ଦୁବାଇ, ୯।୧୧: ଚଳିତ ଟି୨୦ କ୍ରିକେଟ ବିଶ୍ୱକପରେ ନାମ୍ବିଆ ବିପକ୍ଷରେ ବିଜୟ ସହ ଭାରତର ଅଭିଯାନ ଶେଷ ହୋଇଛି। ଏଥିସହ ଅଧିନାୟକ ଭାବେ ବିରାଟ କୋହଲି ମଧ୍ୟ ଶେଷ ମ୍ୟାଚ ଖେଳିଛନ୍ତି। ”ଟି୨୦ ଅଧିନାୟକ ପଦ ଛାଡ଼ି ମୁଁ ଆଶ୍ୱସ୍ତ। ଏହା ଏକ ସମ୍ମାନ ହୋଇଥିଲେ ହେଁ ମୁଁ କାର୍ଯ୍ୟଭାର ହାଲ୍କା କରିବାକୁ ଚାହୁଁଥିଲି। ମୁଁ ଗତ ୬-୭ ବର୍ଷ ଧରି ଅତ୍ୟଧିକ କାର୍ଯ୍ୟଭାର ବହନ ସହ ଚାପରେ ଥିଲି। ଏଠାରେ ଆମେ ଭଲ ଫଳ ପାଇଲୁ ନାହିଁ ସତ, ମାତ୍ର ପିଲାମାନେ ଭଲ ପ୍ରଦର୍ଶନ କରିଥିଲେ। ସେମାନେ ମୋ କାର୍ଯ୍ୟକୁ ସହଜ କରି ଦେଇଥିଲେ। ଆମେ ଶେଷ ୩ଟି ମ୍ୟାଚ ଯେପରି ଖେଳିଲୁ ସେପରି ଆଗରୁ ଖେଳିବାର ଥିଲା, ଏହା ହିଁ ଟି୨୦ କ୍ରିକେଟ। ପ୍ରଥମ ୨ଟି ଗେମ୍ରେ ଆମେ ଆରମ୍ଭରୁ ଆକ୍ରମଣାତ୍ମକ ଖେଳିପାରିଲୁ ନାହିଁ। ସେଥିରେ ଆମର ସାହସ ପର୍ଯ୍ୟାପ୍ତ ନ ଥିଲା। କୋଚ୍ ରବି ଶାସ୍ତ୍ରୀ ଓ ଅନ୍ୟ ସପୋର୍ଟ ଷ୍ଟାଫ୍ଙ୍କୁ ଧନ୍ୟବାଦ। ଗତ କିଛି ବର୍ଷ ଧରି ସେମାନେ ନିଜ ଦାୟିତ୍ୱକୁ ଉତ୍ତମଭାବେ ସମ୍ପାଦନ କରି ଆସିଥିଲେ। ଭଲ ବାତାବରଣ ମଧ୍ୟ ସୃଷ୍ଟି କରିଥିଲେ। ମୁଁ ସବୁବେଳେ ଦଳପାଇଁ କିଛି କରିବାକୁ ଚାହେଁ, ମାତ୍ର ସୂର୍ଯ୍ୟକୁମାରଙ୍କୁ ସ୍ମରଣୀୟ ଅନୁଭୂତିର ସହ ବିଶ୍ୱକପ୍ ଶେଷ କରିବା ସୁଯୋଗ ଦେବା ଲକ୍ଷ୍ୟରେ ୩ ନମ୍ବରରେ ବ୍ୟାଟିଂ କରିବାକୁ ଆସି ନ ଥିଲି“ ବୋଲି ମ୍ୟାଚ ପରେ ବିରାଟ ପ୍ରକାଶ କରିଛନ୍ତି।