବେଳେ ବିଭୁତି ଭାଜପାରେ କାର୍ଯ୍ୟ ଆରମ୍ଭ କରି ରାଜନୀତି ଆରମ୍ଭ କରିଥିଲେ। ତାଳଚେର କଲେଜରେ ବର୍ତ୍ତମାନର କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସଭାପତି ଥିବା ବେଳେ ବିଭୂତି ଛାତ୍ର ରାଜନୀତିରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦରେ ରହି କାର୍ଯ୍ୟ କରୁଥିଲେ। ୧୯୮୬ରେ ସେ ଏବିଭିପିର ତାଳଚେରର କୋଷାଧ୍ୟକ୍ଷ ଥିଲେ। ୧୯୯୨ ମସିହାରେ ସେ ପଙ୍ଗାତିରା ଗ୍ରାମ ପଞ୍ଚାୟତର ସରପଞ୍ଚ ଭାବେ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଥିଲେ। ଏହାପରେ ୧୯୯୫ରେ ସେ ପ୍ରଥମେ ପାଲଲହଡ଼ା ବିଧାନସଭା ନିର୍ବାଚନ ମଣ୍ଡଳୀରେ ଭାଜପା ବିଧାୟକ ପ୍ରାର୍ଥୀ ହୋଇ ୮୫୦୦ ଖଣ୍ଡ ଭୋଟ ପାଇଥିଲେ। ୨୦୦୯ରେ ବିଧାନସଭା କ୍ଷେତ୍ର ବଦଳି ଥିଲା ଏବଂ ଢେଙ୍କାନାଳ ଜିଲାର ପରଜଙ୍ଗ ନୂତନ ବିଧାନସଭା କ୍ଷେତ୍ର ହୋଇଥିଲା। ୨୦୦୯ରୁ ୨୦୧୯ ପର୍ଯ୍ୟନ୍ତ ସେ ଭାଜପା ପ୍ରାର୍ଥୀ ଭାବେ ପରଜଙ୍ଗ ବିଧାନସଭା ଆସନରୁ ଲଢି ପରାଜିତ ହୋଇଥିଲେ। ଏହାପରେ ୨୦୨୪ରେ ପରଜଙ୍ଗରୁ ଭାଜପା ପ୍ରାର୍ଥୀ ଭାବେ ବିଜୟୀ ହୋଇ ପ୍ରଥମଥର ବିଧାୟକ ହୋଇଛନ୍ତି ା ଏହାବ୍ୟତୀତ ସେ ଦୁଇଥର ଢେଙ୍କାନାଳ ଜିଲା ଭାଜପା ସଭାପତି, ରାଜ୍ୟ କୃଷକ ମୋର୍ଚ୍ଚାର ଜିଲା ସମ୍ପାଦକ ଏବଂ ରାଜ୍ୟ କାର୍ଯ୍ୟକାରିଣୀ ସଦସ୍ୟ ରହିଥିଲେ। ସେହିପରି ବର୍ତ୍ତମାନ ବିଧାନସଭା ଷ୍ଟାଣ୍ଡିଂ କମିଟିର ସ୍ବାସ୍ଥ୍ୟ, ପରିବାର କଲ୍ୟାଣ, ମିଶନ ଶକ୍ତି, ମହିଳା ଓ ଶିଶୁ ବିକାଶ ଓ ଭିନ୍ନକ୍ଷମ ସଶକ୍ତୀକରଣର ସେ ଅଧ୍ୟକ୍ଷ ରହିଛନ୍ତି।
ବିଧାୟକ କୁହନ୍ତି: –
୨୦୦୯ରୁ ୨୦୧୯ ମଧ୍ୟରେ ବହୁ କମ୍ ଭୋଟରେ ହାରିଛି। ତେଣୁ ନିର୍ବାଚନ ମୋ ପାଇଁ କିଛି ନୂଆ କଥା ନୁହେଁ। ରାଜନୀତିରେ ହାରଜିତ୍ ରହିବ। ପରଜଙ୍ଗ ବିଧାନସଭା ନିର୍ବାଚନ ମଣ୍ଡଳୀରେ ରହିଥିବା ବହୁ ସମସ୍ୟାର ସମାଧାନ କରିବା ମୂଳ ଲକ୍ଷ୍ୟ। ଜଣେ ଡାକ୍ତର ଏଠି ବିଧାୟକ ଥିଲେ। କିନ୍ତୁ ଏଠି ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହୋଇପଡିଛି। ଯେତିକି ସ୍ବାସ୍ଥ୍ୟକେନ୍ଦ୍ର ଅଛି, ସବୁଠି ଡାକ୍ତର ନିଯୁକ୍ତି ସାଙ୍ଗକୁ ବିଦ୍ୟାଳୟଗୁଡିକରେ ଶିକ୍ଷକ ପଦବୀ ପୂରଣ ପାଇଁ ଗୁରୁତ୍ୱ ଦିଆଯିବ। ଗମନାଗମନକୁ ମଧ୍ୟ ଗୁରୁତ୍ୱ ଦିଆଯିବ। ଏହି ନିର୍ବାଚନ ମଣ୍ଡଳୀର କଙ୍କଡ଼ାହାଡ଼ ବ୍ଲକ ଏକ ଆଦିବାସୀ ବହୁଳ ବ୍ଲକ ହୋଇଥିବାରୁ ଏହି ଅଞ୍ଚଳର ବିକାଶ ପ୍ରତି ଅଧିକ ଧ୍ୟାନ ଦିଆଯିିବ। କୁଆଳୋ ଅଷ୍ଟଶମ୍ଭୁ, ସରାଙ୍ଗ ଅନନ୍ତ ଶୟନ, ଦଦରାଘାଟି ଓ ଦଣ୍ଡାଧର ଜଳଭଣ୍ଡାର ଆଦିକୁ ନେଇ ଟୁରିଜିମ୍ କରିଡର କରିବା ପାଇଁ ଚିନ୍ତା ରହିଛ।
ରିପୋର୍ଟ : ରତନ ନାୟାର, ଢେଙ୍କାନାଳ