ମୁମ୍ବାଇ,୧୩।୮: ବିରାଟ କୋହଲିଙ୍କ ପରେ ଉନ୍ମୁକ୍ତ ଚାନ୍ଦଙ୍କ ନେତୃତ୍ୱରେ ଟିମ୍ ଇଣ୍ଡିଆ ହାତେଇଥିଲା ୧୯ ବର୍ଷରୁ କମ୍ ବିଶ୍ୱକପ୍। ଆଶା କରାଯାଉଥିଲା କୋହଲିଙ୍କ ଭଳି କ୍ରିକେଟ ପଡ଼ିଆରେ ରାଜୁତି କରିବେ ଦିଲ୍ଲୀରେ ଜନ୍ମିତ ଏହି ବ୍ୟାଟ୍ସମ୍ୟାନ। କିନ୍ତୁ ଘରୋଇ କ୍ରିକେଟରେ ସେ ଭଳି ସଫଳତା ନ ମିଳିବାରୁ ୨୮ ବର୍ଷୀୟ ଉନ୍ମୁକ୍ତ ସମସ୍ତ ଫର୍ମାଟରୁ ଦୂରେଇ ଯାଇଛନ୍ତି।
କିଛି ଟୁଇଟ୍ ଓ ସ୍ମରଣୀୟ ଭିଡିଓ ଶେୟାର କରି ଉନ୍ମୁକ୍ତ କ୍ରିକେଟରୁ ଅବସର ଘୋଷଣା କରିଛନ୍ତି। ସମ୍ଭବତଃ ଆମେରିକାରେ ହେବାକୁ ଥିବା ଟି୨୦ ଲିଗ୍ରେ ଖେଳିବା ପାଇଁ ଏଭଳି ନିଷ୍ପତ୍ତି ନେଇଛନ୍ତି ଚାନ୍ଦ। ସେଠାରେ ଖେଳିବା ପାଇଁ ଭାରତୀୟ କ୍ରିକେଟ୍ରୁ ସନ୍ନ୍ୟାସ ନେବା ନିହାତି ଜରୁରୀ। କାରଣ ଭାରତୀୟ ଖେଳାଳିଙ୍କୁ ବିଦେଶୀ ଟି୨୦ ଲିଗ୍ରେ ଖେଳିବାକୁ ବିସିସିଆଇ ଅନୁମତି ଦିଏ ନାହିଁ।
ଉଲ୍ଲେଖଯୋଗ୍ୟ, ଡାହାଣହାତୀ ବ୍ୟାଟ୍ସମ୍ୟାନ ଉନ୍ମୁକ୍ତ ଜଣେ କାମଚଳା ଅଫ୍ ସ୍ପିନର। ତାଙ୍କ ନେତୃତ୍ୱରେ ୨୦୧୨ରେ ୧୯ ବର୍ଷରୁ କମ୍ ବିଶ୍ୱକପ୍ ଜିତିଥିଲା ଭାରତ। ଫାଇନାଲରେ ୧୧୧ ରନ୍ର ଅପରାଜିତ ପାଳି ଖେଳି ମ୍ୟାନ ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ। ଏହାପରେ ସେ ଆସିଥିଲେ ଚର୍ଚ୍ଚାକୁ। ତାଙ୍କ ଖେଳ ଦେଖି ଅଷ୍ଟ୍ରେଲିଆର ପୂର୍ବତନ ଅଧିନାୟକ ଇଆନ ଚାପେଲ ଓ ପୂର୍ବତନ ଭାରତୀୟ ଅଧିନାୟକ ରାହୁଲ ଡ୍ରାଭିଡ୍ ପ୍ରଶଂସା କରିଥିଲେ। ୨୦୧୫ରେ ଚାନ୍ଦଙ୍କୁ ସିନିୟର ଭାରତୀୟ ଦଳ ସହ ଜିମ୍ବାଓ୍ବେ ପଠାଇବାକୁ ଇଚ୍ଛା ପ୍ରକାଶ କରିଥିଲେ ପୂର୍ବତନ ମୁଖ୍ୟ ଚୟନକର୍ତ୍ତା ସନ୍ଦୀପ ପାଟିଲ। କୌଣସି କାରଣରୁ ଚାନ୍ଦଙ୍କୁ ଦଳରେ ସୁଯୋଗ ମିଳି ନ ଥିଲା।
ଦିଲ୍ଲୀ ପାଇଁ ଖେଳିଥିବା ଓ ଉତ୍ତରାଖଣ୍ଡର ନେତୃତ୍ୱ ନେଇଥିବା ଚାନ୍ଦ ଭାରତ ଏ’ରେ ମଧ୍ୟ ସୁଯୋଗ ପାଇଥିଲେ। କିନ୍ତୁ ଏହି ପର୍ଯ୍ୟାୟକୁ ଡେଇଁ ଅନ୍ତର୍ଜାତୀୟ ସ୍ତରରେ ପହଞ୍ଚି ପାରି ନ ଥିଲେ ଏହି ପ୍ରତିଭାଶାଳୀ ବ୍ୟାଟ୍ସମ୍ୟାନ। କ୍ୟାରିୟରରେ ୬୭ଟି ପ୍ରଥମ ଶ୍ରେଣୀ ମ୍ୟାଚ୍ରେ ସେ ୩,୩୭୯ ରନ୍ କରିଥିଲେ। ତାଙ୍କ ନାମରେ ୮ ଶତକ ଓ ୧୬ ଅର୍ଦ୍ଧଶତକ ରହିଛି।
