ଇସଲାମାବାଦ୍,୨୧।୧:ନିକଟରେ ପାକିସ୍ତାନର ଷ୍ଟାଡିୟମରେ ପ୍ରଶଂସକମାନେ ପୂର୍ବତନ ଭାରତୀୟ ଅଧିନାୟକ ବିରାଟ କୋହଲିଙ୍କ ପୋଷ୍ଟର ନେଇ ପହଞ୍ଚିଥିଲେ। ପାକିସ୍ତାନ ସୁପର ଲିଗରେ କୋହଲିଙ୍କ ପୋଷ୍ଟର ଧରି କିଛି ପ୍ରଶଂସକ ଷ୍ଟାଡିୟମରେ ନଜର ଆସିଥିଲେ। ପାକିସ୍ତାନୀ ପ୍ରଶଂସକମାନେ ଚାହୁଁଛନ୍ତି ଯେ କୋହଲି ପାକିସ୍ତାନ ସୁପର ଲିଗରେ ଖେଳନ୍ତୁ। ମୁଲତାନ୍ ସୁଲତାନ ଏବଂ କ୍ୱେଟା ଗ୍ଲାଡିଏଟର୍ସ ମଧ୍ୟରେ ଖେଳାଯାଇଥିବା ମ୍ୟାଚ ସମୟରେ ଏହା ଦେଖିବାକୁ ମିଳିଥିଲା।
ମୁଲତାନ ବ୍ୟାଟ୍ସମ୍ୟାନ ଶାନ ମାସୁଦ ଏବଂ ମହମ୍ମଦ ରିଜୱାନ ଅର୍ଦ୍ଧ ଶତକ କରି କ୍ରିଜ୍ରେ ଥିଲେ। ପ୍ରଶଂସକମାନେ ଷ୍ଟାଡିୟମରେ ପାକିସ୍ତାନୀ କ୍ରିକେଟରଙ୍କ ପୋଷ୍ଟର ଦେଖାଉଥିଲେ। ଏହି ସମୟରେ କୋହଲିଙ୍କ ପୋଷ୍ଟର ମଧ୍ୟ ଦେଖିବାକୁ ମିଳିଥିଲା। ଏହା ଉପରେ ପ୍ରଶଂସକ ଲେଖିଛନ୍ତି ଯେ ବିରାଟ, ମୁଁ ପାକିସ୍ତାନରେ ଆପଣଙ୍କ ଶତକ ଦେଖିବାକୁ ଚାହୁଁଛି।
ପ୍ରଶଂସକମାନେ ଦୀର୍ଘ ସମୟ ଧରି କୋହଲିଙ୍କ ୭୧ ତମ ଶତକକୁ ଅପେକ୍ଷା କରି ରହିଛନ୍ତି। ସେ ୨୦୧୯ରେ ବାଂଲାଦେଶ ବିପକ୍ଷ ଡେ ନାଇଟ ଟେଷ୍ଟ ମ୍ୟାଚରେ ଶତକ ସ୍କୋର କରିଥିଲେ। ଖରାପ ପ୍ରଦର୍ଶନ ଯୋଗୁ କୋହଲି ମଧ୍ୟ ସମାଲୋଚନାର ସମ୍ମୁଖୀନ ହୋଇଛନ୍ତି। ଏହି କାରଣରୁ ସେ ପ୍ରଥମେ ଭାରତୀୟ ଟି -୨୦ ଦଳର ଅଧିନାୟକତ୍ୱ ଛାଡିଥିଲେ। ତା’ପରେ ଦିନିକିଆ ଅଧିନାୟକତ୍ୱ ତାଙ୍କଠାରୁ ନିଆଯାଇଥିଲା। ଏହା ପରେ ସେ ଟେଷ୍ଟ ଦଳର ଅଧିନାୟକତ୍ୱ ମଧ୍ୟ ଛାଡିଥିଲେ।