ନୂଆଦିଲ୍ଲୀ,୪।୧୦: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ବର୍ଡର-ଗାଭାସ୍କର ଟ୍ରଫି ଖେଳାଯିବ। ଏହି ଟ୍ରଫି ଅଧୀନରେ ଭାରତ ପାଞ୍ଚ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବାକୁ ଯାଉଛି। ଭାରତୀୟ କ୍ରିକେଟ ଦଳ ଅଷ୍ଟ୍ରେଲିଆ ଗସ୍ତ କରିବ। ଏହି ଟେଷ୍ଟ ସିରିଜ ନଭେମ୍ବର ୨୨ରୁ ଆରମ୍ଭ ହୋଇ ଜାନୁୟାରୀ ୩ ପର୍ଯ୍ୟନ୍ତ ଚାଲିବ। ଏହି ସିରିଜ ପୂର୍ବରୁ ବିରାଟ କୋହଲି ଅଷ୍ଟ୍ରେଲିଆ ଦଳ ବିଷୟରେ ଏକ ବଡ଼ କଥା କହିଛନ୍ତି, ଯାହା ଏବେ ଭାଇରାଲ ହେଉଛି।
ଭାରତୀୟ ବ୍ୟାଟ୍ସମ୍ୟାନ ବିରାଟ କୋହଲି ବର୍ଡର-ଗାଭାସ୍କର ଟ୍ରଫି ପୂର୍ବରୁ ଏକ ବଡ଼ ବିବୃତ୍ତି ଦେଇ କହିଛନ୍ତି, ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ପ୍ରତିଦ୍ୱନ୍ଦ୍ୱିତା କେବଳ ଅକ୍ରୋଶ ଏବଂ ମୁକାବିଲା ମଧ୍ୟରେ ସୀମିତ ନୁହେଁ, ବରଂ ବର୍ତ୍ତମାନ ପାରସ୍ପରିକ ସମ୍ମାନ ଏବଂ କ୍ରୀଡ଼ାବିତ୍ରେ ପରିଣତ ହୋଇଛି। ଷ୍ଟାର ସ୍ପୋର୍ଟସର ପ୍ରୋମୋ ଭିଡିଓରେ କୋହଲି ଏହି ଐତିହାସିକ ମ୍ୟାଚ ଉପରେ ଆଲୋକପାତ କରିଥିଲେ ଏବଂ ସମୟ ସହିତ ଦୁଇ ଦଳ ମଧ୍ୟରେ ପ୍ରତିଦ୍ୱନ୍ଦ୍ୱିତା କିପରି ବଦଳିଛି ସେ ବିଷୟରେ କହିଥିଲେ।
ବିରାଟ କୋହଲି ନିକଟରେ ପ୍ରକାଶ କରିଛନ୍ତି, ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ପ୍ରତିଦ୍ୱନ୍ଦ୍ୱିତା ଅତ୍ୟନ୍ତ ତୀବ୍ର ଥିଲା, କିନ୍ତୁ ଗତ କିଛି ବର୍ଷ ମଧ୍ୟରେ ଏହା ବଦଳିଛି। ୨୦୧୯ ଏବଂ ୨୦୨୧ରେ ଅଷ୍ଟ୍ରେଲିଆରେ ଭାରତ ୨-୧ ସିରିଜ ଜିତିଥିଲା, ଯାହା ଏହି ପ୍ରତିଦ୍ୱନ୍ଦ୍ୱିତାକୁ ସମ୍ପୂର୍ଣ୍ଣ ରୂପେ ବଦଳାଇ ଦେଇଛି। କୋହଲିଙ୍କ କହିବାନୁସାରେ, ଏହି ଐତିହାସିକ ବିଜୟ ପରେ ଅଷ୍ଟ୍ରେଲିଆ ଏବେ ଭାରତକୁ ଟେଷ୍ଟ କ୍ରିକେଟରେ ଗମ୍ଭୀର ପ୍ରତିଦ୍ୱନ୍ଦ୍ୱୀ ଭାବେ ସ୍ବୀକୃତି ଦେଇଛି। ପୂର୍ବରୁ ଏହି ସିରିଜ୍ ଅତ୍ୟନ୍ତ ଚାପଗ୍ରସ୍ତ ଥିଲା। କିନ୍ତୁ ଆମେ ଲଗାତାର ଦୁଇଥର ଅଷ୍ଟ୍ରେଲିଆରେ ଟେଷ୍ଟ ସିରିଜ ଜିତିଛୁ, ଯାହା ପରେ ଏହି ପ୍ରତିଦ୍ୱନ୍ଦ୍ୱିତା ସମ୍ମାନରେ ପରିଣତ ହୋଇଛି।
