ଶାରଜା, ୧୫।୧୦: ଚଳିତ ଆଇପିଏଲ୍ରେ ଗୁରୁବାର ସନ୍ଧ୍ୟାରେ ବିରାଟ କୋହଲିଙ୍କ ନେତୃତ୍ୱାଧୀନ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି)ର ମୁକାବିଲା କିଙ୍ଗ୍ସ ଇଲେଭେନ ପଞ୍ଜାବ ସହ ହୋଇଛି। ସ୍ଥାନୀୟ ଶାରଜା କ୍ରିକେଟ୍ ଷ୍ଟାଡିୟମରେ ଅନୁଷ୍ଠିତ ଏହି ମ୍ୟାଚ୍ରେ ବାଙ୍ଗାଲୋର ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଛି। ଫଳରେ କିଙ୍ଗ୍ସ ଇଲେଭେନ ପ୍ରଥମେ ବୋଲିଂ କରିବ। ଏହି ମ୍ୟାଚ୍ ସହ ବିସ୍ଫୋରକ ଓ୍ବେଷ୍ଟଇଣ୍ଡିଜ ବ୍ୟାଟ୍ସମ୍ୟାନ କ୍ରିସ୍ ଗେଲ୍ ଚଳିତ ଆଇପିଏଲ୍ରେ ତାଙ୍କ ଅଭିଯାନ ଆରମ୍ଭ କରିବେ। ପଞ୍ଜାବ ଏହି ମ୍ୟାଚ୍ରେ ୩ଟି ପରିବର୍ତ୍ତନ କରିଛି। ମନଦୀପ୍ ସିଂ, ପ୍ରଭସିମରନ ଓ ମୁଜିବ-ଉର୍ ରେହମାନଙ୍କ ସ୍ଥାନରେ ଯଥାକ୍ରମେ କ୍ରିସ୍ ଗେଲ୍, ଦୀପକ ହୁଦା ଓ ମୁରୁଗାନ ଅଶ୍ୱିନୀଙ୍କୁ ଚୂଡ଼ାନ୍ତ ଏକାଦଶରେ ସ୍ଥାନ ପାଇଛନ୍ତି। ବାଙ୍ଗାଲୋର ବର୍ତ୍ତମାନ ସୁଦ୍ଧା ୭ ମ୍ୟାଚ୍ରୁ ୫ ବିଜୟ ସହ ୧୦ ପଏଣ୍ଟ ପାଇ ଟେବୁଲ ତାଲିକାର ୩ୟ ସ୍ଥାନରେ ରହିଛି। ଅପରପକ୍ଷରେ ପଞ୍ଜାବ ୭ ମ୍ୟାଚ୍ରୁ ୧ ବିଜୟ ଓ ୬ ପରାଜୟ ସହ ୨ ପଏଣ୍ଟ ପାଇ ତାଲିକାର ସର୍ବନିମ୍ନ ସ୍ଥାନରେ ରହିଛି।