ଦୁବାଇ,୨୬।୯(ପି.ଟି.): ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଅଧିନାୟକ ବିରାଟ କୋହଲିଙ୍କ ଉପରେ ୧୨ ଲକ୍ଷ ଟଙ୍କା ଜରିମାନା ଧାର୍ଯ୍ୟ କରାଯାଇଛି। ତାଙ୍କ ଦଳ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର କିଙ୍ଗ୍ ଏକାଦଶ ପଞ୍ଜାବ ବିପକ୍ଷ ମ୍ୟାଚ୍ରେ ମନ୍ଥର ବୋଲିଂ କରିଥିବାରୁ ଏଭଳି ନିଷ୍ପତ୍ତି ନିଆଯାଇଛି। ଏହି ମ୍ୟାଚ୍ରେ ବାଙ୍ଗାଲୋର ୯୭ ରନରେ ପରାସ୍ତ ହୋଇଥିଲା।
ଚଳିତ ସେସନ୍ରେ ଦଳ ପ୍ରଥମଥର ପାଇଁ ଏଭଳି ତ୍ରୁଟି କରିଥିବାରୁ ଆଇପିଏଲ୍ ଆଚରଣ ବିଧି ଅନୁସାରେ ୧୨ ଲକ୍ଷ ଟଙ୍କାର ଜରିମାନା ଧାର୍ଯ୍ୟ କରାଯାଇଥିବା କୁହାଯାଇଛି। କୋହଲି ଏହି ମ୍ୟାଚ୍ରେ ସାଂଘାତିକ ଭାବେ ବିଫଳ ହୋଇଥିଲେ। ସେ ଦୁଇଟି ସହଜ କ୍ୟାଚ୍ ହାତଛଡ଼ା କରିଥିଲେ ଓ ବ୍ୟାଟିଂରେ ମଧ୍ୟ ବିଫଳ ହୋଇଥିଲେ। ପଞ୍ଜାବ ଅଧିନାୟକ ଲୋକେଶ ରାହୁଲ ୮୩ ଓ ୮୯ ରନ କରିଥିବା କୋହଲି ତାଙ୍କ କ୍ୟାଚ୍ ମିସ୍ କରିଥିଲେ। ଫଳରେ ରାହୁଲ ୬୯ ବଲର ସମ୍ମୁଖୀନ ହୋଇ ୧୩୨ ରନର ଅପରାଜିତ ଶତକୀୟ ପାଳି ଖେଳିଥିଲେ। ଏହା ଯେକୌଣସି ଭାରତୀୟ ବ୍ୟାଟ୍ସମ୍ୟାନଙ୍କ ପାଇଁ ସର୍ବାଧିକ ଆଇପିଏଲ୍ ସ୍କୋର ସାବ୍ୟସ୍ତ ହୋଇଛି।