ଲକ୍ଷ୍ନୌ,୩୧।୧୦: ଉତ୍ତରପ୍ରଦେଶରେ ନଭେମ୍ବର ୩ରେ ୭ଟି ବିଧାନସଭା ଆସନରେ ଉପନିର୍ବାଚନ ହେବାକୁ ଯାଉଛି। ସ୍ଥାନୀୟ ଦେଓରିଆ ସଦର ଆସନରୁ ରାଜନ ଯାଦବ ଓରଫ କୋକେଇ ବାବା ନିର୍ବାଚନ ଲଢୁଛନ୍ତି। ସେ ଗୋରଖପୁରର ବାସିନ୍ଦା। ଇତିମଧ୍ୟରେ କୋକେଇ ବାବା ୧୧ ଥର ନିର୍ବାଚନ ଲଢ଼ି ପରାଜିତ ହୋଇଛନ୍ତି। ସେ ବାରାଣାସୀରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ନିର୍ବାଚନ ଲଢ଼ିଥିଲେ। ସେହିପରି ଲକ୍ଷ୍ନୌରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ବିରୋଧ ସେ ନିର୍ବାଚନ ଲଢ଼ି ସାରିଛନ୍ତି। ୨୦୦୯ରେ ଗୋରଖପୁର ଲୋକସଭା ଆସନରୁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ବିରୋଧରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ। କୋକେଇ ବାବାଙ୍କ ଦଳୀୟ ଚିହ୍ନ ହାଣ୍ଡି। ସେ ନାମାଙ୍କନ ପତ୍ର ଦାଖଲ କରିବାଠାରୁ ଆରମ୍ଭ କରି ନିର୍ବାଚନ ପ୍ରଚାରରେ କୋକେଇରେ ବସି ଆସିଥାନ୍ତି। ତାଙ୍କୁ ବୋହି ନେବା ସମୟରେ ଲୋକେ ରାମ୍ ନାମ୍ ସତ୍ୟ ହୈ, ହରି ନାମ୍ ସତ୍ୟ ହୈ କହିଥାନ୍ତି। ୨୦୦୮ରେ ଏମ୍ବିଏ ପାସ୍ କରି ସେ ବ୍ୟାଙ୍କକରେ ଏକ ବହୁ ରାଷ୍ଟ୍ରୀୟ କମ୍ପାନୀରେ ଚାକିରି କରିଥିଲେ। ତେବେ ପରବର୍ତ୍ତୀ ସମୟରେ ସାମାଜିକ କର୍ମୀ ଭାବେ ସେ ସମାଜ ସେବା ଆରମ୍ଭ କରିଥିଲେ।