ବିଭିନ୍ନ କ୍ଷେତ୍ରରେ ଲୋକଙ୍କର ଭିନ୍ନ ଭିନ୍ନ ରୁଚି ରହିଥାଏ। କିଛି ଲୋକ ଶାନ୍ତିରେ ବଞ୍ଚିବାକୁ ଚାହାନ୍ତି ତ ଆଉ କିଛି ଲୋକ ଏକାକୀ ରହିବାକୁ ଚାହାନ୍ତି। ସମସ୍ତେ ନିଜ ମନ ମୁତାବକ ସମ୍ପତ୍ତି କିଣିବା ପାଇଁ ଚାହିଁଥାନ୍ତି। ଦୁନିଆରେ ଏମିତି ଏକ ଘର ରହିଛି, ଯେଉଁଥିରେ ଗୋଟିଏ ମାତ୍ର ବେଡ୍ରୁମ୍ର ଦାମ୍ ୨ କୋଟିରୁ ଅଧିକ।
ଏହି ଘର ଆମେରିକାର ଓ୍ବାହୁଆସ୍ଥିତ ଏକ ଦ୍ୱୀପରେ ନିର୍ମିତ ହୋଇଛି। ଏହି ଘରେ କେବଳ ଗୋଟିଏ ବେଡ୍ ରୁମ୍ ରହିଛି। ଏହାକୁ ଦୁନିଆର ସବୁଠୁ ଏକାକୀ ଘର କୁହାଯାଉଛି। ଏହି ସ୍ଥାନ ସେହି ଲୋକମାନଙ୍କ ପାଇଁ, ଯେଉଁମାନେ ଏକ ସୁନ୍ଦର ଜୀବନ ଶୈଳୀରେ ବଞ୍ଚିବାକୁ ଚାହାନ୍ତି। ଦୁନିଆର ଲୋକମାନଙ୍କଠାରୁ ଏକା ରହିବାକୁ ପସନ୍ଦ କରନ୍ତି। ସେହିମାନଙ୍କୁ ଏହି ଘର ସ୍ବାଗତ କରୁଛି।
ଏହି ଘରର ଦାମ୍ ୨.୫୮କୋଟି। ଏହି ଘରେ କେବଳ ଗୋଟିଏ ବେଡ୍ରୁମ୍ ରହିଛି। ଯାହାର ଚାରିପାଖେ ବାଲି ଏବଂ ପାଣି ବ୍ୟତୀତ ଆଉ କିଛି ବି ନାହିଁ। ଏହି ସ୍ଥାନକୁ ସ୍ବର୍ଗ କୁହାଯାଏ। ଘରଟି ଡକ୍ ଲେଜେଜ ଦ୍ୱୀପରେ ନିର୍ମିତ। ଏହାର କ୍ଷେତ୍ର ୧.୫ ଏକର ଏବଂ ଏଠାରେ ଅଲଗା ଲୋକ କେହି ବାସ କରୁନାହାନ୍ତି। ଦ୍ୱୀପରେ ବହୁ ସଂଖ୍ୟକ ସିଲ୍ ଦେଖାଯାଏ କିନ୍ତୁ କୌଣସି ଉଦ୍ଭିଦ କିମ୍ବା ସଭ୍ୟତାର ଚିହ୍ନବର୍ଣ୍ଣ ନାହିଁ। ଘରୁ ବାହାରିବା ମାତ୍ରେ କେବଳ ପ୍ରକୃତିର ସୌନ୍ଦର୍ଯ୍ୟ ଦେଖିବାକୁ ମିଳିବ।
୨୦୦୯ରେ ଏହି ଗୃହଟି ନିର୍ମିତ ହୋଇଥିଲା। ଘରଟି ଏବେ ବି ଭଲ ଅଛି। କୌତୂହଳର ବିଷୟ ଏଠାରେ ଆଉ କିଛି ଘଟେ ନାହିଁ କିନ୍ତୁ ଏକ ଶକ୍ତିଶାଳୀ ଓ୍ବାଇଫାଇ ନେଟଓ୍ବାର୍କ କାମ କରେ। ଘର ୫୪୦ ବର୍ଗଫୁଟରେ ନିର୍ମିତ ଏବଂ ଆବଶ୍ୟକ ସମସ୍ତ ଜିନିଷ ଏଠାରେ ଉପଲବ୍ଧ। ଏଠାରେ ବନ୍ୟା ହେବାର ଭୟ ନାହିଁ କିନ୍ତୁ ଏକମାତ୍ର ସମସ୍ୟା ହେଉଛି ଘର ଭିତରେ ବାଥରୁମ୍ ନାହିଁ। ଏଠାରେ ରାତିରେ ସାମୁଦ୍ରିକ ପ୍ରାଣୀମାନଙ୍କର ଶବ୍ଦ ଶୁଣିବାକୁ ମିଳେ। ବର୍ତ୍ତମାନ ଏହି ସମ୍ପତ୍ତି ବୋଲ୍ଡ କୋଷ୍ଟ ପ୍ରପର୍ଟିଜର ଏଜେଣ୍ଟ ବିଲି ମିଲିକେନଙ୍କର ରହିଛି। ଯିଏ କି ଏହାକୁ ବିକ୍ରି କରିବାକୁ ଚାହାନ୍ତି।