ନୂଆଦିଲ୍ଲୀ, ୨୭।୭: ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି ଏକ ବଡ଼ ଉପଲବ୍ଧି ହାସଲ କରିଛନ୍ତି। ବର୍ତ୍ତମାନ ବିଶ୍ୱ କ୍ରିକେଟ୍ରେ ଶ୍ରେଷ୍ଠ ବ୍ୟାଟ୍ସମ୍ୟାନ ଭାବେ ବିବେଚିତ ହେଉଥିବା କୋହଲିଙ୍କ ଇନ୍ଷ୍ଟାଗ୍ରାମ ଫଲୋଅର୍ସ ସଂଖ୍ୟା ୭୦ ମିଲିୟନ ଅତିକ୍ରମ କରିଛି। ପ୍ରଥମ ଭାରତୀୟ ଭାବେ ସୋସିଆଲ ମିଡିଆ ସାଇଟ୍ ଇନ୍ଷ୍ଟାଗ୍ରାମରେ କୋହଲି ଏହି ମ୍ୟାଜିକାଲ ସଂଖ୍ୟା ଛୁଇଁଛନ୍ତି। ବର୍ତ୍ତମାନ ଇନ୍ଷ୍ଟାଗ୍ରାମରେ କୋହଲିଙ୍କୁ ୭୦.୧ ମିଲିୟନ ଲୋକ ଅନୁସରଣ କରୁଛନ୍ତି। ତେବେ କୋହଲି ମାତ୍ର ୧୭୧ ଜଣ ଲୋକଙ୍କୁ ଅନୁସରଣ କରୁଥିବା ଜଣାପଡ଼ିଛି। ଇନ୍ଷ୍ଟାଗ୍ରାମରେ ସର୍ବାଧିକ ଫଲୋଅର୍ସ ଥିବା ଭାରତୀୟ ସେଲିବ୍ରିଟି ତାଲିକାରେ କୋହଲି ଏକମାତ୍ର କ୍ରୀଡ଼ାବିତ୍ ରହିଛନ୍ତି। ଏହି ତାଲିକାରେ କୋହଲିଙ୍କ ପଛକୁ ଅଭିନେତ୍ରୀ ପ୍ରିୟଙ୍କା ଚୋପ୍ରା ୨ୟ ସ୍ଥାନରେ ରହିଛନ୍ତି। ଇନ୍ଷ୍ଟାଗ୍ରାମରେ ପ୍ରିୟଙ୍କାଙ୍କ ଫଲୋଅର୍ସ ସଂଖ୍ୟା ୫୫.୪ ମିଲିୟନ ରହିଛି। ଶ୍ରଦ୍ଧା କପୁର (୫୧.୪ ମିଲିୟନ), ଦୀପିକା ପାଦୁକୋନ (୫୧.୦), ଆଲିଆ ଭଟ୍ଟ (୪୮.୩), ନରେନ୍ଦ୍ର ମୋଦି (୪୫.୯), ଜ୍ୟାକଲିନ ଫର୍ନାଣ୍ଡିଜ (୪୩.୫), ଅକ୍ଷୟ କୁମାର (୪୨.୯), ନେହା କକର (୪୨.୪) ଓ କ୍ୟାଟ୍ରିନା କୈଫ୍ (୪୧.୧) ଏହି ତାଲିକାରେ ଯଥାକ୍ରମେ ୩ୟରୁ ୧୦ମ ସ୍ଥାନ ମଧ୍ୟରେ ରହିଛନ୍ତି।