ଫୁଲବାଣୀ ଅଫିସ/ଟିକାବାଲି,୯ା୧: କନ୍ଧମାଳ ଜିଲାର ପ୍ରମୁଖ ସମସ୍ୟା ହେଉଛି ରାସ୍ତା। ଆଜି ପର୍ଯ୍ୟନ୍ତ ଜିଲାର ବହୁ ଦୁର୍ଗମ ଅଞ୍ଚଳକୁ ରାସ୍ତା ନାହିଁ। ଫଳରେ ଗ୍ରାମାଞ୍ଚଳର ଲୋକେ ମୌଳିକ ସୁବିଧାରୁ ବଞ୍ଚତ୍ତ ହେଉଛନ୍ତି। କିନ୍ତୁ ଫୁଲବାଣୀ-ବ୍ରହ୍ମପୁର ଜାତୀୟ ରାଜପଥର ମାତ୍ର ୧୦୦ ମିଟର ଦୂର ଟିକାବାଲି ପଞ୍ଚାୟତ କୋଚିଲାଗଡ଼-ସିକିଡ଼ିକିଆ ରାସ୍ତାର ଅବସ୍ଥା ଦେଖିଲେ ପ୍ରଶାସନର ପାରିବାପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଆଜି ପର୍ଯ୍ୟନ୍ତ ଗ୍ରାମକୁ ସଂଯୋଗ କରୁଥିବା ରାସ୍ତା ନିର୍ମାଣ କରାଯାଉନାହିଁ। ରାସ୍ତା ଖାଲ ଖମାରେ ଭର୍ତ୍ତି ହୋଇଯାଇଛି। ରାସ୍ତା ଉପରେ ଖାଲି ବଡ଼ ବଡ଼ ମେଟାଲ। ବାଇକ୍ରେ ଗଲେ ସବୁବେଳେ ଦୁର୍ଘଟଣା ଘଟୁଛି। ରାସ୍ତା ମରାମତି ପାଇଁ ଗ୍ରାମବାସୀ ବାରମ୍ବାର ଅଭିଯୋଗ କରିଆସୁଥିଲେ ହେଁ ତାହା ଆଜି ପଯର୍ର୍ୟନ୍ତ କରାଯାଉନାହିଁ।
ବ୍ଲକ କାର୍ଯ୍ୟାଳୟଠାରୁ ମାତ୍ର ୨ କିମି ଦୂରରେ ରହିଛି ଏହି ରାସ୍ତା। ଆଜକୁ ପ୍ରାୟ ୨୦ବର୍ଷ ହେବ ରାସ୍ତା ସମତୁଲ ହୋଇ ମେଟାଲ କାମ ହୋଇଥିଲା। ସେହିଦିନଠାରୁ ଆଉ ରାସ୍ତା ମରାମତି କାମ ହୋଇନାହିଁ। କୋଚିଲାଗଡ଼ଠାରୁ ସିକିଡିକିଆ ଦେଇ ପାଲଚିପଦା ପର୍ଯ୍ୟନ୍ତ ପ୍ରାୟ ୨ କିମି ରାସ୍ତା ଏବେ ମରଣଯନ୍ତା। ସାମାନ୍ୟ ବର୍ଷା ହେଲେ ରାସ୍ତାରେ ପାଣି ଜମିରହୁଛି। ଯାତାୟତ ବେଳେ ଲୋକେ ଖାଲଖମା ଜାଣି ନ ପାରି ରାସ୍ତାରେ ଦୁର୍ଗଟଣଗ୍ରସ୍ତ ହେଉଛନ୍ତି। ରାତିରେ ଯାତାୟତ କରିବା କଥା ନ କହିବା ଭଲ। ଏହି ୩ଟି ଗ୍ରାମରେ ବସବାସ କରୁଥିବା ପରିବାର ଦୀପ ତଳ ଅନ୍ଧାର ଭଳି କାଳାତିପାତ କରୁଛନ୍ତି। ରାସ୍ତା ପାଇଁ ଲୋକେ ବାରମ୍ବାର ଦାବି କରି ଆସୁଥିଲେ ମଧ୍ୟ ଖାଲି ସେମାନଙ୍କୁ ପ୍ରତିଶ୍ରୁତି ଦିଆଯାଉଛି। ହେଲେ କାମ ହେଉନାହିଁ। ସରପଞ୍ଚଙ୍କୁ କହିଲେ ରାସ୍ତା କାମ ପାଇଁ ପ୍ରସ୍ତାବ ଦିଆଯାଇଥିବା କହୁଛନ୍ତି। ଆମେ ବହୁ ହଇରାଣ ହେଉଛୁ। କାମ କେବେ ହେବ ତାହାକୁ ଆମେ ଚାହିଁବସିଛୁ ବୋଲି କୋଚିଲାଗଡ଼ର ଅକ୍ଷୟ କହଁର, ଆଦିକନ୍ଦ କହଁର, ସୁଧାକର କହଁର ପ୍ରମୁଖ ପ୍ରକାଶ କରିଛନ୍ତି। ଏ ନେଇ ସରପଞ୍ଚ କୁନ୍ଦୁରୁ ମଲ୍ଲିକଙ୍କୁ ପଚାରିବାରୁ ରାସ୍ତା କାମ ପାଇଁ ସମିତି ମିଟିଂରେ ବାରମ୍ବାର କହିଛି। କିଛି ଦିନ ତଳେ ଜିଲା ପରିଷଦ କାର୍ଯ୍ୟନିର୍ବାହୀ ଅଧିକାରୀଙ୍କୁ ଭେଟି ଏହି ରାସ୍ତାକୁ ଗ୍ରାମ୍ୟ ନିର୍ମାଣ ବିଭାଜନ(ଆରଡି)ରେ ଅନ୍ତର୍ଭୁକ୍ତ କରି ପିଚୁ କାମ କରିବାକୁ ପ୍ରସ୍ତାବ ଦେଇଛି। ଏ ପର୍ଯ୍ୟନ୍ତ କିଛି ପଦକ୍ଷେପ ନିଆଯାଇନାହିଁ ବୋଲି କହିଛନ୍ତି।