ଅହମ୍ମଦାବାଦ୍,୧୨।୩: ଅଷ୍ଟ୍ରେଲିଆ ବିପକ୍ଷ ଟେଷ୍ଟ ସିରିଜର ଚତୁର୍ଥ ତଥା ଶେଷ ମ୍ୟାଚରେ ବିରାଟ କୋହଲି ଟେଷ୍ଟରେ ଶତକ ଅର୍ଜନ କରିଛନ୍ତି। ସେ ଅହମ୍ମଦାବାଦରେ ଟେଷ୍ଟ କ୍ୟାରିୟରର ୨୮ତମ ଶତକ ସ୍କୋର କରିଥିଲେ। ଅନ୍ତର୍ଜାତୀୟ କ୍ରିକେଟରେ ଏହା ତାଙ୍କର ୭୫ତମ ଶତକ। ଏହା ସହ ସେ ଅନ୍ତର୍ଜାତୀୟ କ୍ରିକେଟରେ ସର୍ବାଧିକ ଶତକ ହାସଲ କରିବାରେ ସଚିନ ତେନ୍ଦୁଲକରଙ୍କ ପରେ ଦ୍ୱିତୀୟ ସ୍ଥାନରେ ରହିଛନ୍ତି। ସଚିନ ଭାରତ ପାଇଁ ମୋଟ ୧୦୦ ଶତକ ହାସଲ କରିଥିଲେ। ଏଥି ସହିତ ବିରାଟ ଏପର୍ଯ୍ୟନ୍ତ ୭୫ ଶତକ ହାସଲ କରିଛନ୍ତି। ଏଥିମଧ୍ୟରୁ ୨୮ ଶତକ ଟେଷ୍ଟରେ, ୪୬ଟି ଦିନିକିଆରେ ଏବଂ ଗୋଟିଏ ଟି-୨୦ରେ ଆସିଛି।
ଟେଷ୍ଟ କ୍ରିକେଟରେ ବିରାଟ କୋହଲିଙ୍କ ଶେଷ ନଭେମ୍ବର ୨୦୧୯ରେ ବାଂଲାଦେଶ ବିପକ୍ଷରେ ଆସିଥିଲା। ଏହା ପରେ ସେ ଟେଷ୍ଟ କ୍ରିକେଟରେ ଶତକ ହାସଲ କରିପାରି ନ ଥିଲେ। ବିରାଟ କୋହଲି ୨୩ ମ୍ୟାଚ ଏବଂ ୪୧ ଇନିଂସ ପରେ ଟେଷ୍ଟ କ୍ରିକେଟରେ ଏକ ଶତକୀୟ ଇନିଂସ ଖେଳିଛନ୍ତି। ଅଷ୍ଟ୍ରେଲିଆ ବିପକ୍ଷରେ ଏହା ହେଉଛି ତାଙ୍କର ୧୬ତମ ଶତକ। ସେ ଟେଷ୍ଟ ଏବଂ ଦିନିକିଆରେ ପ୍ରତ୍ୟେକ ୮ଟି ଶତକ ହାସଲ କରିଛନ୍ତି।
ଟେଷ୍ଟ କ୍ରିକେଟରେ ଏହା ବିରାଟ କୋହଲିଙ୍କ ଦ୍ୱିତୀୟ ମନ୍ଥର ଶତକ। ଏହି ଶତକ ପାଇଁ ସେ ୨୪୧ ବଲର ସମ୍ମୁଖୀନ ହୋଇଥିଲେ। ୨୦୧୨ ରେ ନାଗପୁର ଗ୍ରାଉଣ୍ଡରେ କୋହଲିଙ୍କ ମନ୍ଥର ଶତକ ଇଂଲଣ୍ଡ ବିପକ୍ଷରେ ଆସିଥିଲା। ସେହି ମ୍ୟାଚରେ ସେ ନିଜ ଶତକ ପାଇଁ ୨୮୯ ବଲର ସମ୍ମୁଖୀନ ହୋଇଥିଲେ।
ବିରାଟ କୋହଲି ୧୬ ଥର ଅଷ୍ଟ୍ରେଲିଆ ବିପକ୍ଷରେ ଶତକ ହାସଲ କରିଛନ୍ତି। କୌଣସି ଦେଶ ବିପକ୍ଷରେ ସର୍ବାଧିକ ଶତକ ସ୍କୋର କରିବାରେ ସେ ତୃତୀୟ ସ୍ଥାନରେ ଅଛନ୍ତି। ଏହି ପ୍ରସଙ୍ଗରେ ସଚିନ ଶୀର୍ଷରେ ଅଛନ୍ତି। ସେ ଅଷ୍ଟ୍ରେଲିଆ ବିପକ୍ଷରେ ୨୦ ଶତକ ହାସଲ କରିଥିଲେ। ଏଥି ସହିତ ଡନ ବ୍ରାଡମ୍ୟାନ ଦ୍ୱିତୀୟ ସ୍ଥାନରେ ଅଛନ୍ତି। ସେ ଇଂଲଣ୍ଡ ବିପକ୍ଷରେ ୧୯ ଶତକ ହାସଲ କରିଥିଲେ।