ବ୍ରିସବେନ୍, ୫।୧୦: ଭ୍ରମଣକାରୀ ନ୍ୟୁଜିଲାଣ୍ଡ ମହିଳା କ୍ରିକେଟ୍ ଦଳ ବିପକ୍ଷରେ ଏଠାରେ ଅନୁଷ୍ଠିତ ୨ୟ ଦିନିକିଆ ମ୍ୟାଚ୍ରେ ଅଷ୍ଟ୍ରେଲିଆ ୪ ଉଇକେଟ୍ରେ ବିଜୟ ହାସଲ କରିଛି। ସୋମବାର ସ୍ଥାନୀୟ ଆଲାନ୍ ବର୍ଡର ଫିଲ୍ଡରେ ଖେଳାଯାଇଥିବା ଏହି ମ୍ୟାଚ୍ରେ ନ୍ୟୁଜିଲାଣ୍ଡ ପ୍ରଥମେ ବ୍ୟାଟିଂ କରି ୯ ଉଇକେଟ୍ରେ ୨୫୨ ରନ କରିଥିଲା। ଜବାବରେ ଘରୋଇ ଅଷ୍ଟ୍ରେଲିଆ ମହିଳା କ୍ରିକେଟ୍ ଦଳ ଅଧିନାୟିକା ମେଗ୍ ଲାନ୍ନିଂ (୧୦୧ ରନ, ୯୬ ବଲ୍)ଙ୍କ ଅପରାଜିତ ଶତକ ବଳରେ ୪୫.୧ ଓଭରରେ ୬ ଉଇକେଟ୍ ହରାଇ ଲକ୍ଷ୍ୟ ହାସଲ କରିନେଇଥିଲା।
ବର୍ଷୀୟା ଲାନ୍ନିଂଙ୍କ ଦିନିକିଆ କ୍ରିକେଟ୍ରେ ଏହା ୧୪ତମ ଶତକ ଥିଲା। ଏଥିସହ ଦିନିକିଆରେ ୧୪ତମ ଶତକ ହାସଲ କରିବାରେ ସେ ବିଶ୍ୱର ଦ୍ରୁତତ୍ତମ ଖେଳାଳି ହେବାର ସୌଭାଗ୍ୟ ଲାଭ କରିଛନ୍ତି। ଉଭୟ ପୁରୁଷ ଓ ମହିଳା କ୍ରିକେଟର୍ଙ୍କ ମଧ୍ୟରେ ସେ ସବୁଠାରୁ କମ୍ ଇନିଂସ ଖେଳି ଦିନିକିଆରେ ୧୪ ଶତକ ହାସଲ କରିବାର କୀର୍ତ୍ତିମାନ ସ୍ଥାପନ କରିଛନ୍ତି। ୧୪ତମ ଶତକ ପୂରଣ କରିବାକୁ ଲାନ୍ନିଂ ୮୨ ଇନିଂସର ସହାୟତା ନେଇଥିଲେ। ପୂର୍ବରୁ ଏହି ରେକର୍ଡ ଦକ୍ଷିଣ ଆଫ୍ରିକାର ହାସିମ ଅମ୍ଲା (୮୪ ଇନିଂସ)ଙ୍କ ନାମରେ ରହିଥିଲା। ଅମ୍ଲାଙ୍କ ପଛକୁ ଡେଭିଡ୍ ଓ୍ବାର୍ନର (୯୮ ଇନିଂସ), ଭାରତୀୟ ଦଳର ଅଧିନାୟକ ବିରାଟ କୋହଲି (୧୦୩ ଇନିଂସ) ଓ କ୍ୱିଣ୍ଟନ ଡି କକ୍ (୧୦୪) ଯଥାକ୍ରମେ ୩ୟରୁ ୫ମ ସ୍ଥାନ ମଧ୍ୟରେ ରହିଛନ୍ତି।
