ଟଙ୍କା-ଖ୍ୟାତି ଦେଖି ସମ୍ପୂର୍ଣ୍ଣ ବଦଳିଯାଇଛନ୍ତି କୋହଲି: ସାଥୀ କ୍ରିକେଟର୍‌ କଲେ ବଡ଼ ଖୁଲାସା

ନୂଆଦିଲ୍ଲୀ,୧୬।୭: ଭାରତୀୟ ଦଳର ଅଭିଜ୍ଞ ଲେଗ ସ୍ପିନର ଅମିତ ମିଶ୍ର ବିରାଟ କୋହଲିଙ୍କୁ ନେଇ ଏକ ବଡ଼ ଖୁଲାସା କରିଛନ୍ତି। ଖ୍ୟାତି ଏବଂ ଟଙ୍କା କୋହଲିଙ୍କୁ ସମ୍ପୂର୍ଣ୍ଣ ପରିବର୍ତ୍ତନ କରିଦେଇଛି ବୋଲି ବିଶ୍ର କହିଛନ୍ତି।
କୋହଲିଙ୍କ ସହ ଅନେକ ଅନ୍ତର୍ଜାତୀୟ କ୍ରିକେଟ ଖେଳିଥିବା ଅମିତ ମିଶ୍ର ଏକ ପୋଡକାଷ୍ଟ ଶୋ’ ସମୟରେ କହିଛନ୍ତି, ମୁଁ ବିରାଟଙ୍କ ଠାରେ ବହୁତ ପରିବର୍ତ୍ତନ ଦେଖିଛି। ଆମେ ପ୍ରାୟ କଥା କହିବା ବନ୍ଦ କରିଦେଇଛି। ଯେତେବେଳେ ଜଣଙ୍କ ଖ୍ୟାତି ଏବଂ ଟଙ୍କା ମିଳିଯାଏ, ସେମାନେ ଭାବନ୍ତି ଯେ ଲୋକମାନେ କୌଣସି ଉଦ୍ଦେଶ୍ୟରେ ସେମାନଙ୍କ ନିକଟକୁ ଆସୁଛନ୍ତି। ମୁଁ ଚିକୁ (କୋହଲି)ଙ୍କୁ ୧୪ ବର୍ଷ ବୟସରୁ ଜାଣିଛି, ଯେତେବେଳେ ସେ ସିଙ୍ଗଡା ଖାଉଥିଲେ, ସେ ପ୍ରତିଦିନ ରାତିରେ ପିଜା ଚାହୁଁଥିଲେ। କିନ୍ତୁ ମୁଁ ଜାଣିଥିବା ଚିକୁ ଏବଂ ଏବେକାର ବିରାଟ କୋହଲିଙ୍କ ମଧ୍ୟରେ ବହୁତ ପାର୍ଥକ୍ୟ ଅଛି। ଯେତେବେଳେ ବି ସେ ମୋତେ ଭେଟନ୍ତି, ସେ ସମ୍ମାନ ଦିଅନ୍ତି, କିନ୍ତୁ ନିଶ୍ଚିତ ଭାବରେ ବର୍ତ୍ତମାନ ସେ ପୂର୍ବ ପରି ନାହାନ୍ତି।
ବିରାଟଙ୍କୁ ରୋହିତଙ୍କ ସହ ତୁଳନା କରି ମିଶ୍ର କହିଛନ୍ତି, କ୍ରିକେଟର ଭାବରେ ମୁଁ କୋହଲିଙ୍କୁ ବହୁତ ସମ୍ମାନ କରେ, କିନ୍ତୁ ବର୍ତ୍ତମାନ ମୁଁ ତାଙ୍କ ସହ ପୂର୍ବ ସମ୍ପର୍କକୁ ବଜାୟ ରଖି ପାରିବି ନାହିଁ। କୋହଲି ଏବଂ ରୋହିତଙ୍କ ବ୍ୟକ୍ତି ସମ୍ପୂର୍ଣ୍ଣ ଭିନ୍ନ। ଯେତେବେଳେ ମୁଁ ରୋହିତଙ୍କୁ ପ୍ରଥମ ଥର ପାଇଁ ଭେଟିଥିଲି ଏବଂ ମୁଁ ଆଜି ତାଙ୍କୁ ଭେଟେ ସେ ସେହି ସମାନ ବ୍ୟକ୍ତି ଭଳି ଲାଗନ୍ତି। କିନ୍ତୁ କୋହଲି ପରିସ୍ଥିତି ସହ ବଦଳି ଯାଇଛନ୍ତି।