ନୂଆଦିଲ୍ଲୀ,୧୬।୯: ୟୁଏଇ ଓ ଓମାନଠାରେ ଆସନ୍ତା ଅକ୍ଟୋବରରେ ଖେଳାଯିବାକୁ ଥିବା ଟି୨୦ ବିଶ୍ୱକପ୍ ପରେ କ୍ରିକେଟର ସବୁଠୁ ଛୋଟିଆ ଫର୍ମାଟର ଅଧିନାୟକ ପଦରୁ ଓହରିବାକୁ ନିଷ୍ପତ୍ତି ନେଇଛନ୍ତି ବିରାଟ କୋହଲି। କିନ୍ତୁ ଦିନିକିଆ ଓ ଟେଷ୍ଟ ଫର୍ମାଟରେ ଦଳର ନେତୃତ୍ୱ ନେବା ଜାରି ରଖିବେ ବୋଲି କୋହଲି ଟୁଇଟ୍ କରି ଜଣାଇ ଦେଇଛନ୍ତି। ତେବେ ଏଭଳି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେବା ପୂର୍ବରୁ କୋହଲି ଦଳର ସିନିୟର ବ୍ୟାଟ୍ସମ୍ୟାନ ତଥା ଉପ ଅଧିନାୟକ ରୋହିତ ଶର୍ମାଙ୍କ ସହ କଥା ହୋଇଥିଲେ। ଏ ନେଇ କୋହଲି ଟୁଇଟ୍ କରିଥିବା ଲେଟରରେ ଉଲ୍ଲେଖ କରିଛନ୍ତି।
ଉକ୍ତ ଲେଟରରେ କୋହଲି ଲେଖିଛନ୍ତି, ଏହି ନିଷ୍ପତ୍ତିରେ ପହଞ୍ଚିବା ପାଇଁ ମୋତେ ଖୁବ୍ ସମୟ ଲାଗିଥିଲା। କୋଚ୍ ରବି ଶାସ୍ତ୍ରୀ, ସାଥି ଖେଳାଳି ରୋହିତ ଶର୍ମାଙ୍କ ସମେତ ମୋ ନିକଟସ୍ଥ ଲୋକଙ୍କ ସହ ଖୁବ୍ ଆଲୋଚନା କରିଥିଲି। ତା’ ପରେ ଦୁବାଇରେ ହେବାକୁ ଥିବା ବିଶ୍ୱକପ୍ ସହ ମୁଁ ଟି୨୦ ଦଳର ନେତୃତ୍ୱ ଛାଡ଼ିବାକୁ ନିଷ୍ପତ୍ତି ନେଇଛି। ଏଥି ଲାଗି ମୁଁ ବିସିସିଆଇ ସମ୍ପାଦକ ଜୟ ଶାହ, ସଭାପତି ସୌରଭ ଗାଙ୍ଗୁଲି ଓ ଜାତୀୟ ଚୟନକର୍ତ୍ତାଙ୍କ ସହ ମଧ୍ୟ ଆଲୋଚନା କରିଥିଲି। ମୁଁ ମୋ ଦକ୍ଷତା ଅନୁଯାୟୀ, ଭାରତୀୟ କ୍ରିକେଟ ଓ ଟିମ୍ ଇଣ୍ଡିଆର ସେବା କରିବା ଜାରି ରଖିବି।
