ଅହମ୍ମଦାବାଦ,୮।୨: ୱେଷ୍ଟଇଣ୍ଡିଜ ବିପକ୍ଷ ଦ୍ୱିତୀୟ ଦିନିକିଆ ଜିତି ସିରିଜ ହାତେଇବା ଉଦ୍ଦେଶ୍ୟରେ ବୁଧବାର ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଓହ୍ଲାଇବ ଭାରତୀୟ କ୍ରିକେଟ ଦଳ। ଭାରତର ପୂର୍ବତନ ଅଧିନାୟକ ବିରାଟ କୋହଲି ପଡ଼ିଆରେ ଓହ୍ଲାଇବା ମାତ୍ରେ ଏକ ବଡ଼ ସଫଳତା ହାସଲ କରିବେ। ୩୩ ବର୍ଷୀୟ କୋହଲି କିମ୍ବଦନ୍ତୀ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର ଏବଂ ଟିମ ଇଣ୍ଡିଆର ପୂର୍ବତନ ଅଧିନାୟକ ଏମଏସ ଧୋନୀଙ୍କ ଐତିହାସିକ କ୍ଲବରେ ଯୋଗଦେବେ।
ବିରାଟ ଏପର୍ଯ୍ୟନ୍ତ ଭାରତୀୟ ମାଟିରେ ୯୯ଟି ଦିନିକିଆ ଖେଳିଛନ୍ତି। ସିରିଜର ଦ୍ୱିତୀୟ ଦିନିକିଆରେ ପ୍ରବେଶ କରିବା ସହିତ ସେ ଦେଶରେ ୧୦୦ଟି ଦିନିକିଆ ଖେଳିବାରେ ୫ ତମ ଭାରତୀୟ ହେବେ। ମୋଟ ଉପରେ, ସେ ୩୬ତମ କ୍ରିକେଟର ହେବେ ଯିଏ ଘରେ ୧୯୯ କିମ୍ବା ଅଧିକ ଦିନିକିଆ ଖେଳିଛନ୍ତି।
ଭାରତ ପାଇଁ ସଚିନ ତେନ୍ଦୁଲକର ଦେଶରେ ମୋଟ ୧୬୪ଟି ମ୍ୟାଚ ଖେଳିଥିବାବେଳେ ଧୋନୀ ୧୨୭ ଏବଂ ପୂର୍ବତନ ଅଧିନାୟକ ମହମ୍ମଦ ଅଜହରୁଦ୍ଦିନଙ୍କ ନାମରେ ୧୧୩ଟି ଦିନକିଆ ମ୍ୟାଚ ଖେଳିଛନ୍ତି। ଭାରତର ପୂର୍ବତନ ଅଲରାଉଣ୍ଡର ଯୁବରାଜ ସିଂ ତାଙ୍କ ନାମରେ ୧୦୮ ଟି ମ୍ୟାଚ ଖେଳିଛନ୍ତି। ଏହି ୯୯ଟି ଦିନିକିଆରେ କୋହଲି ମୋଟ ୫୦୦୨ ରନ ସ୍କୋର କରିଛନ୍ତି। ୱିଣ୍ଡିଜ ବିପକ୍ଷ ସିରିଜର ପ୍ରଥମ ଦିନିକିଆରେ ମୋତ୍ର ୮ ରନ ସ୍କୋର କରିବା ପରେ କୋହଲି ପାଭିଲିୟନକୁ ଫେରିଥିଲେ। ଯଦିଓ ବିରାଟ ଏହି ସମୟ ମଧ୍ୟରେ ଭାରତୀୟ ମାଟିରେ ୫୦୦୦ ଦିନିକିଆ ରନ କରିଥିଲେ। ସେ ସବୁଠାରୁ କମ ଇନିଂସରେ ଏହି ଉପଲବ୍ଧି ହାସଲ କରିଥିଲେ। କୋହଲି ୧୧୨ ଇନିଂସରେ ୫୦୦୦ ଦିନିକିଆ ରନ ସ୍କୋର କରିଥିବା ସଚିନଙ୍କ ରେକର୍ଡ ଭାଙ୍ଗିଛନ୍ତି।
