ନୂଆଦିଲ୍ଲୀ,୧।୨: ବିଶ୍ୱର ଅନ୍ୟତମ ଶ୍ରେଷ୍ଠ ବ୍ୟାଟ୍ସମ୍ୟାନ ବିରାଟ କୋହଲି ଅନ୍ତର୍ଜାତୀୟ କ୍ରିକେଟ୍ରେ ଗୋଟିଏ ଶତକ ହାସଲ କରିବାର ପ୍ରାୟ ୨ ବର୍ଷ ବିତିଯାଇଛି। ତାଙ୍କର ୭୧ ତମ ଅନ୍ତର୍ଜାତୀୟ ଶତକ କେବେ ହେବ ପ୍ରଶଂସକମାନେ ଅପେକ୍ଷା କରିଛନ୍ତି। ୨୦୧୯ରେ ଇଡେନ ଗାର୍ଡେନ୍ସରେ ବାଂଲାଦେଶ ବିପକ୍ଷରେ ଗୋଲାପୀ ବଲ ଟେଷ୍ଟ ମ୍ୟାଚ ସମୟରେ ତାଙ୍କର ଶେଷ ଶତକ ଆସିଥିଲା। କୋହଲିଙ୍କ ଫର୍ମକୁ ନେଇ ପୂର୍ବତନ କ୍ରିକେଟର୍ ଆକାଶ ଚୋପ୍ରା ନିଜ ମତ ରଖିଛନ୍ତି। ସେ କହିଛନ୍ତି, ବିରାଟ କୋହଲି ଖେଳିବା ଶୈଳୀ ବଦଳିଯାଇଛି। ବ୍ୟକ୍ତିଗତ ଦୃଷ୍ଟିକୋଣରୁ ୫୦ କୁ ୧୦୦ ର ପରିଣତ କରିବାକୁ ଚାହୁଁଥିଲେ ବିରାଟଙ୍କୁ କିଛି ଭଲ କରିବାକୁ ପଡିବ। ସେ ରନ ଦୃଷ୍ଟିରୁ ଖରାପ ଫର୍ମ ଦେଇ ଗତି କରୁନାହାଁନ୍ତି, କିନ୍ତୁ ବ୍ୟାଟିଂ ସମୟରେ ପୁରୁଣା ବିରାଟ କୋହଲିଙ୍କୁ ଆଉ ଦେଖିବାକୁ ମିଳୁନାହିଁ ବୋଲି ସେ କହିଛନ୍ତି।
ଚୋପ୍ରା ଆହୁରି କହିଛନ୍ତି, ବିରାଟ ପ୍ରଭାବିତ କରିବାକୁ ସକ୍ଷମ ନୁହଁନ୍ତି। ସେ ବିରୋଧୀ ଦଳର ବୋଲରଙ୍କ ଉପରେ ପ୍ରାଧାନ୍ୟ ଦେଉ ନାହାଁନ୍ତି। ଆମେ ସଚିନ ତେନ୍ଦୁଲକର, ରାହୁଲ ଦ୍ରାବିଡଙ୍କୁ ଦେଖିଛୁ, ତାଙ୍କୁ ରନ ସ୍କୋର କରିଥିବା ଦେଖିଛୁ, କିନ୍ତୁ ସେ (ବିରାଟ କୋହଲି) ପୂର୍ବରୁ ବ୍ୟାଟିଂ କରିଥିବା ଭଳି ଦେଖାଯାଉନାହାଁନ୍ତି। ବିରାଟ ପ୍ରଥମ ଥର ପାଇଁ ‘ହିଟମ୍ୟାନ’ ରୋହିତ ଶର୍ମାଙ୍କ ଅଧିନାୟକତ୍ୱରେ ୱେଷ୍ଟଇଣ୍ଡିଜ ବିପକ୍ଷ ସିରିଜରେ ଖେଳିବେ। ଏବେ ବିରାଟ ଏକ ଭିନ୍ନ ମାନସିକତା ରହିବା ଆବଶ୍ୟକ କାରଣ ତାଙ୍କ ଉପରେ ଆଉ ଅଧିନାୟକତ୍ୱର ଚାପ ନାହିଁ।
ସୂଚନାଯୋଗ୍ୟ,ଫେବୃୟାରୀ ୬ରୁ ୱେଷ୍ଟଇଣ୍ଡିଜ ବିପକ୍ଷ ଆଗାମୀ ଘରୋଇ ସିରିଜରେ ପ୍ରଥମ ସୀମିତ ଓଭର ଅଧିନାୟକ ରୋହିତ ଶର୍ମାଙ୍କ ଅଧୀନରେ କୋହଲି ଖେଳିବେ।
