ଆବୁଧାବି, ୨୧।୧୦: ଆଇପିଏଲ୍ ୧୩ତମ ସିଜନର ୩୯ତମ ମ୍ୟାଚ୍ରେ ବୁଧବାର ବିରାଟ କୋହଲିଙ୍କ ନେତୃତ୍ୱାଧୀନ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି)ର ମୁକାବିଲା କୋଲକାତା ନାଇଟ୍ ରାଇଡର୍ସ (କେକେଆର୍) ସହ ହୋଇଛି। ଏହି ମ୍ୟାଚରେ ଟସ୍ ଜିତି ପ୍ରଥମେ ବ୍ୟାଟିଂ କରିଥିବା କେକେଆର୍ ବେଶ୍ ନୈରାଶ୍ୟଜନକ ପ୍ରଦର୍ଶନ କରିଛି। କୋଲକାତା ସମ୍ପୂର୍ଣ୍ଣ ୨୦ ଓଭର ବ୍ୟାଟିଂ କରିଥିଲେ ମଧ୍ୟ ୮ ଉଇକେଟ୍ ହରାଇ ମାତ୍ର ୮୪ ରନ୍ ସଂଗ୍ରହ କରିଛି। ଫଳରେ ବିରାଟ କୋହଲିଙ୍କ ଦଳ ବାଙ୍ଗାଲୋର ସାମ୍ନାରେ ବିଜୟ ଲାଗି ୮୫ ରନ ଲକ୍ଷ୍ୟ ଧାର୍ଯ୍ୟ ହୋଇଛି। କୋଲକାତା ପକ୍ଷରୁ ଅଧିନାୟକ ଇଅନ ମୋର୍ଗାନ (୩୦ ରନ)ଙ୍କୁ ଛାଡ଼ି ଦେଲେ ଆଉ କେହି ଆଖିଦୃଶିଆ ପ୍ରଦର୍ଶନ କରିପାରି ନ ଥିଲେ। ଅନ୍ୟମାନଙ୍କ ମଧ୍ୟରେ ଶୁବମନ ଗିଲ (୧), ରାହୁଲ ତ୍ରିପାଠୀ (୧), ନୀତୀଶ ରାଣା (୦), ଟମ୍ ବଣ୍ଟନ (୧୦), ଦୀନେଶ କାର୍ତ୍ତିକ (୪), ପ୍ୟାଟ୍ କୁମିନ୍ସ (୪) ନିରାଶ କରିଥିଲେ। ତେବେ କୁଲଦୀପ ଯାଦବ (୧୨) ଓ ଲୋକି ଫର୍ଗୁସନ (୧୯*) ଶେଷ ଭାଗରେ କିଛିଟା ସଂଘର୍ଷପୂର୍ଣ୍ଣ ବ୍ୟାଟିଂ କରିଥିଲେ। ବାଙ୍ଗାଲୋର ପକ୍ଷରୁ ମହମ୍ମଦ ସିରାଜ (୪-୨-୮-୩) ବେଶ୍ ମାରାତ୍ମକ ବୋଲିଂ କରିଥିଲେ। ଆଇପିଏଲ୍ ଇତିହାସରେ କୌଣସି ଦଳ ସଂପୂର୍ଣ୍ଣ ୨୦ ଓଭର ବ୍ୟାଟିଂ କରି ସର୍ବନିମ୍ନ ସ୍କୋର କରିବାର ଅଲୋଡ଼ା ରେକର୍ଡ ଏବେ କୋଲକାତା ନାମରେ ଲିପିବଦ୍ଧ ହୋଇଛି। ପୂର୍ବରୁ କିଙ୍ଗ୍ସ ଇଲେଭେନ ପଞ୍ଜାବ (୯୨/୮ ବନାମ ଚେନ୍ନାଇ) ନାମରେ ଏହି ରେକର୍ଡ ରହିଥିଲା।