କେପ୍ ଟାଉନ,୧୩।୧: ଭାରତୀୟ ଟେଷ୍ଟ ଅଧିନାୟକ ବିରାଟ କୋହଲି ଦକ୍ଷିଣ ଆଫ୍ରିକା ବିପକ୍ଷ ତୃତୀୟ ତଥା ନିର୍ଣ୍ଣାୟକ ଟେଷ୍ଟରେ ପୁରୁଣା ଶୈଳୀରେ ଆଉଟ୍ ହୋଇଛନ୍ତି। ରନ୍ ଅଧିକ କରି ନ ଥିଲେ ମଧ୍ୟ କ୍ରିଜ୍ରେ ସେଟ୍ ହୋଇସାରିଥିଲେ କୋହଲି। ୪୯ତମ ଓଭରର ଦ୍ୱିତୀୟ ବଲରେ ଲୁଙ୍ଗି ଏନ୍ଗିଡିଙ୍କ ଅଫ୍ ଷ୍ଟମ୍ପ ବାହାର ବଲକୁ କଭର ଉପରେ ମାରିବାକୁ ଯାଇ ୩୩ ବର୍ଷୀୟ ବ୍ୟାଟର ସେକେଣ୍ଡ ସ୍ଲିପ୍ରେ ଧରାପଡ଼ିଥିଲେ। ଆଉଟ୍ ହେବା ପୂର୍ବରୁ ୧୪୩ ବଲରେ ୨୯ ରନ୍ କରିଥିଲେ କୋହଲି। ଏହାବାଦ୍ ୫ମ ଉଇକେଟ ପାଇଁ ରିଷଭ ପନ୍ତଙ୍କ ସହ ମିଶି ସେ ଦଳୀୟ ସ୍କୋରରେ ୯୪ ରନ୍ ଯୋଡ଼ିଥିଲେ। ଏବେ ଭାରତୀୟ ଦଳ ୫ ଉଇକେଟ ହରାଇ ୧୫୮ ରନ୍ କରିଛି। ପନ୍ତ ୭୧ ଓ ରବିଚନ୍ଦ୍ରନ ଅଶ୍ୱିନ ୬ ରନ୍ କରି ଖେଳୁଛନ୍ତି। ଟିମ୍ ଇଣ୍ଡିଆ ବର୍ତ୍ତମାନ ୧୭୧ ରନ୍ରେ ଆଗୁଆ ଥିବା ବେଳେ ହାତରେ ୫ ଉଇକେଟ ଅଛି।