ନୂଆଦିଲ୍ଲୀ, ୧୦।୮- କରୋନା ଭାଇରସ ସଂକ୍ରମଣ ଯୋଗୁ ଭାରତୀୟ କ୍ରିକେଟ ଦଳ ଖେଳିବା ତ ଦୂରର କଥା ଏପର୍ଯ୍ୟନ୍ତ ଅଭ୍ୟାସ ମଧ୍ୟ ଆରମ୍ଭ କରି ପାରିନାହିଁ। ମାତ୍ର ଟିମ୍ ଇଣ୍ଡିଆ ଅଧିନାୟକ ବିରାଟ କୋହଲି ଏବେ ମଧ୍ୟ ଦର୍ଶକଙ୍କ ପସନ୍ଦର କ୍ରିକେଟର ରହିଛନ୍ତି। ୩୧ ବର୍ଷୀୟ କୋହଲି ବିଶ୍ୱର ସବୁଠାରୁ ଲୋକପ୍ରିୟ କ୍ରିକେଟର ବୋଲି ଏକ ଅନୁଧ୍ୟାନରୁ ଜଣା ଯାଇଛି। ସେହିପରି ‘ମେନ୍ ଇନ୍ ବ୍ଲୁ’ ସବୁଠାରୁ ଲୋକପ୍ରିୟ କ୍ରିକେଟର ଦଳ ତାଲିକାର ଶୀର୍ଷରେ ରହିଛି। ବୋଷ୍ଟନ ଭିତ୍ତିକ ଏକ ସଫ୍ଟଓ୍ବେର ସର୍ଭିସ କମ୍ପାନୀ ସେମ୍ରଶ ପକ୍ଷରୁ କରାଯାଇଥିବା ଷ୍ଟଡି ଅନୁସାରେ ଚଳିତ ବର୍ଷ ଜାନୁୟାରୀରୁ ଜୁନ୍ ମଧ୍ୟରେ ପ୍ରଶଂସକମାନେ ପ୍ରତି ମାସରେ ହାରାହାରି ୧୬.୨ ଲକ୍ଷ ଥର କୋହଲିଙ୍କୁ ଅନ୍ଲାଇନ୍ରେ ସର୍ଚ୍ଚ କରିଛନ୍ତି। ଏହି ସମୟ ମଧ୍ୟରେ ଭାରତୀୟ କ୍ରିକେଟ ଦଳକୁ ପ୍ରତି ମାସରେ ହାରାହାରି ୨.୪ ଲକ୍ଷ ଥର ସର୍ଚ୍ଚ କରାଯାଇଛି। ଏହି ତାଲିକାର ଟପ୍-୧୦ରେ ଥିବା ଅନ୍ୟ କ୍ରିକେଟରମାନେ ହେଲେ ରୋହିତ ଶର୍ମା, ମହେନ୍ଦ୍ର ସିଂ ଧୋନୀ, ଜର୍ଜ ମ୍ୟାକକେ, ଜୋଶ୍ ରିଚାଡର୍ସ, ହାର୍ଦ୍ଦିକ ପାଣ୍ଡ୍ୟା, ସଚିନ ତେନ୍ଦୁଲକର, କ୍ରିସ୍ ମାଥ୍ୟୁସ ଏବଂ ଶ୍ରେୟାସ ଆୟାର। ୨୦୨୦ ଜାନୁୟାରୀରୁ ଜୁନ୍ ମଧ୍ୟରେ ଏହି କ୍ରିକେଟରମାନଙ୍କୁ ପ୍ରଶଂସକମାନେ ଯଥାକ୍ରମେ ହାରାହାରି ୯.୭, ୯.୪, ୯.୧, ୭.୧, ୬.୭, ୫.୪, ୪.୧ ଓ ୩.୪ ଲକ୍ଷ ଥର ସର୍ଚ୍ଚ କରିଛନ୍ତି।
ଟିମ୍ ତାଲିକାରେ ଭାରତ ଶୀର୍ଷରେ ଥିବାବେଳେ ଇଂଲଣ୍ଡ, ଅଷ୍ଟ୍ରେଲିଆ, ଓ୍ବେଷ୍ଟଇଣ୍ଡିଜ, ପାକିସ୍ତାନ, ଦକ୍ଷିଣ ଆଫ୍ରିକା, ବାଂଲାଦେଶ, ନ୍ୟୁଜିଲାଣ୍ଡ, ଶ୍ରୀଲଙ୍କା, ଆୟର୍ଲାଣ୍ଡ, ଆଫଗାନିସ୍ତାନ ଓ ଜିମ୍ବାଓ୍ବେ ଦଳକୁ ଯଥାକ୍ରମେ ୦.୬୬, ୦.୩୩, ୦.୨୯, ୦.୨୩, ୦.୧୬, ୦.୧୨, ୦.୧୨, ୦.୦୯, ୦.୦୫, ୦.୦୪ ଓ ୦.୦୩ ଲକ୍ଷ ହାରରେ ସର୍ଚ୍ଚ କରାଯାଇଛି। କୌଣସି ମହିଳା କ୍ରିକେଟର ଟପ୍-୧୦ରେ ରହିପାରି ନ ଥିଲେ ହେଁ ସ୍ମୃତି ମନ୍ଧାନା ଓ ଏଲିଶ ପେରି ଯଥାକ୍ରମେ ୧୨ ଓ ୨୦ତମ ସ୍ଥାନରେ ଅଛନ୍ତି। ଏମାନେ ଯୁବରାଜ ସିଂ ଓ ଶିଖର ଧାଓ୍ବନଙ୍କ ପରି ନାମୀ ଖେଳାଳିଙ୍କୁ ପଛରେ ପକାଇ ଦେଇଛନ୍ତି। ” ବିଶ୍ୱର ସର୍ବାଧିକ ଲୋକ ବିରାଟ କୋହଲି ଏବଂ ଭାରତୀୟ କ୍ରିକେଟ ଦଳକୁ ସର୍ଚ୍ଚ କରୁଥିବାରୁ ଆମେ ବିସ୍ମିତ ନୁହେଁ। ମହିଳା ଖେଳାଳିମାନେ ଅନେକ ନାମୀ ପୁରୁଷ କ୍ରିକେଟରଙ୍କୁ ପଛରେ ପକାଇଦେବାରେ ଆମେ ବିସ୍ମିତ“ ବୋଲି ସେମ୍ରଶର ଯୋଗାଯୋଗ ମୁଖ୍ୟ ଫର୍ନାଣ୍ଡୋ ଅନ୍ଗୁଲୋ ପ୍ରକାଶ କରିଛନ୍ତି।
