ଚେନ୍ନାଇରେ ଖେଳାଯାଇଥିବା ଦ୍ୱିତୀୟ ଟେଷ୍ଟରେ ଟିମ ଇଣ୍ଡିଆ ୩୧୭ ରନରେ ଇଂଲଣ୍ଡକୁ ପରାସ୍ତ କରିଛି। ଫଳରେ ୪ଟି ଟିକିଆ ଟେଷ୍ଟ ମ୍ୟାଚ୍ ଏବେ ୧-୧ ରେ ବରାବର ରହିଛି। କିନ୍ତୁ ଭାରତୀୟ ଦଳର ଅଧିନାୟକ ବିରାଟ କୋହଲି ଏକ ବଡ଼ ବିପଦର ସମ୍ମୁଖୀନ ହୋଇଛନ୍ତି। ବିରାଟ କୋହଲିଙ୍କୁ ମ୍ୟାଚରୁ ବାସନ୍ଦ କରାଯାଇପାରେ ବୋଲି ଜଣାପଡିଛି। ଏହାର କାରଣ ହେଉଛି ଅମ୍ପାୟାରଙ୍କ ସହ ଯୁକ୍ତିତର୍କ । ଚେନ୍ନାଇ ଟେଷ୍ଟର ତୃତୀୟ ଦିନରେ ବିରାଟ କୋହଲି ଅମ୍ପାୟାର ନିତିନ ମେନନଙ୍କ ସହ ଯୁକ୍ତିତର୍କ କରିଥିଲେ। ତୃତୀୟ ଅମ୍ପାୟାରଙ୍କ ନିଷ୍ପତ୍ତିରେ ବିରାଟ କୋହଲି ଖୁସି ନ ଥିଲେ ଏବଂ ଏହା ପରେ କୋହଲି ଅମ୍ପାୟାରଙ୍କ ସହ ଦୀର୍ଘ ସମୟ ଧରି ଯୁକ୍ତିତର୍କ କରୁଥିବା ଦେଖାଯାଇଥିଲା। ଅମ୍ପାୟାରଙ୍କ ନିଷ୍ପତ୍ତିକୁ ନେଇ ଅସନ୍ତୋଷ ପ୍ରକାଶ କରିବା ବିରାଟ କୋହଲିଙ୍କୁ ଅସୁବିଧାରେ ପକାଇପାରେ। ଆଇସିସିର ଆଚରଣ ସଂହିତା ଧାରା ୨.୮ ଅନୁଯାୟୀ, ଜଣେ ଖେଳାଳି ଯିଏ ଅମ୍ପାୟାରଙ୍କ ନିଷ୍ପତ୍ତିକୁ ନେଇ ଅସନ୍ତୋଷ ବ୍ୟକ୍ତ କରନ୍ତି, ତାଙ୍କୁ ଲେବଲ୍ ୧ କିମ୍ବା ଲେଭଲ ୨ ଚାର୍ଜ କରାଯାଏ। ଯାହା ପରେ ଖେଳାଳିଙ୍କ ଆକାଉଣ୍ଟରେ ୧ ରୁ ୪ ଡିମେରିଟ୍ ପଏଣ୍ଟ ଯୋଗ କରାଯାଏ। ୨୪ ମାସ ମଧ୍ୟରେ, ଯଦି ଜଣେ ଖେଳାଳିଙ୍କ ଆକାଉଣ୍ଟରେ ୪ଟି ଡିମେରିଟ୍ ପଏଣ୍ଟ ଯୋଡାଯାଏ, ତେବେ ତାଙ୍କ ଉପରେ ଗୋଟିଏ ଟେଷ୍ଟ କିମ୍ବା ଦୁଇଟି ଏକଦିବସୀୟ କିମ୍ବା ଦୁଇଟି ଟି -୨୦ ଅନ୍ତର୍ଜାତୀୟ ମ୍ୟାଚ ଉପରେ ପ୍ରତିବନ୍ଧକ ଲଗାଯାଇପାରିବ।
ସୂଚନାଯୋଗ୍ୟ, ବିରାଟ କୋହଲିଙ୍କ ଆକାଉଣ୍ଟରେ ୨ଟି ଡିମେରିଟ୍ ପଏଣ୍ଟ ଅଛି। ଚେନ୍ନାଇ ଟେଷ୍ଟରେ ଅମ୍ପାୟାରଙ୍କ ନିଷ୍ପତ୍ତିରେ ଅସନ୍ତୋଷ ବ୍ୟକ୍ତ କରିବା ପାଇଁ ଯଦି ସେ ଆଉ ୨ଟି ଡିମେରିଟ୍ ପଏଣ୍ଟ ପାଆନ୍ତି, ତେବେ ତାଙ୍କୁ ଗୋଟିଏ ଟେଷ୍ଟରୁ ନିଲମ୍ବିତ କରାଯାଇପାରିବ।
