ଆବୁଧାବି, ୧୮।୧୦: ଆଇପିଏଲ୍ ଚଳିତ ସିଜନର ରବିବାର ଖେଳାଯାଇଥିବା ୩୫ତମ ମ୍ୟାଚ୍ରେ କୋଲକାତା ନାଇଟ୍ ରାଇଡର୍ସ (କେକେଆର୍) ସୁପର୍ ଓଭରରେ ସନ୍ରାଇଜର୍ସ ହାଇଦ୍ରାବାଦକୁ ପରାସ୍ତ କରିଛି। ଏହି ମ୍ୟାଚ୍ରେ କୋଲକାତା ପକ୍ଷରୁ ଧାର୍ଯ୍ୟ ୧୬୪ ରନର ଲକ୍ଷ୍ୟକୁ ପିଛା କରି ହାଇଦ୍ରାବାଦ୍ ମଧ୍ୟ ୬ ଉଇକେଟ୍ ବିନିମୟରେ ସମାନ ୧୬୩ ରନ କରିଥିଲା। ଅଧିନାୟକ ଡେଭିଡ୍ ଓ୍ବାର୍ନର ୪୭ ରନ (୩୩ ବଲ)ର ଦ୍ରୁତ ଅପରାଜିତ ଇନିଂସ ଖେଳିଥିଲେ ମଧ୍ୟ ଦଳକୁ ଜିତାଇ ପାରି ନ ଥିଲେ। ଅନ୍ତିମ ଓଭରରେ ବିଜୟ ପାଇଁ ହାଇଦ୍ରବାଦ୍କୁ ୧୮ ରନ ଆବଶ୍ୟକ ହେଉଥିଲା। କିନ୍ତୁ ଆନ୍ଦ୍ରେ ରସେଲଙ୍କ ଏହି ଓଭରରୁ ୧୭ ରନ ସଂଗୃହିତ ହୋଇଥିଲା। ଫଳରେ ମ୍ୟାଚ୍ ଟାଇ ହୋଇଯାଇଥିଲା। ଏହାପରେ ସୁପର୍ ଓଭରରେ ପ୍ରଥମେ ବ୍ୟାଟିଂ କରିଥିବା ହାଇଦ୍ରାବାଦ୍ ମାତ୍ର ୨ ରନ କରିଥିଲା। ସୁପର୍ ଓଭରର ପ୍ରଥମ ବଲରେ ଡେଭିଡ୍ ଓ୍ବାର୍ନର (୦) ଓ ୩ୟ ବଲରେ ଅବଦୁଲ ସାମଦ୍ (୨) ଆଉଟ୍ ହୋଇଥିଲେ। କୋଲକାତା ପକ୍ଷରୁ ଲୋକି ଫର୍ଗୁସନ ସୁପର୍ ଓଭର ବୋଲିଂ କରିଥିଲେ। ଜବାବରେ ୩ ରନର ଲକ୍ଷ୍ୟକୁ କୋଲକାତା ୪ ବଲରେ ହାସଲ କରିନେଇଥିଲା। ସିଜନରେ କେକେଆର୍ର ଏହା ୫ମ ବିଜୟ ଥିଲା।
ମ୍ୟାଚ୍ରେ ପ୍ରଥମେ ବ୍ୟାଟିଂ କରି କୋଲକାତା ୨୦ ଓଭରରେ ୫ ଉଇକେଟ୍ ହରାଇ ୧୬୩ ରନ ସଂଗ୍ରହ କରିଛି। ଦଳ ପକ୍ଷରୁ ଶୁବମନ ଗିଲ୍ ୩୬, ରାହୁଲ ତ୍ରିପାଠୀ ୨୩, ନୀତୀଶ ରାଣା ୨୯, ଅଧିନାୟକ ଇଅନ ମୋର୍ଗାନ ୩୪ ଓ ଦୀନେଶ କାର୍ତ୍ତିକ ୨୯* ରନ କରିଥିଲେ। ତେବେ ବିସ୍ଫୋରକ ବ୍ୟାଟ୍ସମ୍ୟାନ ଆନ୍ଦ୍ରେ ରସେଲ (୯) ନିରାଶ କରିଥିଲେ। ପ୍ରତିପକ୍ଷ ହାଇଦ୍ରାବାଦ ପକ୍ଷରୁ ଟି. ନଟରାଜନ ୨ଟି ଉଇକେଟ୍ ହାସଲ କରିଥିଲେ।